އެސްޓީއޯގެ ހިއްސާއަކަށް 80 ރުފިޔާ ބަހަން ފާސްކޮށްފި

އެސްޓީއޯގެ ކޮންމެ ހިއްސާއަކަށް 80 ރުފިޔާ ބަހަން ފާސްކޮށްފިއެވެ

އެސްޓީއޯއިން މިފަދައިން ފާސްކުރީ ހުޅުލޭގައި ހުންނަ ނޫވިލު ސީޕްލޭން ޓާމިނަލްގައި ރޭ ބޭއްވި އެ ކުންފުނީގެ މިދިޔަ އަހަރުގެ އަހަރީ އާންމު ޖަލްސާގައި ބައިވެރިވި  189 ހިއްސާދާރުންގެ ތެރެއިން 99 އިންސައްތަ ވޯޓުންނެވެ.

އެސްޓީއޯ އިން ބުނި ގޮތުގައި މިއީ އެކުންފުނިން ފާއިތުވި 17 އަހަރުގެ ތެރޭގައި ހިއްސާގެ ފައިދާގެ ގޮތުގައި ބަހަން ނިންމި އެންމެ ބޮޑު އަދަދެކެވެ.

އެސްޓީއޯއަށް މިދިޔަ އަހަރު އާމްދަނީގެ ގޮތުގައި 16.4 ބިލިއަން ރުފިޔާ ލިބިފައިވާއިރު، އޭގެ ކުރީ އަހަރު ވަނީ  18.2 ބިލިއަން ރުފިޔާގެ އާމްދަނީއެއް ލިބިފައެވެ.

ހަމައެއާއިއެކު، މިދިޔަ އަހަރު ޖުމްލަ ފައިދާގެ ގޮތުގައި 3 ބިލިއަން ރުފިޔާ ލިބިފައިވާއިރު، ހިންގުމުގެ ފައިދާ ގޮތުގައި 1.3 ބިލިއަން ރުފިޔާ އެސްޓީއޯއިން ވަނީ ހޯދާފައެވެ. އޭގެ ކުރީއަހަރު މި އަދަދު އުޅެނީ 1 ބިލިއަން ރުފިޔާގައެވެ.

މީގެން ޓެކްސް ކެނޑުމަށްފަހު ސާފު ފައިދާގެ ގޮތުގައި އެސްޓީއޯއަށް  818 މިލިއަން ރުފިޔާ ވަނީ ލިބިފައެވެ. މިއީ އެސްޓީއޯގެ ތާރީހުގައިވެސް ރެކޯޑް އަދަދެއްކަން ފާހަގަކޮށްލަން ޖެހެއެވެ.