މަޖިލިސް އިންތިހާބަށް ކުރިމަތިލުމަށް އެދޭ ފޯމު މިއަދު އާންމު ކުރަނީ

އަންނަ މާރޗު މަހުގެ 17 ގައި ބޭއްވުމަށް ހަމަޖެހިފައިވާ 20 ވަނަ ރައްޔިތުންގެ މަޖިލީހުގެ އިންތިހާބަށް ކުރިމަތިލުމަށް އެދޭ ފަރާތްތަކަށް ފަސޭހަކުރުމުގެ ގޮތުން އިންތިހާބަށް ކުރިމަތިލުމަށް އެދޭ ފޯމު ސެޓު މިއަދު އާންމުކުރަން އިލެކްޝަންސް ކޮމިޝަނުން ނިންމައިފިއެވެ.

މިކަން ހާމަ ކުރައްވާފައި ވަނީ އިލެކްޝަންސް ކޮމިޝަން އީސީގެ ނައިބު ރައީސް އިސްމާއިލް ހަބީބު މިއަދު އެކްސްގައި ކުރެއްވި ޕޯސްޓެއްގައެވެ.

ހަބީބުގެ އެ ޕޯސްޓްގައި ވިދާޅުވެފައި ވަނީ، ރައްޔިތުންގެ މަޖިލީހުގެ އިންތިހާބަށް ކުރިމަތިލުމަށް އެދޭ މީހާ ފުރިހަމަ ކުރަންޖެހޭ ކުށާއި، ދަރަނީގެ ރެކޯޑަކީ މިދިޔަ ޑިސެމްބަރު މަހުގެ 14 ގެ ފަހުން ޑީޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނުންނާއި، މޯލްޑިވްސް ކަރެކްޝަނަލް ސާރވިސަސް އިން ފުރިހަމަކޮށްފައިވާ ރެކޯޑަކަށް ވާންޖެހޭނެ ކަމަށެވެ.

އޭގެ އިތުރުން ހަބީބުގެ ޕޯސްޓުގައި ވިދާޅުވެފައިވަނީ ، މޯލްޑިވްސް ކަރެކްޝަން އިން ފުރިހަމަކޮށްފައިވާ ރެކޯޑެއް ނަމަ އެ ތާރީހުން ފެށިގެން ސާފުކޮށްފައިހުރި ރެކޯޑުތައް ބަލައިގަންނަ ގޮތަށް ހަމަޖެއްސުމާއެކު، އިންތިހާބަށް ހާއްސަކޮށްގެން ހުޅުވާ އާ ބޭންކް އެކައުންޓް ހުޅުވުމުގެ ފުރުސަތު ދުރާލާ ދިނުމަށްޓަކައި އެކަމަށް ބޭނުންވާ ލިޔުންތައް ފޯމު ސެޓާއެކު އާންމުކުރާ ގޮތަށްވެސް ކޮމިޝަނުން މިއަދު ނިންމާފައިވާ ކަމަށެވެ.

" އެޕްލިކޭޝަން ފޯމު އިލެކްޝަންސް ކޮމިޝަނަށް ބަލައިގަންނާނީ 2024 ޖެނުއަރީ 30 ވަނަ ދުވަހު ކޮމިޝަނުން ކުރާ އިޢުލާނުގައިވާ މުއްދަތުގެ ތެރޭގައި." ހަބީބުގެ ޕޯސްޓް ނިންމާ ލައްވަމުން ވިދާޅުވެފައިވެއެވެ.

އިލެކްޝަންސް ކޮމިޝަނުން މިއަދު މިގޮތައް ނިންމެވިއިރު ރާއްޖޭގެ ސިޔާސީ ޕާރޓީތަކުން މަޖިލިހަށް ކުރިމަތިލާނެ ފަރާތްތައް ކަނޑައެޅުމަށް އެ ޕާރޓީތަކުން ބާއްވާ ޕްރައިމަރީތައް ބާއްވާނެ ތާރީޙްތައް މިހާރުވަނީ އިޢުލާން ކުރައްވާފައެވެ. އެގޮތުން ޕީޕީއެމް/ޕީއެންސީގެ ޕްރައިމަރީ މިމަހުގެ 27 ގައި ބޭއްވުމަށް ހަމަޖެހިފައިވާ އިރު އެމްޑީޕީގެ ޕްރައިމަރީ ބޭއްވުމަށް ހަމަޖެހިފައިވަނީ އަންނަމަހުގެ 3 ގައެވެ.

‏