800،000ރ. ގެ ދަރަންޏެއް ދައްކަން މެންބަރު އިސްމާޢީލް އަހުމަދުގެ މައްޗަށް ހުކުމް ކޮށްފި

ރައްޔިތުންގެ މަޖިލީހުގެ ދުވާފަރު ދާއިރާގެ މެމްބަރު އިސްމާއިލް އަހުމަދުގެ މައްޗަށް 856،830ރ. ގެ ދަރަންޏެއް ސާބިތުވެ އެ ދައްކަން ސިވިލް ކޯޓުން ހުކުމްކޮށްފިއެވެ.

މެމްބަރު އިސްމާއިލް އަހުމަދުގެ މައްޗަށް އެ ދަރަނި ދައްކަން ހުކުމް ކުރީ ތ. ކަނޑޫދޫ ސްކޫލްގެ ތިން ކްލާސްރޫމެއް އެޅުމުގެ މަޝްރޫއު އޭނާގެ ކުންފުންޏަކުން ނަގައި، މަސައްކަތެއް ހިންގަން ރ. ކަނދޮޅުދޫ މީހަކާ އެކު ހެދި އެއްބަސްވުމަކާ އެއްގޮތަށް ފައިސާ ދައްކާފައިނުވާ ކަމަށް ބުނެ، ހުށަހެޅި މައްސަލައެއްގައެވެ.

އެގޮތުން، 2018 ވަނަ އަހަރު މެންބަރު އިއްސޭއާއި މިނިސްޓްރީ އޮފް އެޑިއުކޭޝަނުން ވެފައިވާ އެއްބަސްވުމެއްގެ ދަށުން ތ. ކަނޑޫދޫ ސްކޫލުގެ އެ ކްލާސްރޫމުތައް އިމާރާތްކުރުމަށް ސަބްކޮންޓްރެކްޓަރާއި ހަވާލުކުރުމުން އެ މީހާގެ އަމިއްލަ ތަކެތީގައި މަސައްކަތް ކޮށްފައިވާއިރު، އެ ތަކެތީގެ އަގަށްވާ 1.2 މިލިއަން ރުފިޔާގެ ތެރެއިން ބޮޑު ބައެއް ނުދީ އޮތް ކަމަށްބުނެ ސަބް ކޮންޓްރެކްޓަރުގެ ފަރާތުން އެ މައްސަލަ ސިވިލް ކޯޓަށް ހުށަހެޅީއެވެ.

އެ މައްސަލަ ހުށަހެޅި ފަރާތުން ބުނެފައި ވަނީ އިއްސޭ ދައްކަވަން ޖެހޭ ފައިސާގެ ތެރެއިން ދެއްކެވީ 425،000ރ. ކަމަށެވެ. ބާކީ 856،830ރ. އޭނާ ދެއްވާފައެއް ނުވެއެވެ.

އެ މައްސަލައިގައި ދައުވާއިން ދިފާއުވާން ގާނޫނުގައި ކަނޑައަޅާފައިވާ މުއްދަތުގައި އިއްސޭ ހުށަހަޅާފައިނުވާތީ މައްސަލައިގެ ހުކުމްކޮށްފައިވަނީ ޣައިރު ހާޒިރުގައެވެ. ހުކުމްގައި އަންގާފައިވަނީ 856،830ރ. 15 ދުވަސް ތެރޭގައި ދައްކައި ހަލާސް ކުރުމަށެވެ.

ގާނޫނުއަސާސީގެ 73 ވަނަ މާއްދާގައިވާ ގޮތުން އަދާކުރާންޖެހޭ ސާބިތު ދަރަންޏެއް އޮތް މީހަކު ނަމަ، ހުކުމާ އެއްގޮތަށް އެ ދަރަނި އަދާކުރަމުން ނުދާ ނަމަ، މެންބަރު ކަމުގެ ޝަރުތު ގެއްލޭނެއެވެ. އެހެންކަމުން، 15 ދުވަސް ތެރޭގައި މެންބަރު އިސްމާއިލް މި ދަރަނި އަދާ ނުކޮށްފި ނަމަ، އޭނާގެ ގޮނޑިއާ މެދު ސުވާލު އުފެދޭނެއެވެ.

ނަމަވެސް އެ މައްސަލާގައި އިއްސޭ ނެރުނު ބަޔާނެއްގައި ވާގޮތުން މީގެ ކުރިން 2020 ވަނަ އަހަރު ސަބް ކޮންޓްރެކްޓަރު މޫސާ ޚަލީލު އެ މައްސަލަ ސިވިލް ކޯޓަށް ހުށަހެޅި ކަމަށާއި އޭރު ކޯޓުން ނިންމީ ދަރަނި ސާބިތުނުވާ ކަމަށް ކަމަށެވެ.

އަދި ސަބްކޮންޓްރެކްޓަރު، މޫސާ ޚަލީލާ އެކު ވެފައިވާ އެއްބަސްވުމުގައި ބުނާ މުއްދަތުގައި މަސައްކަތް ކުރިއަށް ގޮސްފައިނުވާތީއާއި މަސައްކަތް ފުރިހަމަވެފައިނުވާތީ އެފަރާތުގެ އަތުން މަސައްކަތް އަތުލުމުގެ ކުރިން، އެފަރާތުން ކުރި މަސައްކަތަށް ދޭންޖެހޭ ފައިސާއެއްނަމަ، 2019 ވަނަ އަހަރާ ހަމައަށް ދައްކާ ޚަލާސްކޮށްފައިވާނެ ކަމަށްވެސް ބުނެފައި ވެއެވެ.