”ލޯންޗު ބަންޑުން ޖަހާލިއިރު ދުއްވަން އިނީ ސިންގާނިއާ، އޭނާ ހުރީ މަސްތުގެ ޙާލަތުގައި“

ވ. ފެލިދޫ ކައިރިން ދަތުރުކުރި ލޯންޗެއް ބަންޑުން ޖަހާލައި ދެ މީހަކު ގެއްލުނު ހާދިސާ ހިނގިއިރު އެ ލޯންޗު ދުއްވަން އިނީ އިންޑިއާގެ މަހުޖަނު އަދި ރޭމަންޑް ގްރޫޕްގެ ވެރިޔާ ގޯތަމް ސިންގާނިއާ ކަމަށާ، އޭރު އޭނާ އިނީ މަސްތުގެ ޙާލަތުގައިކަން ހާމަވެއްޖެއެވެ.

މިދިޔަ ބުރާސްފަތި ދުވަހު ހިނގި މި ހާދިސާއާ ގުޅޭގޮތުން މައުލޫމާތު ދެމުން މީގެ ކުރިން ފުލުހުން ބުނި ގޮތުގައި، މި ހާދިސާ ހިނގިއިރު އެ ލޯންޗުގައި ހަތް މީހުން ދަތުރުކުރިއެވެ. އަދި ކަނޑަށް 5 މީހުން ވެއްޓުނު އިރު، މި ހާދިސާގައި އަނިޔާވި ތިން މީހަކަށް ވ. އަތޮޅު ހޮސްޕިޓަލުގައި ފަރުވާވެސް ދިނެވެ. އިތުރު ތަފްސީލެއް ފުލުހުން ނުދެއެވެ.

މި ހާދިސާއާ ގުޅޭ އިތުރު މައުލޫމާތު ހިއްސާކުރައްވަމުން ވ. އަތޮޅު ކައުންސިންލްގެ ރައީސް ޝުޖާއު އަލީ ވިދާޅުވީ، އެ ލޯންޗަކީ ސިނގިރެޓް ރޭސިން މަރުކާގެ ސްޕީޑް ލޯންޗެއް ކަމަށެވެ.

އަދި ހާދިސާގައި އަނިޔާވެގެން ހޮސްޕިޓަލަށް ގެންދިޔަ މީހުންގެ ތެރޭގައި ގޯތަމް ސިންގާނިއާ ހިމެނޭއިރު، އޭނާގެ މޫނަށާއި އަތަށް އެކިވަރުގެ އަނިޔާ ވެފައިވާ ކަމަށް ޝުޖާއު ވިދާޅުވިއެވެ.

”އޭނާގެ ޒާތީ މައުލޫމާތުދޭން ދެކޮޅު ހެދި. އަދި ހޮސްޕިޓަލް ރެކޯޑްއަށްޓަކައި ސޮއި ކުރަންޖެހޭ މެޑިކަލް ރެކޯޑްސް ގައިވެސް ސޮއިކުރަން އޭނާ އިންކާރު ކުރި. އޭނާ ހުރީ ވަރަށް ބޮޑަށް މަސްތުގެ ޙާލަތުގައި. ލޯންޗު ދުއްވަންވެސް އިނީ އޭނާ. ލޯންޗުގެ ސްޕީޑް ހުރީ ގަޑިއަކު 70 މޭލަށް “ ޝުޖާޢުގެ ޕޯސްޓުގައި ބުނެފައިވެއެވެ.

އަތޮޅުތެރޭ ދުއްވާ ގަލްފް ކްރާފްޓުގެ ސްޕީޑް ލޯންޗެއް ވެސް އެންމެ ބާރަށް އާންމުކޮށް މި ދުއްވަނީ ގަޑިއަކު 42 މޭލަށެވެ.

އިންޑިޔާގެ ނޫސްތަކުން ސިންގާނިއާގެ ތަރުޖަމާނާ ހަވާލާދީ ރިޕޯޓް ކުރާ ގޮތުން އޭނާ މިވަގުތު ހުރީ މުމްބާއިގައެވެ. އެ ސިޓީއަށް އޭނާ ދިޔައީ އިތުރު ފަރުވާ އަށެވެ. މީގެ އިތުރުން، ސިންގާނިއާ ރާއްޖެއަށް ގެނައި އޭނާގެ އަގުބޮޑު ޔޮޓްވެސް މިހާރު ރާއްޖެއިން ބޭރަށް ފުރާފައިވާ ކަމަށް ބުނެފައިވެއެވެ.

މީގެ އިތުރުން ލޯންޗުން ގެއްލުނު މީހުންގެ ތެރޭގައި އިންޑިޔާގެ ރެލީ ޑްރައިވަރު ހަރީ ސިންގ ވެސް ހިމެނޭ ކަމަށް އިންޑިޔާގެ ނޫސްތަކުން ރިޕޯޓް ކުރެއެވެ.