އަހަރުގެ މިހާތަނަށް ގެސްޓްހައުސްތަކަށް ޒިޔާރަތްކުރި ފަތުުރުވެރިންގެ ނިސްބަތް 25 އިންސައްތާގައި: ޓޫރިޒަމް

މިދިޔަ ހަފްތާގެ ހޮނިހިރުދުވަހުގެ ނިޔަލަށް ރާއްޖެއަށް ޒިޔާރަތްކުރި ފަތުރުވެރިންގެ 25.4 އިންސައްތަ މީހުން އައިސްފައިވަނީ ގެސްޓްހައުސްތަކަށް ކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފިއެވެ.

ޓޫރިޒަމް މިނިސްޓްރީން އިއްޔެ ނެރެފައިވާ ރާއްޖެއަށް ޒިޔާރަތްކުރި ފަތުރުވެރިންގެ ތަފާސްހިސާބަށް ބަލާއިރު، މިމަހުގެ 22 ވަނަ ދުވަހުގެ ނިޔަލަށް ރާއްޖެއަށް ވަނީ، 569,119 ފަތުރުވެރިން ޒިޔާރަތްކޮށްފައެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު، 5.1 އިންސައްތަ އިތުރުވުމެކެވެ. މިދިޔަ އަހަރުގެ މި މުއްދަތުގެ ތެރޭގައި ރާއްޖެއަށް ޒިޔާރަތްކޮށްފައިވަނީ، 541,471 ފަތުރުވެރިންނެވެ.

މި ތަފާސްހިސާބަށް ބަލާއިރު ރާއްޖެއަށް ޒިޔާރަތްކުރި ޖުމްލަ ފަތުރުވެރިންގެ ތެރެއިން 144,645 މީހުން ޗުއްޓީ ހޭދަކޮށްލުމަށް އައީ ގެސްޓްހައުސްތަކަށެވެ. މީގެ އިތުރުން މި މުއްދަތުގެ ތެރޭގައި 393,578 ރިސޯޓްތަކަށް އައިސްފައިވާއިރު، ހޮޓާތަކަށް 16,445 ފަތުރުވެރިން އަދި ސަފާރީތަކަށް ޗުއްޓީ ހޭދަކުރުމަށް އައި ފަތުރުވެރިންގެ އަދަދު އުޅެނީ، 14,127 ގައެވެ.

އެންމެގިނައިން ފަތުރުވެރިން ޒިޔާރަތްކުރި ޤައުމުތައް:

1. ޗައިނާ: 69,010

2. ރަޝިއާ: 59,636

3. އިނގިރޭސިވިލާތް: 57,944

4. އިޓަލީ: 53,252

5. ޖަރުމަނުވިލާތް: 39,856

ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އިތުރުކުރުމަށް މޯލްޑިވްސް މާކެޓިން ޕީއާރު ކޯޕަރޭޝަނުން ރާއްޖެ އިސްތިހާރުކުރުމަށް ގިނަ މަސައްކަތްތަކެއް ދަނީ ކުރަމުންނެވެ. މިގޮތުން މީގެކުރިން ކޮށްފައިނުވާފަދަ މަސައްކަތްތަކެއް މިފަހުން އެމްއެމްޕީއާރުސީން ފަށާފައިވާއިރު، ބައިނަލްއަޤްވާމީ މަޝްހޫރު ކްލަބްތައް މެދުވެރިކޮށް، މަންޒިލެއްގެ ގޮތުގައި ރާއްޖޭގެ ޓޫރިޒަމް އިސްތިހާރު ކުރުމުގެ މަސައްކަތް އެމްއެމްޕީއާރުސީން ވަނީ މިހާރު ފަށާފައެވެ. އެގޮތުން އިނގިރޭސި ޕްރިމިއާލީގްގެ ކްލަބް ލިވަޕޫލާއި، އިންޑިއަން ޕްރިމިއާލީގްގެ އެންމެ މަޝްހޫރު އެއް ކްލަބް، މުމްބާއީ އިންޑިއަންސް މެދުވެރިކޮށް މަންޒިލެއްގެ ގޮތުގައި ރާއްޖޭގެ ޓޫރިޒަމް އިސްތިހާރުކުރުމުގެ މަސައްކަތް އެ ކޯޕަރޭޝަނުން ވަނީ ފަށާފައެވެ.

މިދިޔަ އަހަރު ރާއްޖެއަށް 2 މިލިއަން ފަތުރުވެރިން އައިސްފައިވާއިރު، ޓޫރިޒަމް މިނިސްޓްރީގެ އަމާޒަކީ މިއަހަރު ނިމުމުގެ ކުރިން އެއަދަދު 2.2 މިލިއަނަށް އިތުރުކުރުމެވެ.