ބަލްގޭރިއާ ބަލިކޮށް ސްޕެއިން ވޯލްޑްކަޕް ކޮލިފައިންގް ފެށީ އިތުބާރާއެކު

ވޯލްޑްކަޕް ކޮލިފައިން ގުރޫޕް އީގައި ރޭ ރަށުން ބޭރިގައި 3-0 ގެ ނަތީޖާއަކުން ބަލްގޭރިއާ ބަލިކޮށް ސްޕެއިނުން ކޮލިފައިންގެ ފެށުން ރަނގަޅުކޮށްފިއެވެ.

މިގުރޫޕްގައި ރޭ ކުޅުނު ދެވަނަ މެޗުގައި ތުރުކީ އިން ވަނީ ވާދަވެރި ކުޅުމަކަށްފަހު 3-2 ގެ ނަތީޖާއަކުން ޖޯޖިއާ ބަލިކޮށްފައެވެ. މިނަތީޖާތަކާއެކު ގުރޫޕްގެ އެއްވަނައިގައި ލަނޑުގެ ތަފާތުން ސްޕެއިން އޮތްއިރު، ދެވަނައިގައި އޮތީ ތުރުކީ އެވެ. އަދި ތިންވަނައިގައި ޖޯޖިއާ އޮތްއިރު، ގުރޫޕްގެ ފުލުގައި މިވަގުތު އޮތީ ބަލްގޭރިއާ އެވެ.

ސްޕެއިން އެންމެ ފަހުން ކުޅުނު ޔުއެފާ ނޭޝަންސް ލީގު ފައިނަލުގައި ޕޯޗުގަލް އާއި ވާދަކޮށް 2-2 ގެ މަތީޖާއަކުން އެއްވަރުވެ ނަތީޖާނެރުމަށް ޖެހި ޕެނަލްޓީގައި 5-3 ގެ ނަތީޖާއަކުން ބަލިވެފައިވާއިރު، ބަލްގޭރިއާ އިން އެންމެ ފަހުން ކުޅުނު މެޗުގައި ގްރީސް އަތުން އެޓީމު ބަލިވީ 4-0 ގެ ނަތީޖާއަކުންނެވެ. އަދި މިދެޓީމު އެންމެ ފަހުން ވާދަކޮށްފައި ވަނީ 2002 ވަނަ އަހަރުއެވެ. އެމެޗު 1-0 ގެ ނަތީޖާއަކުން ކާމިޔާބުކުރީ ސްޕެއިން އެވެ.

މެޗުގެ ފުރަތަމަ ހާފުގައި މޮޅަށް ކުޅެ ސްޕެއިން މެޗު ޑޮމިނޭޓްކުރިއިރު، އެޓީމުން ލީޑުހޯދި ލަނޑު މެޗު ފެށިގެން ފަސްވަނަ މިނެޓުގައި ކާމިޔާބުކޮށްދިނީ ރެއާލް ސޮސިއެޑާޑްގެ ފޯވާޑް މިކޭލް އޮޔެޒެބެލް އެވެ. މިއީ އެޓީމުގެ އާސެނަލް މިޑްފީލްޑަރު މާޓިން ޒުބިމެންޑީ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ސްޕެއިންގެ ދެވަނަ ލަނޑު ފުރަތަމަ ހާފުގެ 30 ވަނަ މިނެޓުގައި އެޓީމުގެ ޗެލްސީ ޑިފެންޑަރު މާކް ކުކުރެލާ ކާމިޔާބުކުރިއިރު، އެޓީމުގެ ތިންވަނަ ލަނޑު އޭގެ އަށް މިނެޓް ފަހުން ކާމިޔާބުކޮށްދިނީ އެޓީމުގެ އާސެނަލް މިޑްފީލްޑަރު މިކޭލް މެރީނޯ އެވެ. އަދި މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 3-0 ގެ ނަތީޖާއަކުން ސްޕެއިން ކުރީގައި އޮވެގެންނެވެ.

މެޗުގެ ދެވަނަ ހާފުގައި ބަލްގޭރިއާ އިން އެޓީމުގެ ކުޅުން ރަނގަޅުކޮށް ޑިފެންސް އިތުރަށް ވަރުގަދަކުރިއިރު، މިހާފުގައި އެޓީމުން ވަނީ ސްޕެއިންގެ އެޓޭކުތައް ހުއްޓުވުމުގައި ރޭވުންތެރިކަމާއެކު މޮޅު ޑިފެންސިވް ކުޅުމެއް ދައްކައިދީފައެވެ.