ރޮނާލްޑޯގެ ޝަރަފްގައި ޕޯޗުގަލުން ހާއްސަ ފައިސާ ފޮއްޗެއް ނެރެނީ

ދުނިޔޭގައި އުފެދުނު އެންމެ މޮޅު ފުޓްބޯޅަ ކުޅުންތެރިންގެ ތެރޭގައި ހިމެނޭ ކްރިސްޓިއާނޯ ރޮނާލްޑޯގެ ޝަރަފްގައި އޭނާގެ އުފަން ޤައުމު، ޕޯޗުގަލުން ހާއްސަ ފައިސާ ފޮއްޗެއް ނެރުމަށް ނިންމައިފިއެވެ.

ޕޯޗްގަލްގެ މީޑިއާތަކުން ރިޕޯޓްކުރި ގޮތުގައި އެޤައުމުގެ ސެންޓްރަލް ބޭންކުން ވަނީ، ރޮނާލްޑޯގެ ޝަރަފްގައި ހާއްސަ ފައިސާ ފޮއްޗެއް ނެރުމަށް ނިންމައި، ފައިސާފޮތި ދައްކާލާފައެވެ. މި ފައިސާފޮތި ވަރަށް ކައިރި މުސްތަގްބަލެއްގައި ދައުރުކުރުމަށް ނެރުމަށް ހަމަޖެހިފައިވާކަމަށްވެސް މީޑިއާތަކުން ބުނެއެވެ.

މި ފައިސާ ފޮތި ފަރުމާކޮށްފައިވަނީ، ރޮނާލްޑޯގެ އިތުރުން، އޭނާގެ އޮފިޝަލް ލޯގޯ ސީއާރު7 ފެންނަ ގޮތަށެވެ. ބައެއް މީޑިއާތަކުން ބުނާގޮތުގައި ޕޯޗްގަލުން ރޮނާލްޑޯގެ ޝަރަފްގައި ފައިސާ ފޮއްޗެއް ނެރުމަށް ނިންމާފައިވަނީ، ފުޓްބޯޅައަށް ރޮނާލްޑޯ ކުރަމުންގެންދާ ހިދުމަތްތަކުގެ އަގު ވަޒަންކުރުމުގެ ގޮތުންނެވެ.

ރޮނާލްޑޯގެ ފުޓްބޯޅައިގެ ހަޔާތަށް ބަލާއިރު، އޭނާ ވަނީ ޕޯޗްގަލަށް 2016 ވަނަ އަހަރުގެ ޔޫރޯ ފުޓްބޯޅަ މުބާރާތް ކާމިޔާބުކޮށްދީފައެވެ.

މިހާރު ސައުދީގެ އަލް ނަސްރަށް ކުޅެމުން އަންނަ ރޮނާލްޑޯ ވަނީ ޕޯޗްގަލްގެ ޤައުމީޓީމަށް މިހާތަނަށް ކުޅެދިން 214 މެޗްގައި 132 ލަނޑު ޖަހައިދީފައެވެ. މިއީ އަދި އެޤައުމުގެ ތާރީހުގައި ރެކޯޑެކެވެ.  ރޯނާލްޑޯ ވަނީ ޤައުމީ ޓީމްގެ އިތުރުން ކްލަބް ލެވެލްގައިވެސް ގިނަ ރެކޯޑްތަކެއް ޤާއިމްކޮށްފައެވެ.

ރޮނާލްޑޯ އަންނަނީ ޕޯޗްގަލްގައި ފުޓްބޯޅަ ކުރިއެރުވުމުގެ އިތުރުން ޓޫރިޒަމަށްވެސް އިންވެސްޓްކޮށް އެ ވިޔަފާރި ފުޅާކުރަމުންނެވެ. މީގެ އިތުރުން އިންސާނިއްޔަތަށް ހޭދަކުރުމުގައިވެސް ރޮނާލްޑޯއަކީ ފާހަގަކުރެވޭ ސަހްސިއްޔަތެކެވެ. ރޮނާލްޑޯ އަންނަނީ އޭނާގެ ކެރިއަރުގެ ވަރަށްކުރީކޮޅުން ފެށިގެން ބޮޑެތި ބަލިތަކުގައި ފަރުވާ ހޯދަމުންދާ ކުދިންނަށް މާލީ ގޮތުންނާއި އެނޫންވެސް ގޮތްގޮތުން އެހީތެރިކަން ފޯރުކޮށްދެމުންނެވެ.

ކްރިސްޓިއާނޯ ރޮނާލްޑޯ އަކީ މިހާރު ސޯޝަލް މީޑިއާގައިވެސް އެންމެ ނުފޫޒުގަދަ އެއް އެތްލީޓެވެ. އެގޮތުން ކްރިސްޓިއާނޯ ރޮނާލްޑޯގެ ޔޫޓިއުބް ޗެނަލް ލޯންޗްކުރުމާއެކު ކުޑަ ދުވަސްކޮޅެއްގެ ތެރޭގައި ސަބްސްކްރައިބަރުންގެ އަދަދު ވަނީ އެއް ބިލިއަން ފަހަނައަޅައި ގޮސްފައެވެ.