އެމްޖޭއެސް ރާބަދި ޗެލެންޖުގެ ޗެމްޕިއަންކަން ކޯރާ ކޯރާ މޯލްޑިވްސް ހޯދައިފި

އެމްޖޭއެސް ރާބަދި ޗެލެންޖް 2026 ވަނަ އަހަރުގެ ތަށި ކޯރާ ކޯރާ މޯލްޑިވްސްއިން ހޯދައިފިއެވެ.

މި މުބާރާތުގެ ތަށި ކޯރާ ކޯރާއިން ހޯދާފައިވަނީ ފައިނަލުގައި މިރޭ ކޮތައިފަރާ ދެކޮޅަށް ކުޅުނުމެޗް ތަފާތުބޮޑު ނަތީޖާއަކުން ކާމިޔާބުކޮށްގެންނެވެ. މިމެޗް ކޯރާ ކޯރާއިން ކާމިޔާބުކުރީ، 2-8 ގެ ނަތީޖާއަކުންނެވެ. މެޗްގެ ފުރަތަމަ ހާފް 2-2 ގެ ނަތީޖާއަކުން އެއްވަރުވިއިރު، މެޗްގެ ނަތީޖާ ފެނިގެންގޮސްފައިވަނީ ދެވަނަ ހާފްގެ ތެރޭގައެވެ.

ފުރަތަމަ ހާފްގައި ކޯރާ ކޯރާއަށް ލަނޑުތައް ކާމިޔާބުކޮށްދިނީ، ރައުލް ނިޔާޒް އަދި ހަސަން ޒައިދާނެވެ. މެޗްގެ ވަރަށް ކުރީކޮޅު ކޯރާކޯރާއިން ދެ ލަނޑު ޖަހާފައިވަނިކޮށް، ކޮތައިފަރަށް އެއްވަރުކޮށްދިނީ، އަހުމަދު ނާހީ އާއި މުހައްމަދު އިރުޝާމެވެ. މެޗްފައި ދެން ކޯރާ ކޯރާއަށް ލަނޑުތައް ކާމިޔާބުކޮށްދިނީ، މުހައްމަދު އިސާމް، ހަސަން ޒައިނާން އެވެ.

މެޗްގައި ކޯރާ ކޯރާ މޯލްޑިވްސްގެ ހަސަން ޒައިދާން ވަނީ 3 ލަނޑު ޖަހައި ހެޓްރިކް ހަދާފައެވެ. އަދި އިސާމް ވަނީ ދެ ލަނޑު ޖަހައިދީފައެވެ. މިމެޗްގެ މޮޅު ކުޅުންތެރިޔާގެ މަގާމް ހޯދީ ޒައިދާން އެވެ.

ފައިނަލްމެޗަށްފަހު ޗެމްޕިއަން ޓީމަށް ތައްޓާއި އެނޫންވެސް ވަނަތައް ވަނީ ހޮވާފައެވެ. މުބާރާތުގެ ފެއާޕްލޭ ޓީމަކީ ޖޯލި ބީންނެވެ. ބެސްޓް ސަޕޯޓިން ޓީމަކަށް ކޯރާ ކޯރާ ހޮވުނުއިރު، އެންމެ ގިނަ ގޯލް ޖެހި ކުޅުންތެރިއަކީ ކޯރާ ކޯރާގެ ރައުލް އެވެ.

މުބާރާތުގެ އެންމެ މޮޅު 5 ކުޅުންތެރިން:

- މުހައްމަދު އިރުޝާމް - ކޮތައިފަރު

- އަހުމަދު ނާހީ - ކޮތައިފަރު

- އިބްރާހިމް ނަދީމް - ޖޯލި އެމްވީ

- މުހައްމަދު އިސާމް - ކޯރާ ކޯރާ

- ރައުލް ނިޔާޒް - ކޯރާ ކޯރާ

މިފަހަރުގެ މުބާރާތުގެ އެންމެ މޮޅު ކޯޗަކީ ކޯރާ ކޯރާގެ ޖައިޝް ޝަރީފެވެ. މުބާރެާތުގެ އެންމެ ޝަރަފްވެރި ވަނަކަމަށްވާ މުބާރާތުގެ އެންމެ މޮޅު ކުޅުންތެރިޔާ ނުވަތަ ފުޓްސަލް ކިންގްގެ މަގާމް މިފަހަރުވެސް ހޯދީ ކޯރާ ކޯރާގެ މުހައްމަދު އިސާމެވެ.

އެމްޖޭއެސް ރާބަދި ފުޓްސަލް ޗެލެންޖަކީ، ރާއްޖޭގެ ޓޫރިޒަމް އެންމެ ބޮޑަށް ފެތުރިފައި އޮތް ރ. އަތޮޅުގެ ރިސޯޓުތަކުގައި މަސައްކަތްކުރާ މުވައްޒަފުންގެ މެދުގައި އެކުވެރިކަމާއި ކުޅިވަރުގެ ރޫހު އާލާކުރުމަށް ބާއްވާ މުބާރާތެކެވެ. ރިސޯޓްތަކުގެ މުއައްޒަފުންގެ ހުރި ހުނަރު ދައްކާލުމާއި އެ ކުޅުންތެރިންނަށް އިތުރު ފުރުސަތުތައް ފަހިކޮށްދިނުމެވެ.