ވިނީގެ ހެޓްރިކާއެކު އޮސަސޫނާ އަތުން ރެއާލް މެޑްރިޑަށް ފަސޭހަ މޮޅެއް

ސްޕެނިޝް ލަލީގާގައި ހޮނިހިރު ދުވަހުގެ ރޭ އަމިއްލަ ދަނޑުގައި އޮސަސޫނާއި ދެކޮޅަށް ކުޅުނު މެޗު ފަސޭހަކަމާއެކު 4-0 ގެ ނަތީޖާއަކުން ރެއާލް މެޑްރިޑަ ކާމިޔާބުކޮށްފިއެވެ.

ލީގުގައި ރެއާލް މެޑްރިޑް އެންމެ ފަހުން ކުޅުނު މެޗުގައި ބާސެލޯނާ އަތުން 4-0 ގެ ނަތީޖާއަކުން ބަލިވެފައިވާއިރު، އޮސަސޫނާ އެންމެ ފަހުން ކުޅުނު މެޗުގައި އެޓީމުން ވަނީ 1-0 ގެ ނަތީޖާއަކުން ރެއާލް ވަލަޑޮލީޑް ބަލިކޮށްފައެވެ. އަދި މިދެޓީމު އެންމެ ފަހުން ކުޅުނު މެޗު 4-2 ގެ ނަތީޖާއަކުން ކާމިޔާބުކުރީ ރެއާލް މެޑްރިޑެވެ.

މިސީޒަނުގައި ރެއާލް މެޑްރިޑަށް އަނިޔާގެ ގިނަ މައްސަލަތަކާއި ކުރިމަތިލާން ޖެހިފައިވާއިރު، މިމެޗުގެ ފުރަތަމަ ހާފުގައި ރެއާލްގެ މުހިންމު ދެކުޅުންތެރިންކަމަށްވާ، ފޯވާޑް ރޮޑްރީގޯ އަދި ޑިފެންޑަރު މިލީޓޯއަށް އަނިޔާވެ ވަނީ ބަދަލުކުރަންޖެހިފައެވެ.

ނަމަވެސް މެޗުގެ ފުރަތަމަ ހާފު ރެއާލް މެޑްރިޑުން ދެލަނޑުގެ ލީޑަކާއެކު ނިންމާލިއިރު، ދެވަނަ ހާފުގައި އެޓީމުން ވަނީ އިތުރު ދެލަނޑު ކާމިޔާބުކޮށްފައެވެ. އެގޮތުން މިމެޗުގައި އެޓީމުގެ ބްރެޒިލް ފޯވާޑް ވިނީޝިއަސް ޖޫނިއަރ ތިން ލަނޑު ކާމިޔާބުކޮށް ހެޓްރިކް ހެދިއިރު، އެޓީމުގެ އަނެއް ލަނޑު ކާމިޔާބުކޮށްދިނީ އިގިރޭސި މިޑްފީލްޑަރު ޖޫޑް ބެލިންގްހަމް އެވެ.

މިނަތީޖައެކު ލީގުގައި ކުޅުނު 12 މެޗުން ރެއާލް މެޑްރިޑަށް 27 ޕޮއިންޓް ލިބިފައިވާއިރު، މިމެޗުން ބަލިވި އޮސަސޫނާއަށް ލީގުގައި ކުޅުނު 13 މެޗުން ލިބުނު 21 ޕޮއިންޓާއެކު އެޓީމު މިވަގުތު އޮތީ ލީގު ތާވަލުގެ ފަސް ވަނައިގައެވެ.