ހަ ރަށެއްގައި ރީތި މިސްކިތްތަކެއް، ރޯދައިގެ ފަހުން މަސައްކަތް ފަށަނީ

ހަ ރަށެއްގައި ރީތި މިސްކިތްތަކެއް އެޅުމަށް ހާއްސަ މަޝްރޫއުއެއް ވަރަށް އަވަހަށް ފައްޓަވާނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ވިދާޅުވެއްޖެ އެވެ.

މިނިސްޓަރު ވިދާޅުވި ގޮތުގައި މި މިސްކިތްތައް ބިނާ ކުރަނީ އއ. ރަސްދޫ އާއި އދ. ފެންފުއްޓާއި ފ. ފީއަލީ އާއި ގދ. މަޑަވެއްޔާއި ހއ ބާރަށުގެ އިތުރުން ތ. ވޭމަންޑޫ ގަ އެވެ. އަލަށް އިމާރާތްކުރޭ މި މިސްކިތްތަށް ނިމޭއިރު، ސޯލާއާއި އޭސީ ވެސް ހަރުކުރެވި، ނެވިލޯން ވެސް އަޅާނެ ކަމަށް ވިދާޅުވި އެވެ.

އަދި ވިދާޅުވީ މިސްކިތްތަށް ޑިޒައިން ކުރެވިފައިވާނީ ކޮންމެ މިސްކިތެއްގައި ވެސް ގުރުއާން ކިޔަވައިދެވޭ ގޮތަށް ކްލާސް ރޫމާއެކު ކަމަށެވެ. މި މަޝްރޫއުތަކަކީ ސަރުކާރުގެ ހަރަދުގައި ކުރިއަށް ގެންދެވޭ މަޝްރޫއުތަކެއް ކަމަށް ވެސް ވިދާޅުވި އެވެ.

އަދި ވިދާޅުވީ މަޝްރޫއުތަކުގެ މަސައްކަތް ރޯދަމަސް ފަހުން ފެށިގެންދާނެ ކަމަށެވެ.

މިނިސްޓަރު ވަނީ މިސްކިތްތައް ހުންނާނެ ގޮތުގެ ޑިޒައިންތައް ވެސް އާންމު ކުރައްވާފަ އެވެ. މިސްކިތްތައް ފެންނަނީ ވަރަށް ރީތިކޮށެވެ. މިއީ މި ފަހުން ޑިޒައިންކޮށްފައިވާ ކުރެހުންތަކެއް ކަމަށް މިނިސްޓަރު ވިދާޅުވި އެވެ.

"ކުރަހާފައިވަނީ ރިޔަން އިން. މިއީ ރާއްޖޭގެ ތާރީހާއި ސަގާފަތާއި މާހައުލާއި ގުޅޭގޮތައް ޑިޒައިންކުރެވިފައިވާ މިސްކިތްތަކެއް," މިނިސްޓަރު ވިދާޅުވި އެވެ.

މީގެ ތެރޭގައި ހިމެނެނީ 300 މީހުން، 500 މީހުން، 700 މީހުންނަށް އެއް ފަހަރާ ނަމާދުކުރެވޭނެ 3 ސައިޒެއްގެ މިސްކިތްތައް ކަމަށް މިނިސްޓަރު ވިދާޅުވި އެވެ.