އައިޖީއެމްއެޗުން ދިން އިންޖެކްޝަނެއްގެ ސަބަބުން، އުމުރުން ދުވަސްވީ މީހެއްގެ އަތުގެ އިނގިލިތައް ބުރިކޮށްލަން ޖެހުނު ކަމަށް ބުނާ މައްސަލަ ބަލަން ފަށާފައިވާ ކަމަށް އެ ހޮސްޕިޓަލުން މިރޭ ބުނެފި އެވެ.

އުމުރުން 85 އަހަރުގެ ދިވެހި އަންހެނަކު ބަލިވެގެން އައިޖީއެމްއެޗް ހޮސްޕިޓަލަށް ފަރުވާ ހޯދަން ދިޔުމުން އެ ހޮސްޕިޓަލުން އޭނާ ގަޔަށް ނުބައި އިންޖެކަޝެއް ދީފައިވާ ކަމަށް އިއްޔެ މީސްމީޑިއާގައި ޚަބަރުތައް ވަނީ ފެތުރިފައެވެ. 

އަދި އެ އިންޖެކްޝަން ޖެހުމުގެ އެ މީހާގެ އަތުގެ ހަތަރު އިނގިއްޔެއް ބުރި ކުރަން ޖެހުނު ކަމަށް ވެސް އެކަމާއި ގުޅިގެން މީސްމީޑިއާގައި ދައުރުވި އެ މީހާގެ ޑިސްޗާޖް ސަމަރީ ރިޕޯޓާއި އަތުގެ ފޮޓޯތަކުން ވަނީ ހާމަވެފައެވެ. 

އެކަމާ ގުޅިގެން އައިޖީއެމްއެޗުން ރޭ ނެރުނު ބަޔާނުގައި ބުނީ، އެ މައްސަލައާ ގުޅިގެން ކަން ހިނގާފައިވާ ގޮތް ދެނެގަނެ، ބަލި މީހާއަށް ފަރުވާ ދިނުމުގައި ކްލިނިކަލް ޕްރޮޓޮކޯލްތަކާ އެއްގޮތަށް އަމަލުކޮށްފައިވޭތޯ، ހޮސްޕިޓަލުގައި އެކުލަވާލާފައިވާ އެފަދަ މައްސަލަ ބަލާ ކޮމިޓީން ތަހުގީގު ކުރަމުންދާ ކަމަށެވެ.

އަދި އެ ކޮމިޓީގެ ހޯދުންތައް ކަމާ ބެހޭ ފަރާތްތަކާ ހިއްސާ ކުރާނެ ކަމަށްވެސް ބަޔާނުގައި ބުނެފައިވެއެވެ.