އިންޑިއާގެ މޮބިކްވިކް އިން، ހިއްސާގެ ބާޒާރަށް ނިކުމެއްޖެ

އިންޑިއާގެ ޑިޖިޓަލް ޕޭމަންޓްސްގެ ދާއިރާގައި އެންމެ ކުރިއަރަމުން އަންނަ އެއް ކުންފުނިކަމަށްވާ މޮބިކްވިކް އިން ހިއްސާގެ ބާޒާރަށް ނިކުމެއްޖެއެވެ.

އިއްޔެ، ހިއްސާގެ ބާޒާރުގައި ލިސްޓްކުރި ފުރަތަމަ ދުވަހު އެކުންފުނި ނިންމާލީ ހިއްސާއެއް ފައްސަތޭކަ ހަތް ރުޕީސްގައެވެ. މިއާއެކު ކުންފުނީގެ އަގު 464 މިލިއަން އެމެރިކާ ޑޮލަރަށް އެރީއެވެ. އެކުންފުނީގެ އަމާޒަކަށްވީ 250 މިލިއަން ޑޮލަރެވެ. ހިއްސާގެ ބާޒާރަށް ނިކުތުމުގެ ކުރިން 2021 ވަނަ އަހަރު ޕްރައިވެޓް އިންވެސްޓަރުންގެ އަތުން ފައިސާ ހޯދުމަށް އެކުންފުނިން ކުރިއަށްގެންދިޔަ ފަންޑިންގ ރައުންޑަށްފަހު ކުންފުނީގެ އަގު ބިލިއަން ޑޮލަރަކާއިވެސް ގާތްކުރިއެވެ.

މޮބިކްވިކްއަކީ މީގެ 15 ވަރަކަށް އަހަރު ކުރިން ގުރްގުރާމްގައި ފެށި ވިޔަފާރިއެކެވެ. 161 މިލިއަން މީހުން މޮބިކްވިކް ބޭނުންކުރާއިރު، އިންޑިއާގެ ޑިޖިޓަލް ޕޭމަންޓްސް ދާއިރާގެ ވާދަވެރިކަން ބޮޑުވެ، އެކުންފުންޏަށްވެސް ބޮޑެތި ގޮންޖެހުންތަކާ ކުރިމަތިވެފައިވެއެވެ. ވަކިން ޚާއްސަކޮށް، ޑިޖިޓަލް ޕޭމަންޓްސްގެ އެންމެ ބޮޑު ވާދަވެރިއަކީ އިންޑިއާ ސަރުކާރުން ހިންގާ ޔޫ.ޕީ.އައި ނިޒާމަށްވުމަކީވެސް އެކުންފުންޏަށް ގޮންޖެހުމެކެވެ. އެހެންނަމަވެސް ހިއްސާގެ ބާޒާރުގައި ލިސްޓްކުރުމުން އައި ރިއެކްޝަނަށް ބަލާއިރު، އިންވެސްޓަރުންގެ އިތުބާރު އަދިވެސް އެބައޮތްކަން ދޭހަވެއެވެ.

އިންޑިއާގެ ޑިޖިޓަލް ކުންފުނިތައް ހިއްސާގެ ބާޒާރަށް ނިކުމެ، ރަނގަޅު ނަތީޖާއެއް ދަނީ ހޯދަމުންނެވެ.