ހަނު ހުރުން އިތުރު ކުރާށެވެ؛ ހިފެހެއްޓުމެއްނެތް ދުލަކީ ޝައިޠާނާގެ އަތަށް ދޫކޮށްލެވޭ ވައުގަނޑެއް: ޚުތުބާ

ހިފެހެއްޓުމެއްނެތް ދުލަކީ ޝައިޠާނާގެ އަތަށް ދޫކޮށްލެވޭ ވައުގަނޑެއް ކަމަށް ބުނެ، ހެޔޮ ބަހެއް ނޫނީ ނުބުނުމަށް މިއަދުގެ ހުކުރު ޚުތުބާގައި ނަޞޭހަތްތެރި ވެއްޖެއެވެ.

”ހަނު ހުރުމުގެ އަޚްލާގު“ މައުޟޫއަށް އަލި އަޅުވާލައި މިއަދު އިއްވި ހުކުރު ޚުޠުބާގައި ވަނީ ހަނުހުރުމުގެ މުހިންމުކަމާއި، ބޭކާރު ވާހަކަތަކުން ދުރުހެލިވުމުގެ މައްޗަށް އަލިއަޅުވާލައްވައިފިއެވެ.

އެގޮތުން ޚުޠުބާގައި، ވަނީ ހަނުހުރުމަކީ މުއުމިނުންގެ ސިފަތަކުގެ ތެރޭގައި ހިމެނޭ އަދި ބުއްދިވެރީންނާއި ވިސްނުންތެރީންގެ ސިފައެއްކަން ފާހަގަކުރެއްވިއެވެ.

މިއާއެކު ޚުޠުބާގައި، ކީރިތި ރަސޫލާ ﷺ އަބޫ ޛައްރުގެފާނަށް ދެއްވި ނަސޭހަތެއް ނަގުލުކުރެއްވިއެވެ. އެ ޙަދީޘްގައި ވަނީ، "އެންމެ ހެޔޮ އަދި ހަށިގަނޑަށް ކުރަން އެންމެ ފަސޭހަ ޢަމަލަކީ ޚުލްޤު ހެޔޮވުމާއި ހަނު ހުރުން އިތުރުކުރުން" ކަމަށެވެ. މި ދެ ކަމުގައި ވަރުގަދައަށް ހިފެހެއްޓުމަށް އަންގަވާފައިވާކަން ފާހަގަކޮށްފައިވެއެވެ.

އަދި الله ތަޢާލާއާއި އެކަލާނގެ ރަސޫލާ ﷺ މީސްތަކުންނަށް ގޮވައިލައްވަނީ ހަނު ހުރުމަށާއި އަނގަގަދަ ނުކުރުމަށްކަން ޚުޠުބާގައި ބަޔާންކޮށްފައިވެއެވެ. އަދި މަޞްލަޙަތެއް ނެތް ހިނދު، ހަނުހުރުމާއި ބޭކާރު ވާހަކަތައް ނުދެއްކުމަކީ ބުއްދިވެރި ގޮތްކަމުގައި ބުންޏެވެ.

ނަބިއްޔާ ﷺ ޙަދީޘްކުރައްވައިފައި ވެއެވެ. (مَنْ كَانَ يُؤْمِنُ بِاللَّهِ وَالْيَوْمِ الْآخِرِ فَلْيَقُلْ خَيْرًا أَوْ لِيَصْمُتْ) މާނައީ: "اللهއަށާއި އާޚިރަތް ދުވަހަށް އީމާންވާ މީހާ ފަހެ ހެޔޮ ބަސް ބުނާށެވެ! ނުވަތަ އެމީހަކު ހަނުހުންނަހުށްޓެވެ!"

ޚުތުބާގައި ބުނީ ހެޔޮ ނޫން ބަހެއް ބުނުމަކީ ބާޠިލު ބަހެއް ބުނުމން ކަމަށާ ވިސްނައިނުލައި އެއްޗެއް ބުނުމަކީ ކުށް ބަހެއް ބުނުން ކަމަށެވެ.

