ހާލަންޑު ޖެހި ލަނޑު ސައްހަކަމަށް ނިންމުނީ ގޯހަކުން: ރެފްރީން

މެންޗެސްޓާ ޔުނައިޓެޑާ ދެކޮޅަށް މެންޗެސްޓާ ސިޓީ ކުޅެ 1-0 އިން މޮޅުވި ޑާބީ މެޗުގައި އާލިން ހާލަންޑު ކާމިޔާބުކުރި ގޯލް ވީއޭއާރުން ސައްޙަ ގޯލެއް ކަމަށް ކަނޑައެޅުނީ ކުށަކުން ކަމަށް ޕްރޮފެޝަނަލް ގޭމް ރެފްރީޒް (ޕްރޯ ރެފް) އިން ރޭ ހާމަކޮށްފިއެވެ.

ބުރޫނޯ ފެނާންޑެސްއަށް ކުރި ފައުލެއްގެ ސަބަބުން ފޯޑެންއަށް ރަތް ކާޑު ދައްކައި ސިޓީ 10 ކުޅުންތެރިންނާ އެކު ކުޅެމުން ދަނިކޮށް ސިޓީން ވަނީ މެޗްގެ 60 ވަނަ މިނެޓް ތެރޭގައި ލަނޑެއް ޖަހާފައެވެ. މި ލަނޑު ޖެހީ ހާލާންޑެވެ. އެންމެ ފުރަތަމަ ރެފްރީ އެ ގޯލް ނިންމީ އޯފްސައިޑް ލަނޑެއްގެ ގޮތުގައެވެ. ނަމަވެސް ވީއޭއާރު ބެލުމަށްފަހު ފަހުން އެ ނިންމުން ބަދަލުކުރީ ސިޓީގެ މިޑްފީލްޑަރު އެންޒޯ ފެނާންޑެޒް އޮފްސައިޑު މަގާމެއްގައި ހުރެ ބޯޅައިގައި ނުޖެހޭ ކަމަށް ބެލުމަށްފަހުއެވެ.

ޕްރޯ ރެފްއިން ނެރުނު ބަޔާން

މިކަމާ ގުޅިގެން ޔުނައިޓެޑުގެ ކޯޗު މައިކެލް ކެރިކް ބުނީ ރެފްރީންގެ ޓީމެއް ގުޅިގެން އެ ގޯލް ސައްޙަ ކަމަށް ނިންމުމަކީ "ކަންބޮޑުވާ" ކަމެއް ކަމަށެވެ. ޔުނައިޓެޑުގެ ޑިފެންޑަރު ލިސާންޑްރޯ މާޓީނެޒް ބުނީ ޕްރިމިއާ ލީގުގައި ފަހެއް ނުވަތަ ހައެއް އޮފިޝަލުން ތިބިއިރު މިކަހަލަ ގޯހެއް ހެދުމަކީ ބަލައިގަނެވޭނެ ކަމެއް ނޫންކަމަށެވެ.

މެންޗެސްޓާ ޑާބީގެ ލީގު މެޗުތަކުގައި ހާލަންޑު މިހާތަނަށް 9 ގޯލް ޖަހާފައިވާއިރު، ޕްރޯ ރެފް އިން ވީއޭއާރުގެ މި ނިންމުން މުރާޖައާކުރާނޭކަމަށް ވަނީ ބުނެފައެވެ.