މިއީ ރެކޯޑެއް. ޖަލްސާ ނުނިމެނީސް އެސްޓީއޯގެ ހިއްސާދާރުންނަށް ހިއްސާގެ ފައިދާ ޖަމާވެއްޖެ

މިއީ އަދި ރާއްޖޭގެ ތާރީހުގައިވެސް ރެކޯޑެކެވެ. ސަރުކާރާ ރައްޔިތުން ހިއްސާވާ ކުންފުންޏެއްގެ ހިއްސާގެ ފައިދާ މިހާ އަވަހަށް ޖަމާވި އަޑެއް ނާހަމެވެ. ޕަބްލިކް ކުންފުނިތަކުގެ އަހަރީ އާއްމުޖަލްސާ މީޑިއާތަކަށް ހުޅުވާލައިގެން ބާއްވަމުން އަންނަތާ ގާތްގަނޑަކަށް 15 އަހަރަށްވުރެ ގިނަދުވަސް ވެދާނެއެވެ. ނަމަވެސް ރެއަކީ މުޅިން ތަފާތު ރެއެކެވެ.

އެސްޓީއޯގެ އަހަރީ އާއްމުޖަލްސާ ބާސެލޯ ނަސަންދުރަ ހޮޓަލުގައި ރޭ ބޭއްވިގެންދިޔައިރު، މި ޖަލްސާ ވެގެން ގޮސްފައިވަނީ ހިއްސާދާރުންނަށް ޑިވިޑެންޑް ބަހަން ފާސްކުރުމަށްފަހު ހިއްސާގެ ފައިދާ އެންމެ އަވަހަށް ޖަމާވި އަހަރީ އާއްމު ބައްދަލުވުމަށެވެ. އެސްޓީއޯއިން ރޭ ނިންމާފައިވަނީ މިދިޔަ އަހަރުގެ ފައިދާއިން ހިއްސާއަކަށް 80 ރުފިޔާ ބެހުމަށެވެ. މިއީ މިދިޔަ އަހަރުވެސް ހިއްސާގެ ފައިދާގެ ގޮތުގައި ބެހުމަށް ނިންމި އަދަދެވެ. މި ނިންމުމާއެކު އެސްޓީއޯއިން ހިއްސާދާރުންނަށް 90 މިލިއަން ރެއިން ރެއަށް ޖަމާކޮށް ނިންމިއިރު، މީގެ ތެރެއިން އާއްމު ހިއްސާދާރުންނަށް ލިބޭނެ އަދަދަކީ 17 މިލިއަން ރުފިޔާއެވެ. ބާކީ 73 މިލިއަން ރުފިޔާ ޖަމާވާނީ  އެސްޓީއޯގެ ބޮޑު ހިއްސާދާރު ސަރުކާރަށެވެ.

ރޭގެ ޖަލްސާގައި އާއްމު ހިއްސާދާރަކު ވާހަކަދައްކަމުން ވަނީ، އެސްޓީއޯގެ ހިއްސާގެ ފައިދާ ޖަމާވިކަން ފާހަގަކޮށް ކުންފުނި ތާރީހުގެ ތެރެއަށް ވަދެގެން ދިޔަކަން ފާހަގަކޮށްފައެވެ. އަދި މިކަމަކީ އެހެން ކުންފުނިތަކުންވެސް ނަމޫނާއަކަށް ބަލަންވީ ކަމެއްކަމަށް އޭނާ ބުންޏެވެ. މީގެ ކުރިއަށް ޖެހިލާއިރު އަހަރީ އާއްމު ޖަލްސާގައި ފާސްކުރާ ހިއްސާގެ ފައިދާ ނަގަން ދާންޖެހެނީ ކުންފުނީގެ ހެޑް އޮފީހަށެވެ. އެގޮތުން ހިއްސާގެ ފައިދާ ޖަމާނުވެގެން މީގެކުރިން އެތައްފަހަރަކު ކުންފުންޏަށް ގުޅަން ޖެހޭކަންވެސް އޭނާ ވަނީ ފާހަގަކޮށްފައެވެ.

މީގެ އަހަރުތަކެއް ކުރިއަށް ޖެހިލާއިރު ޕަބްލިކް ކުންފުނިތަކުގެ އަހަރީ އާއްމުޖަލްސާ ވެފައި އޮންނަނީ އާއްމު ހިއްސާދާރުންނާއި ޑިރެކްޓަރުންގެ ބޯޑާ ދެމެދު އަރާރުންވާ، މާލަމެއްގެ ގޮތުގައެވެ. ހިއްސާދާރުންގެ ޝަކުވާތައް އަޑުއެހުމަށް މީގެކުރިން ކުންފުނިތަކަށް އެކަށީގެންވާ ވަގުތު ނުދީ ޖަލްސާ ނިންމާލައެވެ. އެގޮތަށް ޖަލްސާތައް ކުރިއަށްގެންދާތީވެ، މީގެ ކުރިން އެތައް ފަހަރަކު ސީއެމްޑީއޭއިން ވަނީ ހިއްސާދާރުންގެ ސުވާލުތަކަށް ޖަވާބުދިނުމަށް އެކަށީގެންވާ ވަގުތު ދިނުމަށް ކުންފުނިތަކުން އަންގާފައެވެ. މީގެ ކުރިން އާއްމު ގޮތެއްގައި ކުންފުނިތަކުގެ އަހަރީ އާއްމު ޖަލްސާތައް ކުރިއަށްގެންދަނީ ބޮޑުހިއްސާދާރު ނުވަތަ ފައިނޭންސް މިނިސްޓްރީ ބޭނުންވާ ގޮތަށެވެ. އާއްމު ހިއްސާދާރުންގެ ފަރާތުން ޑިރެކްޓަރު އިންތިހާބުކުރާ ވޯޓުގައި ސަރުކާރުން މީގެ ކުރިން ބައިވެރިވެފައި ހުރިކަމީ މީގެ މިސާލެކެވެ.

ހިއްސާދާރުންނަށް ސުވާލުކުރަން ބޭނުންވާ ވަގުތު ދީގެން އަހަރީ އާއްމު ޖަލްސާ މީގެ ކުރިން ކުރިއަށްގެންދަން ފެށީވެސް އެސްޓީއޯއިންކަން ފާހަގަކޮށްލެވެއެވެ. މިގޮތުން ރޭގެ ޖަލްސާގައިވެސް އެސްޓީއޯއިން ވަނީ ހިއްސާދާރުންގެ ސުވާލުތައްކޮށް ނިމެންދެން ވަގުތުދީފައެވެ. އަދި ސުވާލުތަކަށް ކުންފުނީގެ މެނޭޖިންގ ޑިރެކްޓަރު ޝިމާދު އިބްރާހީމް ވަނީ ފުރިހަމައަށް ޖަވާބުދާރީވެފައެވެ.

ރޭގެ ޖަލްސާގައި އެސްޓީއޯގެ ހިއްސާދާރުން ނިކުތީ ހިތްހަމަޖެހިގެން, ފާސްކުރި ހިއްސާގެ ފައިދާ ޖަމާވިކަމުގެ އުފަލާވެސް އެކުގައެވެ. މިއީ އަދި ރާއްޖޭގެ ޕަބްލިކް ކުންފުންޏެއްގެ ހިއްސާދާރުންނަށް މީގެ ކުރިން ލިބުނު އުފަލެއް އަދި ކުންފުންޏަކަށް ހާސިލްކުރެވުނު ކަމެއްވެސް ނޫނެވެ.