ޓްރާންސްޕޯޓް މިނިސްޓްރީގެ އޮޑިޓެއް ހަދަން ފަށައިފި!

ޓްރާންސްޕޯޓް މިނިސްޓްރީގެ އޮޑިޓެއް ހަދަން ފަށާފައިވާ ކަމަށް ދަތުރުފަތުރާ މަދަނީ އުދުހުންތަކާ ބެހޭ ވަޒީރު މުހައްމަދު އަމީން ވިދާޅުވެއްޖެއެވެ.

ދަތުރުފަތުރާ މަދަނީ އުދުހުންތަކާ ބެހޭ ވުޒާރާއިން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އަމީން ވިދާޅުވީ، ޓްރާންސްޕޯޓް މިނިސްޓްރީގެ ޚިދުމަތްތައް މިހާރު އޮންލައިން ކުރެވިފައިވާ ނަމަވެސް، އެކަމަށްޓަކައި ބޭނުން ކުރަމުންދަނީ ޒަމާނަށް ނުފެތޭ، ވަރަށް 'މުސްކުޅި' ސޮފްޓްވެއަރ އެއް ކަމަށެވެ.

އަދި ސްފްޓްވެއާގެ 'ބެކްއެންޑަށް' ވަދެ 'ގޯސްތަކެއް' ހިންގަމުންދާ ކަމަށްވެސް ޝައްކު ކުރެވޭ ކަން އަމީން ފާހަގަކުރެއްވި އެވެ.

"މިނިސްޓްރީގައި ބޭނުން ކުރަމުންދަނީ ވަރަށް ދުވަސްވީ އަދި ޒަމާނަށް ނުފެތޭ މެޓްރިކްސް ސޮފްޓްވެއާ ސިސްޓަމްތަކެއް. އެހެންވީމަ މުޅި ނިޒާމު އަޅުގަނޑުމެން ސޭފްޓީ ރަނގަޅުކުރުމަށްޓަކައި ކުރަންޖެހޭ ކަމެއްގެ ގޮތުގައި. އަޅުގަނޑުމެންނަށް ކޮންމެވެސް ވަރަކަށް ޝައްކު ކުރެވޭ މެޓްރިކްސްގެ ބެކްއެންޑަށް ވަދެގެން ގޯސްތަކެއް ހިންގާކަން."

ދަތުރުފަތުރާ މަދަނީ އުދުހުންތަކާ ބެހޭ ވަޒީރު މުހައްމަދު އަމީން

އެހެންކަމުން އެކަން ކަން ރަނގަޅު ކުރުމަށް، ޓްރާސްޕޯޓް މިނިސްޓްރީގެ އޮޑިޓެއް ހަދަން މިހާރު ފަށާފައިވާ ކަމަށް އަމިން ވިދާޅުވިއެވެ.

އެކަންކަން (ބެކްއެންޑަށް ވަދެގެން ހިންގާ ގޯސްތައް) ރަނގަޅު ކުރުމަށްޓަކައި، އަޅުގަނޑުމެން އެންމެ ފުރަތަމަ، މިނިސްޓްރީގެ އޮޑިޓެއް މިހާރު ފަށްޓާފައި އޮންނާނީ. މިނިސްޓްރީގެ ވަރަށް ކޮންޕްރެހެންސިވް އޮޑިޓެއް ހަދަންޖެހޭ ސަބަބަކީ އަޅުގަނޑުމެންނަށް ބައިވަރު މައްސަލަތައް ފެށިގެންދާއިރު، ޚާއްސަކޮށް އެއްގަމު ވެހިކަލް ތައް، އާދަޔާ ޚިލާފް ބޮޑު އަދަދަކަށް ރެޖިސްޓްރީވެ، އަދި ޑޮމެއިންގެ މައްސަލަތައް ހައްލުނުވެ، އެކަންވެސް ހުއްޓާލެވުފައި މިހާރު އޮތީ.

ދަތުރުފަތުރާ މަދަނީ އުދުހުންތަކާ ބެހޭ ވަޒީރު މުހައްމަދު އަމީން

މީގެ އިތުރުން އަމީން ވިދާޅުވީ މިހާތަނަށް ބެލި ބެލުމުން މިނިސްޓްރީގެ ސޮފްޓްވެއާ ބެކްއެންޑަށް ވަދެ ވަގު ލައިސަންސް ހަދާފައި ހުރިކަން ފާހަގަކުރެވޭ ކަމަށެވެ.

"މެޓްރިކްސް ނިޒާމުގެ ބެކްއެންޑަށް ވަދެގެން ކްރިއޭޓްކޮށްފައި ހުރި ލައިސަންސް ތަކެއްގެ ޑީޓެއިލްސްތަކެއް މިހާރުވެސް ފެންނަން އެބަހުރި. އެއީ ކިހާވަރަކަށްތޯ ވަދެވިފަ ހުރީވެސް އަޅުގަނޑުމެންނަށް ބެލޭނެ. އެހެންވީމަ ފޮރެންސިކް އެނަލައިސިސް އާ އޮޑިޓާއެކީގައި މިދަނީ."

ދަތުރުފަތުރާ މަދަނީ އުދުހުންތަކާ ބެހޭ ވަޒީރު މުހައްމަދު އަމީން

މިއަދުގެ ނޫސްވެރިންގެ ބައްދަލުވުމުގައި އަމީން ވަނީ، ޓްރާންސްޕޯޓް މިނިސްޓްރީގެ ހުރިހާ ޚިދުމަތެއް އެއް ޕޯޓަލް އަކުން ދެވޭނެ އިންތިޒާމު ހަމަޖައްސަވަން ނިންމަވާފައިވާ ކަން އިއުލާން ކުރައްވާފައެވެ.