"މޯލްޑިވްސް އޯޕަން 2024" ގައި ވާދަކުރާ ގައުމީ ބިލިއާޑް ޓީމުގެ ކުޅުންތެރިންނާއި ޖޯޒީ ހަވާލުކޮށްފި

މޯލްޑިވްސް ޕޫލް ބިލިއާޑް އެސޯސިއޭޝަން (އެމްޕީބީއޭ) އިން އިންތިޒާމުކޮށް ރާއްޖޭގައި ބާއްވާ "މޯލްޑިވްސް އޯޕަން 2024 -10 ބޯލް ޗެމްޕިއަންޝިޕް" ވާދަކުރާ ގައުމީ ބިލިއާޑް ޓީމުގެ ކުޅުންތެރިންނާއި ޖާޒީ ހަވާލުކޮށްފިއެވެ.

ގައުމީ ބިލިއާޑް ސެންޓަރުގައި ރޭ ބޭއްވި ޖާޒީ ހަވާލުކުރުމުގެ ރަސްމިއްޔާތުގައި ގައުމީ ޓީމުގެ ކުޅުންތެރިންނާއި ޖާޒީ ހަވާލުކޮށްދެއްވީ ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢުއެވެ.

މާދަމާ އިން ފެށިގެން މިމަހުގެ 30 ގެ ނިޔަލަށް މާލެ ސިޓީގައި ކުރިއަށް ގެންދިއުމަށް ހަމަޖެހިފައިވާ މި މުބާރާތުގައި ޖުމްލަ 96 ކުޅުންތެރިން ވަނީ ބައިވެރިވެފައެވެ. އެގޮތުން މިމުބާރާތުގެ އެކި ކެޓަގަރީތަކުގައި ބައިނަލްއަގުވާމީ 80 ކުޅުންތެރިންނާއެކު ދިވެހި 16 ކުޅުންތެރިއަކު ވާދަކުރުމަށް ވަނީ ހަމަޖެހިފައެވެ.

މީގެއިތުރުން މިއަހަރުގެ މުބާރާތަގައި ދުނިޔޭގެ ޗެންޕިއަންކަން ހޯދާފައިވާ ފަސް ކުޅުންތެރިއަކު ވާދަކުރާއިރު ދުނިޔޭގެ ރޭންކިންގެ އެންމެ ކުރީގައި އުޅޭ ކުޅުންތެރިންނާއެކު، އޭޝިއާގެ އެންމެ މޮޅު ކުޅުންތެރިން ވެސް މި އަހަރުގެ މުބާރާތުން ފެނިގެންދާނެއެވެ. އަދި ޔޫރަޕުގެ ކުޅުންތެރިން ހިމެނޭހެން މި މުބާރާތުގައި 25 ގައުމެއްގެ ކުޅުންތެރިން ވާދަކުރާނެއެވެ.

މިއީ މޯލްޑިވްސް އޯޕަން ބިލިއާޑް މުބާރާތް ރާއްޖޭގައި ބާއްވާ ދެވަނަ އަހަރެވެ. އެގޮތުން މިދިޔަ އަހަރު ބޭއްވި މުބާރާތުގައި 24 ގައުމަކުން 64 ކުޅުންތެރިން ވަނީ ވާދަކޮށްފައެވެ. އެ މުބާރާތް ފަސް ދުވަހުގެ މުއްދަތަކަށް ކުރިޔަށްދިޔައިރު، ސޯޝަލް މީޑިއާއިން ފަސް މިލިޔަނަށް ވުރެ ގިނަ މީހުން މުބާރާތް ބަލާފައިވާ ކަމަށް އެމްޕީބީއޭއިން މައުލޫމާތުދެއެވެ.

ރާއްޖޭގެ ކުޅިވަރުގެ ތާރީޚުގައި ބޭއްވި ފުރަތަމަ ބައިނަލްއަގުވާމީ ބިލިއާޑް މުބާރާތުގެ ގޮތުގައި މިދިޔަ އަހަރުގެ މުބާރާތް ފާހަގަކޮށްލެވުނުއިރު، އެ މުބާރާތުގެ ޗެމްޕިއަންކަން ހޯދީ ޗައިނީސް ޓައިޕޭގެ ކޯ ޕިން ޗަންގްއެވެ. އޭނާ ޗެމްޕިއަންކަން ހޯދީ ފައިނަލް މެޗުގައި ފިލިޕީންސްގެ ޔޯހަން ޗުއާއާ ވާދަކޮށް 10-8 ފްރޭމުން މެޗު ކާމިޔާބުކޮށްގެންނެވެ.

މީގެ އިތުރުން އެ މުބާރާތުގެ ގަދަ 32 ކުޅުންތެރިން ތެރޭގައި ރާއްޖޭގެ އެއްވަނަ ކުޅުންތެރިޔާ ހަސަން ޝާޒް މުޙައްމަދު ވަނީ ހިމެނިފައެވެ. މިއީ ރާއްޖޭގެ ބިލިއާޑުގެ ތާރީޚުގައި މިހާތަނަށް ލިބުނު އެންމެ ބޮޑު އެއް ކާމިޔާބީއެވެ.