އިންތިހާބީ ކޮމިޓީން ފަލާހް އާއި މުއިއްޒު ބޭރުކުރަން އަލީ އާޒިމް އެދިއްޖެ

އަންނަ ލޯކަލް ކައުންސިލްތަކުގެ އިންތިހާބަށް އެމްޑީޕީން ބާއްވާ އެތެރޭގެ ޕްރައިމަރީއަށް އެކުލަވާލާފައިވާ ކޮމިޓީގައި ތިއްބަވާ ރައްޔިތުންގެ މަޖިލީހުގެ ކުރީގެ ދެ މެންބަރުން ކަމަށްވާ މުހައްމަދު ފަލާހް އާއި އިބްރާހީމް މުއިއްޒު ކޮމިޓީން ބޭރުކޮށްދިނުމަށް، އޭގެ މާލެ މޭޔަރު ޕްރައިމަރީގައި ވާދަކުރައްވާ ކުރީގެ މަޖިލިސް މެންބަރު އަލީ އާޒިމް މިއަދު އެދިވަޑައިގެންފިއެވެ.

އެމްޑީޕީގެ އިންތިހާބުތަކާއި ބެހޭ ގަވާއިދާ ހިލާފަށް ލޯކަލް ކައުންސިލް އިންތިހާބުގެ ޕްރައިމަރީ ކަންކަން އިންތިޒާމު ކުރުމާއި ޕާޓީގެ އަސާސީ ގަވާއިދާ ހިލާފަށް އިންތިހާބާ ބެހޭ ގަވާއިދަށް ބަދަލު ގެނެސްފައިވާކަން ފާހަގަކޮށް އަލީ އާޒިމް, އެ ޕާޓީގެ އިސްތިއުނާފް ފަނޑިޔާރުންގެ މަޖިލީހަށް ޝަކުވާގެ ދިގު ސިޓީއެއް ވަނީ ފޮނުވާފައެވެ.

އެ ސިޓީގައި އިްނތިހާބާ ގުޅިގެން ކަންބޮޑުވާ ގިނަ ކަންކަން ފާހަގަކޮށްފައިވާއިރު،  އޭގެ ތެރެއިން އެްްކަމެއްގެ ގޮތުގައި ފާހަގަ ކުރައްވާފައި ވަނީ މި އިންތިހާބުގެ ކަންކަން ބަލައި ވިލަރެސް ކުރުމަށް އެކުލަވާލާފައިވާ އިންތިހާބާ ބެހޭ ކޮމެޓީގައި މަސްލަހަތު ފުށުއަރާ މެންބަރުން ހިމެނުމެވެ.

އެގޮތުން ކޮމެޓީގެ މުގައްރިރު މުހައްމަދު ފަލާހް, އާދަމް އާޒިމްގެ ކެމްޕެއިންކޮށްދީ ޕާޓީގެ މެންބަރުންނަށް ފޯނުން ވާހަކަ ދައްކާ އާޒިމަށް ވޯޓް ދިނުމަށް އެދިފައުވާ ކަމަށް ސިޓީގައިވެއެވެ.

މީގެ އިތުރުން ކޮމެޓީގެ ހުރިހާ އިދާރީ މަސައްކަތް ކުރަމުން ގެންދާ ކޮމެޓީގެ ނާއިބު މުގައްރިރު އިބްރާހިމް މުޢިއްޒު ޕްރައިމަރީގެ ކަންކަން ހިންގުމަށް އިނުމަކީ ވަރަށް ބޮޑަށް މަސްލަހަތު ފުށުއަރާ ކަމެއް ކަމުގައި ވަނީ ފާހަގަކޮށްފަ އެވެ.

އެގޮތުން، މުއިއްޒު އާދަމް އާޒިމަށް ކެމްޕެއިން ކޮށްދިނުމަށް ސޯޝަލް މީޑިއާގައި މަސައްކަތް ކޮށްފައިވާ ކަމަށާ، އޭނާއަކީ އާޒިމްގެ މޭޔަރު ކަމުގައި މާލެ ސިޓީ ކައުންސިލްގެ ސުޕަވައިޒަރެއްގެ މަގާމަށް އައްޔަނުކޮށްފައިވާ މީހެއް ކަމަށްވެސް ބުނެފައިވެ އެވެ.

އެހެން ކަމުން އާދަމް އާޒިމަށް ރިޕޯޓް ކުރަން ޖެހޭ ވަޒީފާއެއްގައި ހުރި މީހަކަށް "ވަކި ފަރާތަކަށް ބުރަނުވެ" މަސައްކަތް ކުރުމަކީ ހަމަ ބުއްދިން ބަލާއިރުވެސް ކުރެވޭނެ ކަމެއް ކަމަށް ގަބޫލުނުކުރެވޭތީ ކޮމެޓީން ތަނާޒުލްވާން ޖެހޭ ކަަމަށް ދެކޭ ކަމަށް އާޒިމްގެ ސިޓީގައިވެ އެވެ.

އަލީ އާޒިމް އެދިވަޑައިގެންފައިވަނީ އެ ދެ ބޭފުޅުން ވެސް އިންތިހާބީ ކޮމިޓީން ތަނާޒުލް ނުވަތަ ދުރުވުމަށެވެ.

މީގެ އިތުރުން އިންތިހާބާ ބެހޭ ކޮމެޓީގެ މެންބަރު ޝާތިރު އަބްދުއްރަހްމާން އަކީ ވެސް އާދަމް އާޒިމަށް ތާއީދުކޮށް ވާހަކަ ދައްކަމުން އަންނަ މީހެއް ކަމުން އޭނާ އަކީވެސް ވަކި ފަރާތަކަށް ބުރަނުވެ އިންސާފުވެރިކަމާއެކު މަސައްކަތް ކުރެވިދާނެ މީހެއް ކަމުގައި ގަބޫލު ނުކުރެވޭ ކަމަށް ބަޔާން ކޮށްފައިވެ އެވެ.