އިސްލާމްއާބާދަށް ދިން ހަމަލާ: ޕާކިސްތާނުގެ ތުހުމަތެއް އިންޑިއާއަށް

އިސްލާމްއާބާދަށް ދިން ނުރައްކާތެރި ހަމަލާގެ ފަހަތުގައި އިންޑިއާގެ ބައިވެރިވުން އޮތްކަމަށް ޕާކިސްތާނުން ތުހުމަތުކޮށްފިއެވެ.

އިސްލާމްއާބާދުގެ ކޯޓު އިމާރާތެއް ކައިރީ ދިން މި ހަމަލާގައި 12 މީހަކު މަރުވެފައިވާއިރު، 25 ހަށްވުރެ ގިނަ މީހުން ވަނީ ޒަހަމްވެފައެވެ. މީގެ ތެރޭގައި ސަލާމަތީ ބާރުތަކަށް ނިސްބަތްވާ 3 އޮފިސަރަކު ހިމެނޭކަމަށް ޕާކިސްތާނު ސަރުކާރުން ވަނީ ބުނެފައެވެ. މިއީ 2008 ވަނަ އަހަރަށްފަހު އިސްލާމްއާބާދުގައި ދިން ބޮންގޮއްވާލުމުގެ އެންމެ ވަރުގަދަ ހަމަލާއެވެ.

މިކަމާ ގުޅިގެން ޕާކިސްތާނުގެ ސަރުކާރުން ވަނީ ހަމަލާގެ ފަހަތުގައި އިންޑިއާގެ ބައިވެރިވުން އޮތްކަމަށް ތުހުމަތުކޮށްފައެވެ. ހަމަލާއާ ބެހޭގޮތުން ވާހަކަދައްކަވަމުން ޕާކިސްތާނުގެ ބޮޑުވަޒީރު ޝެހެބާޒް ޝަރީފް ވަނީ ހަމަލާ ދީފައިވަނީ އަފްޢާނިސްތާނަށް ނިސްބަތްވާ ޓެރަރިސްޓް ޖަމާއަތަކުންކަމަށާއި، އެމީހުންނަކީ އިންޑިއާގެ އެކި ފަރާތްތަކުގެ ތާއީދު އޮންނަ ބައެއްކަމަށެވެ. މިއީ އެފަރާތްތަކުން ހިންގާ ވަރަށް ބިރުވެރި އަމަލެއްކަމަށެވެ. ބޮޑުވަޒީރު ވިދާޅުވީ ބޭރުގެ ފަރާތްތަކާ ގުޅުން އޮންނަ ޓެރަރިސްޓް ޖަމާއަތްތައް ނައްތާލުމަކީ އެޤައުމުން ކުރާނެ ކަމެއްކަމަށާއި، އިސްލާމްއާބާދުގައި ދިން ހަމަލާއަކީ އެޤައުމުެގ މިނިވަންކަމަށް ދިން ހަމަލާއެއްކަމަށެވެ.

އަދި މި ހަމަލާތަކަކީ އަފްޢާނުގެ ފަސްގަނޑުގައި ރޭވިގެން ދިން ހަމަލާއެއްކަމަށްވެސް ބޮޑުވަޒީރު ވިދާޅުވިއެވެ. މިކަމުގައި އިންޑިއާ ސަރުކާރުގެ ބައިވެރިވުން އޮތްކަމަށް ވިދާޅުވެ ބޮޑުވަޒީރު ވަނީ ފެނިގެންމިދިޔައީ އިންޑިއާއިން ޓެރަރިސްޓުންނަށް ވާގިވެރިވާ މަންޒަރުކަމަށްވެސް ފާހަގަކުރެއްވިއެވެ.

ބެލެވޭގޮތުގައި ޕާކިސްތާނުގެ މި ތުހުމަތުތައް އިންޑިއާ ސަރުކާރަށް އަމާޒުކޮށްފައިމިވަނީ، މި ފަހަކަށް އައިސް އަފްޢާނިސްތާނުގެ ތާލިބާނުންނާއި އިންޑިއާ ސަރުކާރާ ދެމެދު ބަދަހިވަމުންދާ ގުޅުމުގެ ސަބަބުންނެވެ. އިންޑިއާ ސަރުކާރުން ވަނީ ދާދިފަހަކުން ތާލިބާނުންނަށް ގިނަ އަދަދެއްގެ ސިއްހީ އާލާތްތައް ހަދިޔާކޮށްފައެވެ.

އިސްލާމް އާބާދުގައި ދިން ޖާނުންފިދާވުމުގެ ބޮމުގެ ހަމަލާގެ ޒިންމާ ނަގާފައިވަނީ ޕާކިސްތާނުގެ ހަނގުރާމަވެރި ޖަމާއަތެއްކަމަށްވާ ޖަމާޢަތުލްއަޙްރާރު (ޖޫއާ) ނަމަކަށްކިޔާ ޖަމާއަތަކުންނެވެ. އެ ގްރޫޕަކީ ތާލިބާނުން ވާގިވެރިވާ ގްރޫއްޕެއްކަމަށް ޕާކިސްތާނު ސަރުކާރުން ފާހަގަކުރެއެވެ.

އިސްލާމްއާބާދަށް ބޮމުގެ ހަމަލާއެއް ދީފައިވާއިރު އިންޑިއާގެ ނިއުދިއްލީއަށްވެސް ވަނީ މި ފަހުން އެފަދަ ނުރައްކާތެރި ހަމަލާއެއް ދީފައެވެ. އެ ހަމަލާގައި 14 މީހަކު މަރުވެ އެތައް ބަޔަކަށްވަނީ ސީރިއަސް ޒަހަމްތަކެއް ލިބިފައެވެ.