އަންހެނަކު، އޭނާގެ ދަރިންގެ ކުރިމަތީގައި ރޭޕްކުރި ދެ މީހަކު މަރަން ޕާކިސްތާނު ހައިކޯޓުން ހުކުމް ކޮށްފި

ޕާކިސްތާނުގެ ޕަންޖާބު ޕްރޮވިންސްގެ ލާހޫރު-ސިއާލްކޮޓް މޮޓޯވޭގައި، ތިން ދަރިންގެ ކުރިމަތީގައި ފްރެންޗް އަންހެނަކު ރޭޕްކުރި މައްސަލައިގައި ކުށް ސާބިތުވި ދެ މީހުންގެ މަރުގެ ހުކުމް ލާހޫރުގެ ހައިކޯޓުން ބުދަ ދުވަހު ދަމަހައްޓައިފިއެވެ.

މި މައްސަލައިގައި މަރުގެ އަދަބު އިއްވާފައިވާ ދެ މީހުން ކަމަށްވާ އާބިދު އަލީ އާއި ޝަފްގަތު އަލީ ވަނީ ދަށު ކޯޓުގެ ހުކުމް އިސްތިއުނާފު ކޮށްފައެވެ.

ނަމަވެސް، ލާހޫރު ހައިކޯޓުގެ ފަނޑިޔާރު ސައްޔިދު ޝަހުބާޒް އަލީ ރިޒްވީ އަދި ފަނޑިޔާރު ތާރިގު މަހްމޫދު ބަޖްވާ ހިމެނޭ ބެންޗުން ވަނީ އެ ދެ މީހުންގެ އިސްތިއުނާފީ މައްސަލަ ބޭރުކޮށްލައި، ދަށު ކޯޓުގެ ހުކުމަށް ތާއީދުކޮށްފައެވެ.

މި ހިތާމަވެރި ހާދިސާ ހިނގާފައިވަނީ ސެޕްޓެމްބަރު 2020 ގައެވެ. އުމުރުން 32 އަހަރުގެ، ޕާކިސްތާނު ދަރިކޮޅުގެ މި ފްރެންޗް އަންހެންމީހާ އޭނާގެ ތިން ދަރިންނާއެކު ދަތުރުކުރަމުން ދަނިކޮށް، ލާހޫރު ކައިރިން ކާރުގެ ތެޔޮ ހުސްވެގެން މަގުމަތީގައި މަޑުކޮށްގެން އިންދާ، ހަތިޔާރާއެކު ދެ މީހަކު އައިސް ކާރުގެ ބިއްލޫރިތައް ތަޅާލައިގެން އެތެރެއަށް ވަދެ، އާއިލާގެ އަތުން ފޭރުނެވެ. އޭގެފަހުން، އެތަނުގެ ކައިރީގައި އޮތް ދަނޑަކަށް ގެންގޮސް، އޭނާގެ ތިން ދަރިންގެ ކުރިމަތީގައި ބިރުދައްކައި ރޭޕްކުރި ކަމަށް ތަހުގީގަށް ވަނީ އެނގިފައެވެ.

މި މައްސަލައާ ގުޅިގެން ޕާކިސްތާނުގެ އެކި ކަންކޮޅުތަކުގައި ބޮޑެތި މުޒާހަރާތަކެއް ކޮށް، އިންސާފަށް ގޮވާލާފައިވެއެވެ.

އަދި ޕަންޖާބު ފުލުހުންގެ އިސް އޮފިސަރެއް ކަމަށްވާ އުމަރު ޝެއިޚް، "އަންހެނުން އެކަނި ދަންވަރު ބޭރުގައި އުޅުމަކީ މުޖުތަމައު ގަބޫލުކުރާ ކަމެއް ނޫން" ކަމަށް ބުނެ، ޝިކާރައަކަށްވި އަންހެންމީހާ ކުށްވެރިކޮށް ދެއްކި ވާހަކަތަކާ ގުޅިގެން އާންމުންގެ ނުރުހުން އިންތިހާއަށް އަމާޒުވިއެވެ. މުޒާހަރާގެ ބައިވެރިން ވަނީ އޭނާ މަގާމުން ވަކިކުރުމަށް ވެސް އޭރު ގޮވާލާފައެވެ.

2021 ވަނަ އަހަރުގެ މާރިޗު މަހު، ލާހޫރުގެ އެންޓި-ޓެރަރިޒަމް ކޯޓުން ވަނީ މި ދެ މީހުންގެ މައްޗަށް ކުށް ސާބިތުވާ ކަމަށް ނިންމައި، މަރުގެ އަދަބުގެ އިތުރުން އުމުރަށް ޖަލަށްލުމަށާއި އިތުރު އަދަބުތަކެއް ވެސް ހުކުމްކޮށްފައެވެ.