މެންޗެސްޓަރ ޔުނައިޓެޑާއި ޕީއެސްޖީ ބައްދަލުކުރިމެޗް އެއްވަރު

ކުރިއަށްއޮތް ސީޒަނަށް ތައްޔާރުވުމުގެ ގޮތުން އިނގިރޭސިވިލާތުގެ މެންޗެސްޓަރ ޔުނައިޓެޑާއި ފަރަންސޭސިވިލާތުގެ ޕީއެސްޖީ ބައްދަލުކުރިމެޗް އެއްވަރުވެގެން ނިމިއްޖެއެވެ.

ސްވީޑެންގެ ގޮތެންބާގްގައި ކުޅުނު މިމެޗް ނިމުނީ 1-1 ގެ ނަތީޖާއިންނެވެ. ޕީއެސްޖީގެ ގިނަ ތަރިންތަކެއް ނެތި ކުޅުނު ނަމަވެސް މެޗްގައި އެންމެ ފުރަތަމަ ލަނޑެއް ޖަހައި ކުރި ހޯދީ އެޓީމުންނެވެ. އެއީ ލިވަޕޫލުން ޝައުގުވެރިކަން ފާޅުކުރަމުން އަންނަ އިބްރަހީމް އެމްބާއޭ އެވެ. އޭނާ މި ލަނޑު ޖަހާފައިވަނީ މެޗް ފެށިގެން ދެވަނަ މިނެޓް ތެރޭގައެވެ.

މެޗްގައި ޔުނައިޓެޑަށް ގޯލް ޖަހައިދިނީ އެމްނިއުމޯ އެވެ. އޭނާ ވަނީ މިދިޔަ ހަފްތާގައި ސްޓޮކްހޯމްގައި އެތުލެޓިކޯ މެޑްރިޑް އަތުން ޔުނައިޓެޑް މޮޅުވި މެޗުގައިވެސް ޔުނައިޓެޑަށް ދެ ލަނޑު ކާމިޔާބުކޮށްދީފައެވެ. މި ލަނޑު ޖެހުމުގައި އަމަދު ޑިއާލޯ ދެއްކި ހުށިޔާރު ކުޅުން ފާހަގަކޮށްލެވެއެވެ.

މި ސީޒަނުގައި އެސްޓަން ވިލާ ދޫކޮށް ޔުނައިޓެޑާ ގުޅުނު ޔޫރީ ޓީލެމަންސް، އެ ޓީމަށް ކުޅެދިން ފުރަތަމަ މެޗުގައި އުންމީދީ ކުޅުމެއް ދެއްކިއިރު، މެޗުގެ ކުރީކޮޅު މޭސަން މައުންޓަށް އަނިޔާވެގެން ދަނޑުން ބާލަން ޖެހުމަކީ ޓީމަށް ލިބުނު ބޮޑު ކަންބޮޑުވުމެކެވެ.

މެޗްގައި ޔުނައިޓެޑަށް ލިބުނު ކަންބޮޑުވުމެއް ކަމުގައި ފާހަގަވީ ކީޕަރު ޓޮމް ހީޓަންގެ ފައިގެ ފަސްމަސްގަނޑަށް ލިބުނު އަނިޔާއެވެ. އެ އަނިޔާގެ ސީރިއަސް ކަމުން ހީޓަން ބަދަލުކޮށް އޭނާގެ ބަދަލުގައި ފުރަތަމަ ފަހަރަށް ޓީމަށް ކުޅެން ނުކުތީ 23 އަހަރުގެ ޑާމޮޓް މީއެވެ.