ޕެންޝަން އޮފީހުގެ ތްރީ ޖެނެރޭޝަން ވޯކް މިފަހަރު ހަނިމާދޫގައި ބާއްވަނީ
ތިން ޖީލުގެ ޢާއިލީ މެންބަރުން އެކުގައި ބައިވެރިކޮށްގެން ޕެންޝަން އޮފީހުން ކޮންމެ އަހަރަކު ކުރިއަށް ގެންދާ "ތްރީ ޖެނެރޭޝަން ވޯކް" ގެ ހަތަރުވަނަ ބުރު 17 އޮކްޓޫބަރު 2026 ގައި ހދ. ހަނިމާދޫގައި ބާއްވާ ގޮތަށް ހަމަޖައްސައިފިއެވެ.
މި ހިނގާލުމަކީ ކުޑަކުދިންނާއި ބޮޑެތި މީހުންނާއި ދޮށީ ޢުމުރުގެ މީހުން ޝާމިލުވާ ގޮތަށް ރޭވިފައިވާ އެއް ކިލޯމީޓަރުގެ ރަމްޒީ ހިނގާލުމެކެވެ. ފަހަށް ފައިސާ ރައްކާކުރުމާއި އިންވެސްޓް ކުރުމާއި ރިޓަޔަމަންޓަށް ތައްޔާރުވުމުގެ މުހިންމުކަމާ މެދު ހޭލުންތެރިކަން އުފެއްދުމަކީ މި ހަރަކާތުގެ މައިގަނޑު އެއް ބޭނުމެވެ.
މާލީ ރައްކާތެރިކަމަކީ ވަކި ޢުމުރެއްގެ ބައެއްގެ އެކަނި ޒިންމާއެއް ނޫން ކަމާއި، ޅަ ދުވަހުން ފެށިގެން ދޮށީ ޢުމުރާ ހަމައަށް ދެމިގެންދާ ދަތުރެއް ކަން ބައިވެރިންނަށް ހަނދާންކޮށްދިނުމަކީ މި ހިނގާލުން ރަމްޒުކޮށްދޭ ކަމެކެވެ.
ހިނގާލުމުގެ ފަހުން ހުރިހާ ޢުމުރެއްގެ ބައިވެރިންނަށް ބައިވެރިވެވޭ ގޮތަށް ޢާއިލީ ހަވީރެއް ވެސް ކުރިއަށް ގެންދާނެއެވެ. އެ ހަވީރުގައި ތަފާތު ކުޅިވަރުތަކާއި، ދިވެހި ސަގާފަތާއި، އާދަކާދަ ދައްކުވައިދޭ ހަރަކާތްތަކާއި، މަޢުލޫމާތު ފޯރުކޮށްދޭ ސްޓޯލްތަކާއި، ފުޑް ކޯޓެއް ހިމެނޭ ކަމަށް ޕެންޝަން އޮފީހުން ބުނެފައިވެއެވެ.
ތިން ޖީލުގެ ޢާއިލީ ގުޅުން ބަދަހިކޮށް އުފާވެރި މާޙައުލެއްގައި އެކުގައި ވަގުތު ހޭދަކުރުމުގެ ފުރުޞަތު ޢާއިލާތަކަށް ހުޅުވައިލުމަކީ މި ހަރަކާތުގެ އެންމެ މުހިންމު އެއް މަޤުޞަދެވެ.
ރަނގަޅު މާލީ އާދަތައް ޢާއިލާ ތެރެއިން އަށަގެންނެވުމަށް ޕެންޝަން އޮފީހުން ހިންގާ މެދުކެނޑުމެއް ނެތް މަސައްކަތްތަކުގެ ތެރެއިން ހަރަކާތެއްގެ ގޮތުގައި މި ހިނގާލުން ކޮންމެ އަހަރަކު ވެސް ކުރިއަށް ގެންދެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
