ސެމީކޮންޑަކްޓަރ އުފެއްދުމުގެ އެންމެ ކުރިއަށް އިންޑިއާ އަންނަނީ

އިންޑިއާގައި ހުރި ހުނަރުވެރި މަސައްކަތްތެރިންނާއި، ފުޅާވަމުން އަންނަ ސިނާއީ ނިޒާމުގެ އެހީގައި 2032 ވަނަ އަހަރާ ހަމައަށް ދުނިޔޭގައި ސެމީކޮންޑަކްޓަރ އުފައްދާ އެންމެ ބޮޑު ހަތަރު ޤައުމުގެ ތެރޭގައި އިންޑިއާ ހިމެނޭނެ ކަމަށް އެ ޤައުމުގެ އިލެކްޓްރޯނިކްސް އެންޑް އައިޓީ މިނިސްޓަރު އަޝްވިނީ ވައިޝްނޯ ވިދާޅުވެއްޖެއެވެ.

ހުކުރު ދުވަހު ވާހަކަދައްކަވަމުން މިނިސްޓަރ އަޝްވިނީ ވިދާޅުވީ އިންޑިއާގެ އަމާޒަކީ 2035 ވަނަ އަހަރާ ހަމައަށް ސެމީކޮންޑަކްޓަރ އުފެއްދުމުގައި ދުނިޔޭގެ އެންމެ ކުރީގައި އުޅޭ ޤައުމަށް ވުން ކަމަށެވެ.

އިންޑިއާ ސަރުކާރުގެ އިލެކްޓްރޯނިކްސް ކޮމްޕޯނަންޓް މެނުފެކްޗަރިންގ ސްކީމްގެ ދަށުން 41,863 ކްރޯޑް ރުޕީސްގެ 22 މަޝްރޫއެއް ފާސްކޮށްފައިވާކަން އިޢުލާން ކުރައްވަމުން މިނިސްޓަރު ވިދާޅުވީ، 2026 ވަނަ އަހަރުގެ ތެރޭގައި އިންޑިއާގެ ހަތަރު ކުންފުންޏަކުން ވިޔަފާރީގެ އުސޫލުން ޗިޕް އުފައްދަން ފަށާނެ ކަމަށެވެ. މި އުފެއްދުންތަކަށް އޮޓޯމޮބައިލް އަދި ޓެލެކޮމް ދާއިރާގެ ބޮޑެތި ކުންފުނިތަކުން ދަނީ އިންތިޒާރު ކުރަމުންނެވެ.

މި ޕްރޮގްރާމްގެ ދަށުން ސަރުކާރުން ވަނީ 1.6 ލައްކަ ކްރޯޑް ރުޕީސްގެ އިންވެސްޓްމަންޓާއެކު އުފެއްދުންތެރިކަމުގެ 10 ޔުނިޓާއި، 2 ފެބްރިކޭޝަން ޕްލާންޓާއި، 8 އެސެމްބްލީ ޔުނިޓެއް ފާސްކޮށްފައެވެ. މީގެ ތެރެއިން މިދިޔަ އަހަރު މަސައްކަތް ފެށި 'ކޭންސް' އަދި 'ސީޖީ ސެމީ' ގެ ޕްލާންޓްތަކަކީ އެންމެ ފުރަތަމަ ވިޔަފާރީގެ އުސޫލުން އުފެއްދުންތައް ނެރޭނެ ތަންތަނެވެ. މީގެ އިތުރުން އިންޑިއާގެ ޗިޕް ޑިޒައިން ކުރުމުގެ ގާބިލްކަން ވެސް ދަނީ ވަރަށް ބޮޑަށް އިތުރުވަމުންނެވެ.

މިނިސްޓަރު އަޝްވިނީ ފާހަގަކުރެއްވި ގޮތުގައި، މި ކުރިއެރުމުގެ އަސްލަކީ އިންޑިއާގެ ޒުވާނުންގެ ހުނަރެވެ. މިހާރުވެސް އިންޑިއާގެ 298 ޔުނިވަރސިޓީއެއްގައި ޗިޕް ޑިޒައިން ކުރަން ދަސްކޮށްދެމުންދާކަން އޭނާ ފާހަގަކުރެއްވިއެވެ. މި ހުނަރުވެރިކަމާއި، ބޮޑެތި އިންވެސްޓްމަންޓްތަކުގެ ސަބަބުން ދުނިޔޭގެ ސެމީކޮންޑަކްޓަރ ސިނާއަތުގައި އިންޑިއާ މުހިންމު ދައުރެއް އަދާކުރާނެ ކަމަށް ވަޒީރު ވިދާޅުވިއެވެ.