ހިފެހެއްޓުމެއްނެތް ދުލަކީ ޝައިޠާނާގެ އަތަށް ދޫކޮށްލެވޭ ވައުގަނޑެކެވެ. މީހަކު ބާޠިލު ވާހަކަތަކާ ދުރުހެލިވެ ހުރެއްޖެ ނަމަ، އެމީހަކު ވާނީ ސުވަރުގޭގެ އަހުލުވެރިއަކަށެވެ. ނަމަވެސް ބާޠިލު ވާހަކަދައްކަން ފަށައިފި ނަމަ، ޝައިޠާނާ އެމީހަކު އަތްއަތަށް ދަމާން ފަށައިފާނެއެވެ. އަދި ޝައިޠާނާ އެދޭގޮތަށް އެދޭ ކޮންމެ ވަގުތަކު އެމީހަކު އަނބުރައިލައިފާނެއެވެ.

ހުކުރު ޚުތުބާ

މިއާއެކު ޚުތުބާގައި ބުނީ އިންސާނާއަށް އޭނާގެ ބަސްތައް ކޮންޓުރޯލުނުކުރެވިއްޖެ ނަމަ، އޭނާއަކީ އަނގަ ހުތުރު، ހިތް ފަސާދަވެފައިވާ މީހަކަށް ވެދާނެ ކަމަށެވެ.

މިކަމާ ގުޅޭގޮތުން ކައުރަސޫލާ ﷺ ޙަދީޘްކުރައްވައިފައި ވެއެވެ: "ހިތް ސީދާވެއްޖައުމަށް ދާންދެން އެއްވެސް އަޅެއްގެ އީމާންކަން ސީދާނުވާނެތެވެ. އަދި އޭނާގެ ދޫ ސީދާވެއްޖައުމަށް ދާންދެން އޭނާގެ ހިތް ސީދާނުވާނެތެވެ."

ޚުތުބާގައި އިތުރަށް ބުނީ، އިންސާނާ ވަޒަން ކުރެވޭނީ އޭނާގެ ދުލުން ބުނާ ބަސްތަކުން ކަމަށާ، މީހަކު ހަނުހުރެއްޖެ ނަމަ އޭނާއާ މެދު ނިޔާއެއް ކަނޑައަޅާކަށް ނޭނގޭނެ ކަމަށެވެ. ނަމަވެސް ވާހަކަދައްކައިފި ނަމަ، އޭނާގެ ޝަޚްޞިއްޔަތު ފާޅުވެ، ހަރުދަނާކަމާއި ދޯހަޅިކަން ފެނިގެންދާނެ ކަމަށެވެ.

ނަބިއްޔާ ﷺ ޙަދީޘްކުރައްވައިފައިވާ ބަސްފުޅެއްގެ މާނައިގައި ވެއެވެ. "އާދަމުގެދަރިޔާ ހެނދުނު ހޭލާ އިރަށް އޭނާގެ ގުނަވަންތައް އާދޭހާއެކު ބުނާނެތެވެ. އަހަރެމެންގެ ޙައްޤުގައި، ތިބާ މާތް ﷲއަށް ބިރުވެތިވާށެވެ! ފަހެ އަހަރެމެންނަކީ ތިބާގެ ސަބަބުން ޖަޒާ ލިބޭނެ ބައެކެވެ. ތިބާ ސީދާވެގެންފި ނަމަ އަހަރެމެންނަށް ސީދާކަން ލިބޭނެތެވެ. ތިބާ ކަސިޔާރުވެއްޖެ ނަމަ، އަހަރެމެން ވެސް ކަސިޔާރުވެދާނެތެވެ."

ވީމާ، މުއުމިނަކީ އޭނާގެ ދުލަށް ރައްކައުތެރިވާ މީހެއްކަމަށާ ޢަމަލު ގިނަކޮށް ބަސް މަދުކުރާ މީހެއް ކަމުން، އެކަންކަމަށް ސަމާލުކަން ދީ ހަނުހުރުން އިސްކުރުމަށް ޚުތުބާގައި ވަނީ ގޮވާލާފައެވެ.