ރަޝިޔާއިން ދިން ހަމަލާއެއްގައި ޔޫކްރެއިންގެ 15 މީހަކު މަރުވެއްޖެ

ރަޝިޔާއިން ޔޫކްރެއިންއަށް ވައިގެ މަގުން ދިން ހަމަލާއެއްގައި ޔޫކްރެއިންގެ 15 މީހަކު މަރުވެއްޖެއެވެ.

ޔޫކްރެއިންގެ އިންޓީރިއާ މިނިސްޓަރު އިހޯރ ކްލިމެންކޯ އާއި ހަވާލާދީ މީޑިޔާތަކުގައި ރިޕޯޓްކޮށްފައިވާ ގޮތުގައި ޔޫކްރެއިންގެ ވެރިރަށް ކީވްގެ 27 ސަރަހައްދަކަށް ރަޝިޔާއިން ދިން ވައިގެ ހަމަލާތަކުގައި އިމާރާތްތަކަށް އެކިވަރުގެ ގެއްލުންތަށް ލިބުމުގެ އިތުރުން ޔޫކްރެއިންގެ 15 މީހަކު މަރުވެ 116 މީހަކު ވަނީ ޒަހަމްވެއްފައެވެ.

ރަޝިޔާގެ ހަމަލާތަކަށް ރައްދު ދިނުމުގެ ގޮތުން ޔޫކްރެއިން އިން ވެސް ވަނީ 440 ޑްރޯންގެ އިތުރުން 32 މިސައިލް ހަމަލާ ރަޝިޔާއަށް ދީފައިވާކަމަށް މީޑިޔާތަކުގައި ރިޕޯޓްކޮށްފައިވެއެވެ.

އަދިހަމައެހެންމެ ޔޫކްރެއިންގެ ރައިީސް ޒެލެންސްކީ ވިދާޅުވެފައިވާ ގޮތުގައި ޔޫކްރެއިންގެ ވެރިރަށް ކީވްއަށް ރަޝިޔާއިން ދިން ހަމަލާތަކުގައި މީހުން ދިރިއުޅުމަށް ހާއްސަކޮށްފައި ހުރި ފްލެޓްތަކަކަށް ވަނީ އަމާޒުވެފައި ކަމަށާއި އެ އިމާރާތްތަކުގެ ދަށުގައި މީހުން ތާށިވެފައިވުމުގެ ފުރުސަތު ބޮޑުކަމަށެވެ.

އަދިހަމައެހެންމެ، މި ހިތާމަވެރި ވަގުތު، ބިމާއި ހަމަވެފައިވާ އިމާރާތްތަކުގެ ދަށުގައި ތާށިވެފައި ތިބި މީހުން ސަލާމަތްކުރުމުގެ މަސައްކަތް ކަމާ ގުޅުންހުރި ފަރާތްތަކުން ކުރަމުން އަންނަ ކަމަށް ޒެލެންސްކީ އިތުރަށް ވިދާޅުވިއެވެ.

ރަޝިޔާއިން ޔޫކްރެއިންނަށް ދެމުން އަންނަ ހަމަލާތަށް ތިން އަހަރަށް ދިގު ދެމިގެންދާއިރު ހަނގުރާމަ ހުއްޓާލުމުގެ އެއްބަސްވުމާއި ހަމައަށް އާދެވިފައިވީ ނަމަވެސް އެމަޝްވަރާތަށް ވަނީ ވަގުތީ ގޮތުން މެދުކެނޑިފައިކަން ފާހަގަކޮށްލަން ޖެހެއެވެ.