ގަލޮޅު ދަނޑުގެ ބަދަލުގައި، ޤައުމީ ފުޓްބޯޅަދަނޑު ހުޅުމާލެއަށް

ގަލޮޅު ރަސްމީ ފުޓްބޯޅަ ދަނޑު ތަޅާލުމަށްފަހު، ޤައުމީ ފުޓްބޯޅަ ސްޓޭޑިއަމް ހުޅުމާލޭގައި ތަރައްގީ ކުރުމަށް ސަރުކާރުން ނިންމައިފިއެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ކުޅިވަރާއި ބެހޭ ވަޒީރު އަބްދުﷲ ރާފިއު ވިދާޅުވީ ގަލޮޅު ރަސްމީ ފުޓްބޯޅަ ދަނޑު ތަޅާލުމަށްފަހު އެ ތަނުގައި އިތުރު ދަނޑެއް އިމާރަތްކުރުމަށް ކުރީގެ ސަރުކާރުން ނިންމާފައިވާ ނިންމުން މި ސަރުކާރުން ބަދަލުކޮށްފައިވާ ކަމަށެވެ.

އެގޮތުން މި ސަރުކާރުން ނިންމާފައިވަނީ އިންޑިއާގެ އެހީގައި އިމާރަތްކުރާ އައު ދަނޑު ހުޅުމާލެ ފޭސް 1 ގައި ތަރައްގީކުރަންކަމަށް މިނިސްޓަރު ވިދާޅުވި އެވެ. މިނިސްޓަރު ވިދާޅުވި ގޮތުގައި މިހާރު އެކަމަށް ބޭނުންވާ ބިންވެސް ހަމަޖެހިފައިވާ ކަމަށެވެ.

މިނިސްޓަރު ވިދާޅުވީ ގަލޮޅު ދަނޑުގައި ސްޓޭޑިއަމެއް އެޅުމަށް އެންމެ އެކަށީގެންނުވާ މައިގަނޑު ސަބަބުތަކުގެ ތެރޭގައި ސެކިއުރިޓީ މައްސަލަތަކާއި، ޕާކިންގ އަދި ޓްރެފިކްގެ ދަތިތައް ހިމެނޭ ކަމަށެވެ.  ހުޅުމާލޭގައި ތަރައްގީކުރާ ސްޓޭޑިއަމް ތަރައްޤީކުރެވިގެންދާނީ މަލްޓިސްޕޯޓްސް އިންޑޯ ކޮމްޕްލެކްސް އެއްގެގޮތުގައެވެ.

މި މަލްޓިސްޕޯޓްސް އިންޑޯ ކޮމްޕްލެކްސް އާއެކު، އިންޑިއާ ސަރުކާރުގެ ފައިނޭންސިންގެ ތެރެއިން ކުރިއަށްގެންދިއުމަށް ހަމަޖެހިފައިވާ ރާއްޖޭގެ ހަތަރު ސަރަހައްދުގެ ސިންޓެޓިކް ޓްރެކްތައް ތަރައްޤީ ކުރުމުގެ މަސައްކަތާއި، ޓޭބަލް ޓެނިސް އިންޑޯ ހޯލްއެއް އެޅުމާއި ބާސްކެޓް އިންޑޯ ހޯލްއެއް ތަރައްޤީކުރުމުގެ މަސައްކަތްވެސް ވަރަށް އަވަހަށް ފެށޭނެކަމަށް މިނިސްޓަރު ވަނީ ވިދާޅުވެފައެވެ.