ޔުއެފާ ޗެމްޕިއަންސްލީގް؛ ރޭ ކުޅުނުމެޗްތަކުން އިނގިރޭސި ޓީމްތައް މޮޅުވެއްޖެ

ޔުއެފާ ޗެމްޕިއަންސްލީގް ލީގް ބުރުގައި ރޭ އިނގިރޭސި ޓީމްތައް ކުޅުނު މެޗްތައް އެޓީމްތަކުން ކާމިޔާބުކޮށްފިއެވެ.

ޗެމްޕިއަންސް ލީގްގައި އިނގިރޭސިވިލާތުގެ ލިވަޕޫލާއި ފްރާންސްގެ މާސޭ ބައްދަލުކުރިމެޗް ލިވަޕޫލް ކާމިޔާބުކޮށް އެޓީމުން ވަނީ އަނެއް ބުރުގެ ފުރުސަތު ބޮޑުކޮށްފައެވެ.

މާސޭގެ ދަނޑުގައި ކުޅުނު މިމެޗް ލިވަޕޫލް ކާމިޔާބުކުރީ 0-3 ގެ ނަތީޖާ އަކުންނެވެ. މެޗް ފަށައިގެން 23 ވަނަ މިނެޓް ތެރޭގައި ލިވަޕޫލްގެ އެކިޓީކޭ ލަނޑެއް ކާމިޔާބުކުރި ނަމަވެސް ރެފްރީ ނިންމާފައިވަނީ އޮފްލައިޑް ލަނޑެއްގެ ގޮތުގައެވެ.

ފޯރިގަދަ ކުޅުމެއް ފެނިގެންދިޔަ މިމެޗްގައި ލިވަޕޫލަށް ގޯލް ހުޅުވާލަދިނީ ފުރަތަމަ ހާފްގެ އިތުރުވަގުތުގެ ކުޅުމުގެ ތެރޭގައި ސޮބޮޒްލާއީ އެވެ. މެޗްގައި ލިވަޕޫލްގެ ދެވަނަ ލަނދަކީ މާސޭގެ ކުޅުންތެރިއެއްގެ އަތުން ބައިކޮޅަށްވަތް ލަނޑެކެވެ. ލިވަޕޫލްގެ ތިންވަނަ ލަނޑު ޖަހައިދިނީ ދެވަނަ ހާފްގެ އިތުރު ވަގުތުގެ ކުޅުމުގެ ތެރޭގައި ގަކްޕޯއެވެ.

ރޭގެ މެޗްގައި އެންމެ ފާހަގަވެގެން ދިޔައީ ފުރަތަމަ އެގާރާގައި ހިމެނިގެން ލިވަޕޫލްގެ ފޯވަޑް ސަލާހް ކުޅެން ނިކުތުމެވެ. މެޗުން ލިބުނު ތިން ޕޮއިންޓާއެކު ލިވަޕޫލަށް ވަނީ އަނެއްބުރުގެ ޖާގައެއް ހޯދުމުގެ ފުރުސަތު ބޮޑުވެފައެވެ.

ޗެމްޕިއަންސްލީގްގައި ރޭ ޗެލްސީ އާއި ޕަފޮސް ބައްދަލުކުރިމެޗް 0-1 ގެ ނަތީޖާއަކުން ކާމިޔާބުކުރީ ޗެލްސީއެވެ. މެޗްގައި ފެނިގެންދިޔަ ހަމައެކަނި ލަނޑު ޗެލްސިއަށް ޖަހައިދިނީ ކެއިސޭޑޯ އެވެ.

ޗެމްޕިއަންސްލީގްގައި ރޭ އިނގިރޭސި ޓީމްތަކުގެ ތެރެއިން ނިއުކާސަލް ޔުނައިޓެޑުންވެސް ވަނީ އެޓީމް ކުޅުނުމެޗް ކާމިޔާބުކޮށްފައެވެ. ހޮލެންޑްގެ ޕީއެސްވިއާ ދެކޮޅަށް ކުޅުނު މިމެޗް ނިއުކާސަލް ކާމިޔާބުކުރީ 3-0 ގެ ނަތީޖާއަކުންނެވެ.

ޗެމްޕިއަންސްލީގްގައި މިހަފްތާ ކުޅުނު މެޗްތަކަށްފަހު ކުރިއަށްއޮތް ބުރުގެ ޖާގައެއް ކަށަވަރުކުރި ހަމައެކަނި ޓީމަކީ އިނގިރޭސި ކްލަބް އާސެނަލްއެވެ.