ބަދަލު ކުޅުންތެރިއެއްގެ ގޮތުގައި އަރައި, އޮލިސޭ ފްރާންސް މޮޅުކޮށްދީފި

ޔުއެފާ ނޭޝަންސް ލީގް އޭ ގްރޫޕް އެކެއްގައި ރޭ ފްރާންސް އާއި ބެލްޖިއަމް ބައްދަލުކުރި މެޗް ފްރާންސުން ކާމިޔާބުކޮށްފިއެވެ.

ބެލްޖިއަމްގެ މައްޗަށް މިމެޗްގައި ފްރާންސް ކުރި ހޯދީ 1-0 ގެ ނަތީޖާއިންނެވެ. މެޗްގައި ފެނިގެންދިޔަ ހަމައެކަނި ލަނޑު ފްރާންސަށް ޖަހައިދިނީ މެޗްގެ ފަހުވަގުތުގެ ތެރޭގައި އޮލިސޭއެވެ. މެޗްގައި އޮލިސޭ ލަނޑު ޖަހާފައިވަނީ ބަދަލު ކުޅުންތެރިއެއްގެ ގޮތުގައި ކުޅެން އެރިތާ ކުޑަވަގުތުކޮޅެއްގައެވެ.

މެޗްގައި އެންމެ ފުރަތަމަ ލަނޑު ޖަހާނެ ރަނގަޅު ފުރުސަތެއް ލިބުނީ 12 ވަނަ މިނެޓުގައި ޑެސިރޭ ދޫއޭ އަށެވެ. ބެލްޖިއަމްގެ ޑިފެންޑަރުން ކައިރިން ނައްޓާލުމަށްފަހު އޭރިއާ ތެރެއަށް ވަދެ ފޮނުވާލި ހަމަލާ އަމާޒުވީ ގޯލުގެ ހުރަސް ދަނޑިއަށެވެ. އަދި އޭގެ ކުޑަވަގުތުކޮޅެއް ފަހުން ދޫއޭ ނަގައިދިން ހިތްގައިމު ހުރަހަކުން އެސްޓެބަން ލެޕޯލް ފޮނުވާލި ބޯޅަ ބެލްޖިއަމްގެ ކީޕަރު ސެން ލަމެންސް ވަނީ ދިފާއުކޮށްފައެވެ.

މިމެޗްގައި އަނިޔާގެ ސަބަބުން އިތުބާރު ފޯވަޑް އެމްބާޕޭ ނުކުޅެއެވެ. އެގޮތުން އެމްބާޕޭ ނެތްތަން ދެއްކިއިރު، އޮލިސޭ ކޮޅެން އެރުމާއެު ފްރާންސް ރަނގަޅުވެގެން ދިޔަތަން ފާހަގަކުރެވުނެވެ.

ފްރާންސްގެ ކޯޗް ޒިދާން ވަނީ މި މެޗަށް ނިކުތް ޓީމަށް ބަދަލުތަކެއް ގެނެސްފައެވެ. އެގޮތުން އޮސްމާން ޑެމްބެލޭ ފަދަ ތަޖުރިބާކާރު ކުޅުންތެރިން ބެންޗުގައި ބޭތިއްބިއިރު، އެންޑީ ޑިއޯފް، ޖެރެމީ ޖެކޭ އަދި ޑަ ކޫންހާ ވަނީ އަލަށް ފްރާންސްގެ ފުރަތަމަ އެގާރައިގައި ހިމަނާފައެވެ. މިއީ 2010 ވަނަ އަހަރުގެ އޮގަސްޓް މަހަށްފަހު ފްރާންސްގެ ފުރަތަމަ އެގާރައިގައި މިހާ ގިނަ އާ ކުޅުންތެރިން ހިމެނުނު ފުރަތަމަ ފަހަރެވެ.

ބެލްޖިއަމް މެޗް ކާމިޔާބުކުރެވުމާއެކު ޒިދާންގެ އިރުޝާދުގެ ދަށުން ކުޅުނު ދެ މެޗުން ވެސް ފްރާންސުން ވަނީ ކާމިޔާބުކޮށްފައެވެ.