މިއަދު ރޯދަ ވިއްލާގަޑީގައި ކާލަން ޕިއްޒާ ޕޮކެޓް ކިހިނެއް ވާނެ؟

ޕިއްޒާއަކީ އަހަރެމެންގެ ތެރެއިން ވަރަށް ގިނަ މީހުންނަށް ކަމުދާ ވަރަށް މީރު އެއްޗެކެވެ. އަދި ޕިއްޒާ ޕޮކެޓް އަކީ ޕިއްޒާއަށްވުރެވެސް މީރު، އަނގަޔަށް ވިރިގެންދާ ފަދަ ހެދިކާއެކެވެ. މިއަދު ވޮއިސްގެ ބަދިގެއިން މި ގެނެސްދެނީ ޕޮއްޒާ ޕޮކެޓްގެ ރެސިޕީއެވެ.

ބޭނުންވާ ތަކެތި

1/2 މޭޒުމަތީ ސަމުސާ ތެޔޮ

1 ސައިސަމުސާ ލޮނުމެދު ޕޭސްޓް

ކުޑަ 1 ފިޔާ (ކުދިކޮށް ޗޮޕް ކޮށްފައި)

1 ޖޯޑު މިންސްޑް ކުކުޅު

1 ޓޮމާޓޯ (ޗޮޕްކޮށްފައި)

1 މޭޒުމަތީ ސަމުސާ ޕިއްޒާ ސޯސް

1 ސައިސަމުސާ މުގުރި އަސޭމިރު

ބެލްޕެޕާ އެއްގެ ދެބައިކުޅައެއްބައި (ކުދިކޮށް ޗޮޕް ކޮށްފައި)

ރަހަލާވަރަށް ލޮނު

2 މޭޒުމަތީ ސަމުސާ މަޔޮނައިޒް

ގާނާފައި ހުރި މޮޒެރެއްްލާ ޗީޒް

ޕާން

ފާރޮށި ކުނޑި

4 ބިސް

ތެޔޮ

ތައްޔާރު ކުރާނެގޮތް

ތަވަޔަށް ތެޔޮފޮދު އެޅުމަށްފަހު، ހޫނުވުމުން ލޮނުމެދު އަޅައި ކުޑަކޮށް ފްރައިކޮށްލާށެވެ. ދެން ފިޔާ އަޅައި އެވެސް ފްރައި ކޮށްލާށެވެ.

އެއަށްފަހު ކުކުޅު، އަދި ލޮނު އަޅާލައި ރޯ ފިލަންދެން ކައްކާށެވެ.

ކުކުޅު ރޯފިލުމުން ރޯ ޓޮމާޓޯ، އަސޭމިރުސް، އަދި ޕިއްޒާ ސޯސް އަޅާލައި، އެކުލަވާލުމަށްފަހު، މަތިޖަހައިގެން، މަޑު ގިނީގައި ގާތްގަނޑަކަށް 10 މިނެޓް ވަންދެން ކައްކާލާށެވެ.

ދެން ބެލްޕެޕާ އަޅައި އެކުލަވާލުމަށްފަހު މަޔޮނައިޒްވެސް އަޅާލައި އެކުލަވާލާށެވެ. ދެން އިރުކޮޅަކު ކައްކާލުމަށްފަހު އުނދުން ނިއްވާލާށެވެ.

ޕިއްޒާ ޕޮކެޓް ހެދުމަށް ޕާން ފޮތިތައް ތުނިކޮށް ދަމާލާށެވެ.

ދެން ތިނެސްކަން ވާގޮތަށް އެއްފަޅިއަށް މަސް އެޅުމަށްފަހު، މައްޗަށް ޗީޒް އަޅާލާފައި، އަނެއްފަޅީގެ ކައިރިފަށުގައި ފެންފޮދެއްލައި ތެންމާލުމަށްފަހު ބަންދުކޮށްލާށެވެ. ކައިރިފަށް އަތުން ފިތާލައި ހަރުކޮށްލަންވާނެއެވެ.

އެއަށްފަހު، ތަޅާފައި ހުރި ރޯ ބިހުގެ ތެރެއަށް އެ ލުމަށްފަހު، ފާރޮށި ކުނޑިއަށް ލައި ރަނގަޅަށް ފާރޮށި ކުނޑި އުނގުޅާލާށެވެ.

ދެން ރަން މުށި ކުލަ އަރަންދެން ތެލުލާލާށެވެ.