މެޑްރިޑް އަލިފާނުގެ ހާދިސާގައި ގެއްލުންވި ފަރާތްތަކަށް މެސީގެ ފަރާތުން މާލީ އެހީއެއް

ސްޕެއިނުގެ ވެރިރަށް މެޑްރިޑު ކައިރީ އޮންނަ ޖަންގަލީގައި ރޯވެ ފެތުރުނު އަލިފާންގަނޑުގެ ސަބަބުން ގެއްލުން ލިބުނު ސަރަހައްދު އަލުން ބިނާކުރުމަށް ލިއޮނެލް މެސީގެ ފަރާތުން މާލީ އެހީތެރިކަން ފޯރުކޮށްދީފިއެވެ.

މެޑްރިޑްގެ ކޮމިޔުނިޓީގެ ރައީސާ އިޒަބެލް ޑިއާޒް އަޔޫސޯ ވަނީ މެސީގެ ފަރާތުން މާލީ އެހީ ލިބުނުކަން ކަށަވަރުކޮށްދީފައެވެ. އެކްސްގައި ކުރި ޕޯސްޓެއްގައި އޭނާ ވިދާޅުވެފައިވަނީ މެސީގެ ފަރާތުން 80،000 ޔޫރޯ ހަދިޔާކޮށްފައިވާކަމަށާއި އެކަން ޝުކުރުވެރިކަމާއެކު ބަލައިގަންނަ ކަމަށެވެ.

މެސީ އަކީ އިޖުތިމާޢީ ޚިދުމަތުގައި ފާހަގަކޮށްލެވޭ ޝަޚްޞިއްޔަތެކެވެ. ޞިއްޙީ ތަޢުލީމީ އަދި ކުޅިވަރުގެ ދާއިރާއިން ކުޑަކުދިންނާއި ޒުވާނުންނަށް އެހީތެރިވުމުގެ ބޭނުމުގައި 2007 ވަނަ އަހަރު އޭނާ ވަނީ ލިއޯ މެސީ ފައުންޑޭޝަން އުފައްދައިފައެވެ. މީގެ އިތުރުން މެސީއަކީ ޔުނިސެފްގެ އެމްބެސެޑަރެކެވެ.

ފުޓްބޯޅައިގައި މެސީ އާއި ސްޕެއިންގެ ވާދަވެރިކަން އޮތްނަމަވެސް މެސީއަކީ ސްޕެއިނާ ވަރަށް ގާތް ގުޅުމެއް އޮންނަ އެތްލީޓެކެވެ. މެސީގެ ހަޔާތުގެ ބޮޑުބައެއް އަދި އެންމެ މުހިންމު ދުވަސްތައް ހޭދަކޮށްފައިވަނީ ސްޕެއިންގައެވެ. މެސީ 20 އަހަރު ސްޕެއިންގައި ހޭދަކުރިއިރު، އޭނާގެ އަތުގައި ސްޕެއިންގެ ރައްޔިތުކަންވެސް އޮވެއެވެ.

މެޑްރިޑުގެ ހުޅަނގުގައި އޮންނަ ސިއެރާ އޮއެސްޓޭ ސަރަޙައްދުގައި ރޯވި އަލިފާނުގެ ސަބަބުން ބިންތަކާއި މުދަލަށް ވަރަށް ބޮޑެތި ގެއްލުންތައް ލިބި އެ ސަރަޙައްދުގައި ދިރިއުޅޭ ރައްޔިތުން ރައްކާތެރި ތަންތަނަށް ބަދަލުކުރަން ޖެހުނެވެ.

މެޑްރިޑްގެ ހުޅަނގުން އެތައް ހާސް ހެކްޓަރެއްގެ ބިމަށް ފެތުރިގެންދިޔަ އަލިފާނުގެ ހާދިސާތައް މިހާރު ވަނީ ކޮންޓްރޯލް ކުރެވިފައެވެ. އޮފިޝަލުން ބުނާގޮތުގައި މިދިޔަ ޖުލައިމަހުގެ ފަހުކޮޅު ތިން ސަރަހައްދެއްގައި ރޯވި ބޮޑު އަލިފާންގަނޑު އެކުވެގެން އުފެދުނު މި އަލިފާންގަނޑަކީ މެޑްރިޑްގެ ތާރީޚުގައި ކުރިމަތިވި އެންމެ ނުރައްކާތެރި އަލިފާނުގެ ކާރިސާ އެވެ. މިކަމާ ގުޅިގެން ސްޕެއިންގެ ސަރުކާރުން ވަނީ ގައުމީ ފެންވަރުގެ ކުއްލި ނުރައްކަލުގެ ހާލަތު އިއުލާންކޮށް، އެ ސަރަހައްދަކީ ކާރިސާގެ ސަރަހައްދެއްގެ ގޮތުގައި ކަނޑައަޅާފައެވެ.

އަލިފާނުގެ މި ހާދިސާގައި ގާތްގަނޑަކަށް 34,000 ހެކްޓަރުގެ ބޮޑު ސަރަހައްދެއް ވަނީ އަނދާ އަޅިއަށް ވެފައެވެ