ރޮނާލްޑޯގެ 2 ލަނޑާއެކު އަލް-ނަޞްރުން އަލް-ޙަޒަމް ބަލިކޮށް ތާވަލުގެ އެއްވަނައަށް

ސައުދީ ޕްރޯ ލީގުގައި ރޭ ކުޅުނު މެޗުގައި އަލް-ޙަޒަމްގެ މައްޗަށް 4-0 ގެ ނަތީޖާއަކުން ކުރިހޯދައި، އަލް-ނަޞްރުން ތާވަލުގެ އެއްވަނަ މަގާމަށް ޖެހިލައިފިއެވެ.

މި މެޗު ފެށުނީއްސުރެ އަލް-ނަޞްރުން ވަނީ ކުޅުން ކޮންޓްރޯލްކޮށް، ގިނަ ފުރުސަތުތަކެއް ތަނަވަސްކޮށްފައެވެ. އަދި މި މެޗުގައި ކްރިސްޓިއާނޯ ރޮނާލްޑޯ ވަނީ އެ ޓީމަށް 2 ލަނޑު ކާމިޔާބުކޮށްދީފައެވެ.

މެޗުގެ ފުރަތަމަ ލަނޑު ރޮނާލްޑޯ ކާމިޔާބުކޮށްފައިވަނީ 13 ވަނަ މިނެޓުގައެވެ. ދެވަނަ ލަނޑު 30 ވަނަ މިނެޓް ތެރޭގައި ކޯމަން ކާމިޔާބުކޮށްދިންއިރު، މެޗްގެ ތިންވަނަ ލަނޑު ޖަހާފައިވަނީ ފަހު ހާފްގެ 77 ވަނަ މިނެޓް ތެރޭގައި އެންޖެލޯ ގެބްރިއެލް އެވެ.

މެޗްގައި ރޮނާލްޑޯގެ ދެވަނަ ލަނޑު ޖަހާފައިވަނީ 79 ވަނަ މިނެޓް ތެރޭގައި ކޯމަން ތަނަވަސްކޮށްދިން ފުރުސަތެއްގައެވެ.

މި މޮޅާއެކު އަލް ނަސްރު ތާވަލުގެ އެއްވަނައިގައި އޮތީ ކުޅުނު 22 މެޗުން ލިބުނު 55 ޕޮއިންޓާއެކުއެވެ. އެޓީމާ ޖެހިގެން ތާވަލުގެ ދެވަނައިގައި އަލް ހިލާލް އޮތީ 54 ޕޮއިންޓާއެކުއެވެ.