އެސްޓީއޯއިން ހިއްސާގެ ފައިދާގެ ގޮތުގައި 80 ރުފިޔާ ބެހުމަށް ނިންމައިފި

ސަރުކާރާއި ރައްޔިތުން ހިއްސާވާ ކުންފުނި، އެސްޓީއޯގެ މިދިޔަ އަހަރުގެ ވިޔަފާރީގެ ފައިދާއިން ހިއްސާއަކަށް 80 ރުފިޔާ ބެހުމަށް ނިންމައިފިއެވެ.

އެސްޓީއޯގެ މިދިޔަ އަހަރުގެ ފައިދާއިން ހިއްސާއަކަށް 80 ރުފިޔާ ބެހުމަށް ނިންމީ "ބާސެލޯ ނަސަންދުރަ" ހޮޓަލުގައި މިރޭ ބޭއްވި އެކުންފުނީގެ 2024 ވަނަ އަހަރީ އާއްމު ޖަލްސާގައެވެ. އެސްޓީއޯގެ ބޯޑުން ނިންމީ މިދިޔަ އަހަރުގެ ފައިދާއިން ހިއްސާއަކަށް 80 ބެހުމަށެވެ. ހިއްސާގެ ފައިދާގެ ގޮތުގައި ބެހުމަށް ނިންމި އަދަދު ފާސްކޮށްފައިވަނީ, ޖަލްސާއަށް ހާޒިރުވި އާއްމު ހިއްސާދާރުންގެ ވޯޓުންނެވެ.

އެސްޓީއޯއިން މިއަހަރު ހިއްސާގެ ފައިދާގެ ގޮތުގައި 80 ރުފިޔާ ބެހުމަށް ފާސްކުރިއިރު، 2023 ވަނަ އަހަރު ފައިދާގެ ގޮތުގައި ބަހާފައިވަނީވެސް ހިއްސާއަކަށް 80 ރުފިޔާއެވެ.

އެސްޓީއޯގެ ބޯޑުގައި އާއްމު ހިއްސާދާރުން ތަމްސީލްކުރާނޭ ޑިރެކްޓަރަކަށް ހޮވިފައިވަނީ މުހައްމަދު އަހުސަން ސަލީމް އެވެ.

އެސްޓީއޯއަށް މިދިޔަ އަހަރު ޖުމްލަ އާމްދަނީގެ ގޮތުގައި 15.4 ބިލިޔަން ރުފިޔާ ވަނީ ލިބިފައިވާއިރު, ވިޔަފާރި ހިންގައިގެން ލިބުނު ފައިދާ ވަނީ 1 ބިލިއަން ރުފިޔާ ފަހަނަ އަޅައި ގޮސްފައެވެ. މިދިޔަ އަހަރު އެސްޓީއޯއަށް ސާފްފައިދާގެ ގޮތުގައި ލިބިފައިވަނީ، 741 މިލިއަން ރުފިޔާއެވެ. ހިއްސާއަކަށް ޖެހިފައިވަނީ 658 ރުފިޔާއެވެ. މިދިޔަ އަހަރު މިއަދަދު އުޅެނީ 726 ރުފިޔާގައެވެ.