މައްކާ ހިމެނޭހެން ސަޢޫދީ ޢަރަބިއްޔާގެ ހުޅަނގުގެ ސިޓީތަކަށް ނުރައްކަލުގެ އިންޒާރު ނެރެފި

ސަޢޫދީ ޢަރަބިއްޔާގެ ޖިއްދާ މައްކާ އަދި ޠާއިފަށް "ނުރައްކާ އެކަށީގެންވާ" ކަމަށް ލަފާކޮށް ކުއްލި އެލާޓެއް މިއަދު ނެރެ ރައްޔިތުން ރައްކާތެރި ތަންތަނުގައި ތިބުމަށް އެ ގައުމުގެ ކަމާ ގުޅޭ އިދާރާތަކުން އިލްތިމާސްކޮށްފި އެވެ.

ސައުދީ ސިވިލް ޑިފެންސް އިދާރާއިން ބުނި ގޮތުގައި މި އެލާޓް ފޮނުވީ ގައުމީ ކުއްލި ހާލަތުގެ އާލީ ވޯނިން ޕްލެޓްފޯމް މެދުވެރިކޮށެވެ. ނުރައްކަލުގެ ބާވަތެއް ކަމާ ބެހޭ ފަރާތްތަކުން ހާމަކޮށްފައެއް ނުވެ އެވެ.

ރައްޔިތުންނަށް އިރުޝާދު ދީފައިވަނީ ހާސްނުވެ ވީ އެންމެ އަވަހަކަށް ރައްކާތެރި ތަނަކަށް ދިޔުމަށެވެ. އެންމެ ރަނގަޅު ގޮތަކީ އިމާރާތެއްގެ އެތެރޭގައި ކުޑަދޮރުތަކާ ދުރު ކޮޓަރިއެއްގައި ނުރައްކާ ފިލައިދެންދެން ތިބުން ކަމަށް ސިވިލް ޑިފެންސުން ބުނެފައިވެ އެވެ. ހާމައަށް ހުރި ތަންތަނާއި ބެލްކަނީތަކާއި ފުރާޅު މަތީގައި ނުތިބުމަށް ވެސް އެ އިދާރާއިން އެންގި އެވެ. ބޭރުގައި ތިބި މީހުން ކައިރީގައި ހުރި އިމާރާތަކަށް ވަނުމަށް ނުވަތަ ވަރުގަދަ ހުރަހެއްގެ ފަހަތުގައި ތިބުމަށް އިރުޝާދު ދީފައިވެ އެވެ.

ވެހިކަލްގައި ދުއްވާ ފަރާތްތަކަށް އެންގީ ބްރިޖުތަކާއި އުސް އިމާރާތްތަކާ ދުރުގައި މަޑުކުރުމަށެވެ. ރައްޔިތުން އެއްވެ އުޅުމާއި ނުރައްކާ ސަރަހައްދުތަކުން ދުރުހެލިވެ ރަސްމީ ޗެނަލްތައް މެދުވެރިކޮށް ލިބޭ އިރުޝާދުތަކަށް ޢަމަލުކުރުމަށް ވެސް ގޮވައިލާފައިވެ އެވެ.

މި އެލާޓް ނެރެފައި މިވަނީ ސަޢޫދީ ޢަރަބިއްޔާ އާއި ޔަމަނުގެ ހޫތީ ޖަމާޢަތާ ދެމެދު ކުރިމަތިލުންތައް ވަރުގަދަވަމުންދާ ދަނޑިވަޅެއްގައެވެ. ފަހަކަށް އައިސް ހޫތީ ޖަމާޢަތުން ވަނީ ސަޢޫދީ ސިޓީތަކާއި ޢުމްރާނީ ވަސީލަތްތަކަށް މިސައިލާއި ޑްރޯން ހަމަލާތަކެއް ދީފައެވެ. ރައްދުގައި ސަޢޫދީ ލަޝްކަރުން ވަނީ ޔަމަނުގައި ހުރި ހޫތީ މަރުކަޒުތަކަށް ވައިގެ ހަމަލާތައް ދީފައެވެ.