ފަހަތުން އަރައި ޗެލްސީ ބަލިކޮށް އާސެނަލް ފެންވަރު ދައްކާލައިފި

އިނގިރޭސި ޕްރިމިއާ ލީގްގައި އާސެނަލް އާއި ޗެލްސީ ބައްދަލުކުރިމެޗް ފަހަތުން އަރައި އާސެނަލް ކާމިޔާބުކޮށްފިއެވެ.

އާސެނަލްގެ އެމިރޭޓްސް ސްޓޭޑިއަމްގައި ކުޅުނު މިމެޗް ޗެލްސީގެ މައްޗަށް އެޓީމުން ކުރި ހޯދީ 2-1 ގެ ނަތީޖާއިންނެވެ. މެޗްގައި އެންމެ ފުރަތަމަ ލަނޑެއް ޖަހައި ކުރި ހޯދީ ޗެލްސީ އެވެ. އެއީ މެޗް ފަށައިގެން 77 ވަނަ ސިކުންތުގެ ތެރޭގައި، މިފަހަރުގެ ސީޒަނަށް އާސެނަލުން ހޯދުމަށް މަސައްކަތް ކުރި މޯގަން ރޮޖާސް ކާމިޔާބުކޮށްދިން ލަނޑުންނެވެ.

ޗެލްސީން މެޗްގެ ކުރީކޮޅު ޖެހި މިލަނޑާއެކު އާސެނަލުން ވަނީ ކުޅުން ވަރުގަދަކޮށްފައެވެ. ނަތީޖާއަކަށް ވެގެންދިޔައީ 25 ވަނަ މިނެޓް ތެރޭގައި ކައި ހާވާޓްޒް ލަނޑެއް ޖަހައި މެޗް އެއްވަރުކުރުމެވެ. އާސެނަލުން މެޗް ކޮންޓްރޯލްކޮށްގެން ކުޅުނުނަމަވެސް ޗެލްސީން ވަނީ ލަނޑުޖަހާނެ ރަނގަޅު ފުރުސަތުތައް ހޯދާފައެވެ. މީގެ ތެރެއިން ރޮޖާސް ފޮނުވާލި ހަމަލާއެއް ގޯލާ އިންޗިއެއްހާ ބޭރުން ދިޔައިރު، ޕެޑްރޯ ނެޓޯ ފޮނުވާލި ހަމަލާ އަމާޒުވީ ގޯލުގެ ދަނޑިއަށެވެ.

މެޗްގައި އާސެނަލުން ލީޑް ނެގީ ދެވަނަ ހާފް ފަށައިގެން 50 ވަނަ މިނެޓް ތެރޭގައި މާޓިން އޮޑެގާޑް ޖަހައިދިން ލަނޑުންނެވެ. މި ލަނޑަކީ ކޮމިއުނިޓީ ޝީލްޑްގައި މެންޗެސްޓަރ ސިޓީ ކޮޅަށް އޭނާ ޖެހި ލަނޑާ ދާދި އެއްގޮތް ލަނޑެކެވެ. އަދި މިއީ އޭނާ މި ސީޒަނުގައި ޖެހި ތިންވަނަ ލަނޑެވެ. މެޗުގެ ފަހުކޮޅު ޗެލްސީން ފުރުސަތުތަކެއް ތަނަވަސްކުރި ނަމަވެސް، ތިންވަނަ ލަނޑެއް ޖެހުމާ ގާތަށް ދިޔައީ އާސެނަލްއެވެ. ބުކާޔޯ ސަކާ އާއި އެޒްރީ ކޮންސާ ފޮނުވާލި ނުރައްކާތެރި ހަމަލާތައް ޗެލްސީގެ ގޯލްކީޕަރު އެމިލިއާނޯ މާޓިނޭޒް ވަނީ ހުށިޔާރުކަމާއެކު ދިފާއުކޮށްފައެވެ. މެޗުގެ 89 ވަނަ މިނެޓުގައި ޗެލްސީގެ އެސްޓެވާއޯ ފޮނުވާލި ބާރު ހަމަލާ އާސެނަލްގެ ކީޕަރު ޑޭވިޑް ރާޔާ ވަނީ ހުއްޓުވާފައެވެ.

މި ނަތީޖާއާއެކު އާސެނަލް އުޅެނީ މެންޗެސްޓަރ ސިޓީއާއެކު ތާވަލްގެ އެންމެ ކުރީގައެވެ. އާސެނަލް އަދި ސިޓީ، މިއިން ކޮންމެ ޓީމަކުން 3 މެޗް ކުލެފައިވާއިރު، ދެޓީމަށްވެސް ލިބިފައިވަނީ 9 ޕޮއިންޓެވެ.