ޕާކިސްތާން: އަސްކަރިއްޔާއަށް ބާރުތަކެއް ދީ، ކޯޓުތަކުން ބާރުތަކެއް ނަގައިފި

ޕާކިސްތާނުގެ އަސްކަރިއްޔާގެ ވެރިޔާއަށް އިތުރު ބާރުތަކެއް ދީ، ސުޕްރީމް ކޯޓުގެ ބާރުތަކެއް ހަނިކުރާ އިސްލާހެއް އެގައުމުގެ ޤާނޫނު އަސާސީއަށް ގެނެއްސިއެވެ.

ޑިމޮކްރަސީއަށް މަސައްކަތްކުރާ ފަރާތްތަކުން ސިފަކުރާ ގޮތުގައި މިއީ ޑިކޮމްރަސީގައި ޕާކިސްތާނުން ފަހަތަށް އެޅި ފިޔަވަޅެކެވެ. އަދި ޒަމާންތަކަކަށް ދިގުދެމިގެންދާނެ ގެއްލުންތަކެއް މީގެ ސަބަބުން ލިބޭނެއެވެ. ޕާކިސްތާނުގެ ޤާނޫނު ހަދާ މަޖިލީހުގެ މަތީގެއިން މި ހަފްތާގެ ކުރީކޮޅު މި އިސްލާހު ފާސްކޮށްފައިވާއިރު، ގާނޫނު އަސާސީއަށް ގެނައި އިސްލާހު މަޖިލީހުގެ ތިރީގެއިން އިއްޔެ ވަނީ ފާސްކޮށްފައެވެ. ތިރީގެއިން މި އިސްލާހް ފާސްކުރުމަށް ތިން ބައިކުޅަ ދެ ބައި ވޯޓު ލިބުނެވެ. އިސްލާހާއި ދެކޮޅަށް ވޯޓު ދިނީ އެންމެ 4 މެމްބަރުންނެވެ. އާއްމު އުސޫލެއްގެ ގޮތުން ގާނޫނު އަސާސީ އިސްލާހްކުރުމަކީ މަސްތަކެއް ނަގާ، ބޮޑެތި ބަހުސްތަކެއް ހިނގާ ކަމެއްނަމަވެސް، މިފަހަރުގެ އިސްލާހު ފާސްކުރުން ދިޔައީ ވަރަށް ހަލުވިކޮށެވެ.

ޕާކިސްތާނުގެ ގާނޫނު އަސާސީއަށް ގެނައި އިސްލާހާއެކު، އާމީގެ ވެރިޔާ ބަދަލުވެގެންދާނީ ޗީފް އޮފް ޑިފެންސް ފޯސަސް އަށެވެ. މިއީ އަލަށް އުފައްދާ މަގާމެކެވެ. އަދި އާ އިސްލާޙާއެކު އުމުރު ދުވަހަށް އަސްކަރީ ރޭންކް އޮވެ، ރިޓަޔަރ ކުރިޔަސް އަސްކަރިއްޔާގައި ކުރި ކަމަކަށް އޭނާގެ މައްޗަށް ދައުވާއެއް ނުއުފުލޭނެއެވެ.

ގާނޫނު އަސާސީއަށް ގެނައި އިސްލާޙާއެކު ޕާކިސްތާނުގައި ފެޑެރަލް ކޮންސްޓިޓިއުޝަނަލް ކޯޓެއް އުފެދިގެންދާނެއެވެ. ސުޕްރީމްކޯޓުން މީގެ ކުރިން ބަލަމުން އައި ދުސްތޫރީ މައްސަލަތައް ދެން ބަލާނީ، އަލަށް އުފެދޭ ދުސްތޫރީ ކޯޓުންނެވެ. މި ކޯޓުގައި ތިބޭނީ ސަރުކާރުން އައްޔަންކުރާ ފަނޑިޔާރުންނެވެ. މީގެ ކުރީގައި ޕާކިސްތާނުގެ ސަރުކާރުން ނުވަތަ އަސްކަރިއްޔާއިން ގާނޫނު އަސާސީއާއި ޚިލާފަށް ކުރާ ބައެއް ކަންކަން ސުޕްރީމް ކޯޓުން ހުއްޓުވާފައި އެބަހުއްޓެވެ. އެހެންނަމަވެސް އެމަގު ދެން ބަންދުވީއެވެ.

މި އިސްލާހުތަކާއި ދެކޮޅަށް އިދިކޮޅު ލީޑަރު އިމްރާން ޚާންގެ ތެހެރިކޭ އިންސާފް ޕާޓީއިން އިހްތިޖާޖުކޮށް، މަޖިލީސް ދޫކޮށްވެސް ނިކުތެވެ.