ބަޖެޓް 2019: ހެނދުނުގެ ނާސްތާއާއި އެކު އާ ސަރުކާރުގެ ތައުލީމީ ނިޒާމު މެކުހަށް!

ކުރިއަށް އޮތް 2019 ވަނަ އަހަރަށް ލަފާކުރެވޭ ދައުލަތުގެ 29.6 ބިލިޔަން ރުފިޔާގެ ބަޖެޓުގައި، ކޮންމެ ކުއްޖަކަށް ހެނދުނުގެ ނާސްތާ ދިނުމަށް ފައިސާ ކަނޑައަޅައިފިއެވެ.

މިއަދު މަޖިލީހުގެ ތަޅުމަށް ހުށައެޅުނު ބަޖެޓްގައިވާގޮތުން ކޮންމެ ކުއްޖަކަށް ހެނދުނުގެ ނާސްތާ ދިނުމަށް 50 މިލިޔަން ރުފިޔާާވަނީ ކަނޑައަޅާފައެވެ. ހެނދުނުގެ ނާސްތާ ކިޔަވާ ކުދިންނަށް ސަރުކާރުގެ އެހީގައި ފޯރުކޮށްދިނުމަކީ އިންތިހާބީ ރައީސް އިބްރާހިމް މުހައްމަދު ސޯލިހުގެ ކެމްޕެއިންގައި ވެވަޑައިގެންނެވި ވަރަށް މުހިންމު ވައުދެކެވެ.

މިފަހަރުގެ ބަޖެޓްގައި ތައުލީމީ ނިޒާމަށް ޖުމްލަ 3.2 ބިލިއަން ރުފިޔާ ކަނޑައަޅާފައިވެއެވެ. މީގެ ތެރޭގައި ގިނަ ތައުލީމީ ނިޒާމުގެ ވަސީލަތްތައް އިތުރުކޮށް، ހަރުދަނާ ކުރުމުގެ މަޝްރޫއުތައްވެސް ފާހަގަކޮށްލެވެއެވެ.

އެގޮތުން ބަލާލާއިރު ސްކޫލް ޑިޖިޓަލައިޒޭޝަން ޕްރޮޖެކްޓްއަށް 86 މިލިޔަން ރުފިޔާ ހޭދަކުރުމަށް ވަނީ ހަމަޖެހިފައެވެ. އަދި އެހެންމެ އާ ސަރުކާރުގެ ފުރަތަމަ އަހަރު ރަށްރަށުގައި ގާއިމްކުރެވިފައިވާ ސްކޫލްތަކާއި ކްލާސްރޫމްތައް އިތުރުކޮށް، ތަރައްގީކުރުމަށް ބަޖެޓުންވަނީ 84 މިލިއަން ރުފިޔާާ ކަނޑައަޅާފައެވެ.

މާލޭ ސަރަހައްދުގައި ކުރިއަށް ގެންދިއުމަށް ނިންމާފައިވާ ސްކޫލް މަދަރުސާތަކުގެ މަޝްރޫއުތަކަށް ބަލާލާއިރު، ސީއެޗްއެސްސީގައި އަށް ފަންގިފިލާގެ އާ އިމާރާތަކާއި، ހުޅުމާލޭގައި އާ ސްކޫލެއް އެޅުމަށް ވަނީ ބަޖެޓްގައި ހިމެނިފައެވެ.

މަތީ ތައުލީމުގެ ނިޒާމްއަށްވެސް އާ ސަރުކާރުގައި ބޮޑު ހޭދައެއް ކުރުމަށް ވަނީ ބަޖެޓްކުރެވިފައެވެ. އެގޮތުން މޯލްޑިވްސް ނޭޝަނަލް ޔުނިވަރސިޓީގެ މެޑިކަލް ސްކޫލެއް ގާއިމްކުރުމަށް 39 މިލިއަން ރުފިޔާ އަދި ފުރަތަމަ ޑިގްރީއާއި ހިލޭ ހަމައަށް ކިޔެވުމުގެ ފުރުސަތު ދިނުމަށް 50 މިލިއަން ރުފިޔާ ވަނީ ކަނޑައަޅާފައެވެ. ހިލޭ ކިޔެވުމުގެ ފުރުސަތު ދިނުމަކީ އިބޫ ސަރުކާރުގެ ވައުދެކެވެ.

އަދި އެއާއި އެކު ރައީސުލްޖުމްހޫރިއްޔާގެ ސްކޮލަރޝިޕްގެ ސްކީމްގެ ދަށުން އޭލެވެލްގައި އެއްވަނަ ލިބޭ ހުރިހާ ދަރިވަރުންނަށް ބޭނުން ގައުމަކުން ހިލޭ ކިޔެވުމުގެ ފުރުސަތު ދިނުމަށްވެސް ވަނީ ނިންމާފައެވެ. އަދި އަންނަ އަހަރު 60 އެމްބީބީއެސް ޑޮކްޓަރުންނަށް އަދި 25 ސްޕެޝަލިސްޓް ޑޮކްޓަރުންނަށް ކިޔެވުމަށް ޓިއުޝަން ފީ ދިނުމަށްވެސް ވަނީ ހަމަޖެހިފައެވެ.

3.2 ބިލިއަން ރުފިޔާގެ ބަޖެޓަކާއި އެކު އަންނަ އަހަރަށް ތައުލީމީ ނިޒާމް ތައްޔާރުވަމުންދާ އިރު، ރިކަރެންޓް ހަރަދަކީ 2.9 ބިލިއަން ރުފިޔާއެވެ. މީގެ ތެރެއިން 69% ހަރަދުކުރުމަށް ހަމަޖެހިފައިވަނީ މުވައްޒަފުންގެ މުސާރައާއި ޕެންޝަަން އަށެވެ. ބާކީ ހަރަދުތައް ކަނޑައެޅިފައިވަނީ ހިންގުމަށާއި ސްކޮލަރޝިޕާއި ތަމްރީނަށެވެ.