އާސެނަލް 20 އަހަރަށްފަހު ޔުއެފާ ޗެމްޕިއަންސްލީގް ފައިނަލަށް ދަތުރުކޮށްފި

އެތްލެޓިކޯ މެޑްރިޑް ބަލިކުރުމަށްފަހު އާސެނަލުން 20 އަހަރަށްފަހު ފުރަތަމަ ފަހަރަށް ޔުއެފާ ޗެމްޕިއަންސްލީގް ފައިނަލުގެ ޖާގައެއް ހޯދައިފިއެވެ.

އާސެނަލުން ޗެމްޕިއަންސްލީގް ފައިނަލަށް ދަތުރުކޮށްފައިވަނީ މިރޭ އަމިއްލަ ދަނޑުގައި ސްޕެއިންގެ އެތްލެޓިކޯ މެޑްރިޑާ ދެކޮޅަށް ކުޅުނުމެޗް 0-1 ގެ ނަތީޖާއަކުން ކާމިޔާބުކޮށް ދެމެޗްގެ ޖުމްލަ ނަތީޖާ 1-2 ކުން ކުރި ހޯދައިގެންނެވެ. އެތްލެޓިކޯ މެޑްރިޑްގެ ދަނޑުގައި ކުޅުނު ސެމީފައިނަލުގެ ފުރަތަމަ ލެގްގެ މެޗް ނިމުނީ 1-1 ގެ ނަތީޖާއަކުން ދެޓީމް އެއްވަރުވެގެންނެވެ.

އެމިރޭޓްސް ސްޓޭޑިއަމްގައި ކުޅުނު މިމެޗްގައި ފެނިގެންދިޔަ ހަމައެކަނި ލަނޑު، ކާމިޔާބުކޮށްދިނީ ފުރަތަމަ ހާފް ނިމެން އުޅެނިކޮށް ބުކާޔޯ ސާކާ އެވެ. މިމެޗްގެ ފުރަތަމަ ހާފްގައި އާސެނަލްގެ ފަރާތުން މޮޅު ކުޅުމެއް ފެނިގެންދިޔައިރު، އެޓީމުން ވަނީ ލަނޑުޖަހާގެ ރަނގަޅު ފުރުސަތުތައް ހޯދާފައެވެ. މެޗްގައި އެތްލެޓިކޯ މެޑްރިޑަށްވެސް ލަނޑު ޖަހާނެ ފުރުސަތުތައް ލިބުނެވެ. ނަމަވެސް މިމެޗްގައި އާސެނަލްގެ ޑިފެންސް ލައިނުން ވަނީ އެތްލެޓިކޯ މެޑްރިޑްގެ ފޯވަޑްލައިންގެ ރޭވުންތައް ނާކާމިޔާބުކޮށްލާފައެވެ.

އާސެނަލުން އެންމެފަހުން ޗެމްޕިއަންސްލީގް ފައިނަލުގައި ކުޅެފައިވަނީ މީގެ 20 އަހަރުކުރިން 2006 ވަނަ އަހަރެވެ. އާސެނަލް ފައިނަލަށް ދިޔައީ ކުއާޓާ ފައިނަލުގައި ޔުވެންޓަސް އަދި ކޮންއައުޓް ބުރުގައި ވަރުގަދަ ރެއާލް މެޑްރިޑް ބަލިކުރުމަށްފަހުގައެވެ.

ނޯވޭގައި ކުޅުނު ޗެމްޕިއަންސްލީގް ފައިނަލް އެ މެޗްގައި އެންމެ ފުރަތަމަ ލަނޑެއް ޖަހައި ކުރި ހޯދީވެސް އާސެނަލުންނެވެ. ނަމަވެސް ބާސެލޯނާއިން ވަނީ ފަހަތުން އަރައި ދެ ލަނޑު ޖަހައި ޗެމްޕިއަންސްލީގް ތަށި ގެންގޮސްފައެވެ.

މިފަހަރުގެ ޗެމްޕިއަންސްލީގް ފައިނަލުގައި އާސެނަލް ކުޅޭނޭ ޓީމެއް ކަނޑައެޅިގެންދާނީ ސެމީފައިނަލްގެ ދެވަނަ މެޗްގައި މާދަމާ ރޭ ފްރާންސްގެ ޕީއެސްޖީ އާއި ޖަރުމަނުވިލާތުގެ ބަޔާން މިއުނިކް ބައްދަލުކުރާ މެޗަށްފަހުއެވެ. މި ދެޓީމް ކުޅުނު ސެމީގެ ފުރަތަމަ މެޗް 4-5 ގެ ނަތީޖާއަކުން ކާމިޔާބުކޮށްފައިވަނީ ޕީއެސްޖީއެވެ.