100 އަށްވުރެ ގިނަ އެތްލީޓުންނާއެކު މާސްޓަރސް އެތްލެޓިކްސް ޗެންޕިއަންޝިޕް މާދަމާ ފަށަނީ

މާސްޓަރސް އެތްލެޓިކްސް މޯލްޑިވްސްގެ ފަރާތުން އިންތިޒާމްކޮށް، ރާއްޖޭގައި ބާއްވާ ފުރަތަމަ "މާސްޓަރސް އެތްލެޓިކްސް ޗެންޕިއަންޝިޕް 2025" މާދަމާ ފެށުމަށް ތައްޔާރުވެއްޖެއެވެ.

މާސްޓަރސް އެތްލެޓިކްސް މޯލްޑިވްސްގެ ރައީސް އަލީ ރައީފް ވޮއިސް ސްޕޯޓްސްއަށް މައުލޫމާތު ދެއްވި ގޮތުގައި މިހާރު ކުރިއަށްދަނީ މުބާރާތުގެ އެންމެ ފަހުގެ ތައްޔާރީތަކެވެ. އަދި މުޅިން އަލައް ބާއްވާ މުބާރާތަކަށް ބަލާއިރު، އުންމީދުކުރި ވަރަށްވުރެ ބޮޑު ތަރުހީބެއް މުބާރާތައް ލިބެމުން އަންނަކަމަށެވެ.

އެގޮތުން މިއަހަރުގެ މުބާރާތުގައި 11 ޓީމަކުން 100 އަަށްވުރެ ގިނަ އެތްލީޓުން ބައިވެރިވެފައިވާއިރު، އޭގެ ތެރޭގައި ރާއްޖެއިން ބޭރުގެ ފަސް ގައުމެއްގެ އެތްލީޓުން ވެސް ހިމެނެއެވެ.

އިތުރަށް ވާހަކަދައްކަމުން ރައީފް ބުނީ މުބާރާތުގައި ވާދަކުރާ ރާއްޖެއިން ބޭރުގެ އެތްލީޓުންގެ ތެރޭގައި "ހަންގޭރީ، ފިންލޭންޑް، ބަންގްލަދޭޝް. އިންޑިޔާގެ އިތުރުން ސްރީލަންކާގެ މާސްޓަރސް އެތްލީޓުން ފެނިގެންދާނެ".

8 މެއި 2025 އިން 10 މެއި 2025 އަށް ކުރިއަށްދާ މިމުބާރާތުގެ ހުރިހާ އިވެންޓެއް ވެސް ކުރިއަށް ގެންދިއުމަށް ހަމަޖެހިފައިވަނީ ކޮންމެ ދުވަހެއްގެ ވެސް މެންދުރު ފަހު 16:00 އިން 18:00 މާލޭ ކުޅިވަރު އެކުވެނީ ސިންތެޓިކް ޓްރެކުގައެވެ.

ވޯލްޑް މާސްޓަރސް އެތްލެޓިކްސްގެ މިންގަނޑުތަކަށް ފެތޭގޮތައް ބާއްވާ މިމުބާރާތް މިއަހަރު ފަސް އުމުރުފުރައަކަށް ހުޅުވާލެވިފައިވާއިރު، އޭގެ ތެރޭގައި ހިމެނެނީ 35 އަހަރުން މަތި، 40 އަހަރުން މަތި، 45 އަހަރުން މަތި، 50 އަހަރުން މަތި އަދި 55 އަހަރުން މަތީގެ އުމުރުފުރައެވެ.

މީގެ އިތުރުން މިމުބާރާތުގައި ބޭއްވުމަށް ހަމަޖެހިފައިވާ އިވެންޓްތަކަކީ 100 މީޓަރު، 200 މީޓަރު، 1500 މީޓަރު، 5000 މީޓަރު، 10،000 މީޓަރު، 4×400 މީޓަރު (މިކްސް ރިލޭ)، 4×800 މީޓަރު (މިކްސް ރިލޭ)، ޝޮޓް ޕުޓް ތްރޯއިންގ، ޑިސްކަސް ތްރޯއިންގ އަދި ޖެވަލިންގ ތްރޯއިންގ އެވެ.