މިމަހުގެ 19 ވަނަ ދުވަހު އިންޑިއާގައި "ދަ ލަޔަން ކިންގް" ރިލީޒް ކުރާނެއެވެ.

އެ ފިލްމު އެގައުމުގައި ރިލީޒް ކުރުމަށް ހަމަޖެހިފައިވަނީ، އިނގެރޭސި، ހިންދީ، ތަމަޅަ އަދި ޓެލުގޫ ބަހުންނެވެ.

ފިލްމުގެ ހިންދީ ވާޝަންގައި ކިންގް މުސާފާގެ ރޯލަށް އަޑު އަޅައިދިނީ ބޮލީވުޑްގެ ރަސްގެފާނު ޝާހްރުކްހާންއެވެ. އަދި ސިމްބާގެ ރޯލަށް އަޑު އަޅައިދީފައިވަނީ، ޝާހުގެ ފިރިހެން ދަރިފުޅު އާރްޔަން ޚާންއެވެ.

މީގެ ދުވަސްކޮޅެއް ކުރިން ޝާހުގެ އަޑު އިވިގެންދާ ލަޔަން ކިންގްގެ ޓްރެއިލާއެއް ބެލުންތެރިންނަށް ވާނީ ފެނިފައެވެ. އެއާއެކު އެންމެ ގިނަ މީހުން އިންތިޒާރު ކުރީ އާރްޔަންގެ އަޑު އިވޭނެ ޓްރެއިލާއެއް ބެލުމަށެވެ. އެ ޓްރެއިލާ މިމަހުގެ 10 ވަނަ ދުވަހު ވަނީ އާންމުވެފައެވެ.

އާރްޔަންގެ އަޑު އިވިގެންދާ ޓްރެއިލާ ބެލުންތެރިންނާއި ހިއްސާ ކުރީ ޝާހުގެ ރަސްމީ ޓްވިޓަރ އެކައުންޓް މެދުވެރިކޮށް އޭނާ ކުރި ޓްވީޓަކުންނެވެ. އެ ޓްވީޓްގެ ކެޕްޝަންގައި ޝާހު ލިޔެފައިވަނީ "މައި ސިމްބާ" މިފަދައިންނެވެ.

އާރްޔަންގެ އަޑަށް ކޮމެންޓް ކުރި ގިނަ މީހުން ދަނީ އޭނާއަށް ތައުރީފް ކުރަމުންނެވެ.. އެގޮތުން އޭނާގެ އަޑު ބައްޕަގެ އަޑާއި ވަރަށް ވައްތަރު ކަމަށާއި، އެއަޑުގައި ސިމްބާގެ ޖަޒުބާތުތައް ވަރަށް ރަނގަޅަށް ގެނެސްދީފައިވާ ކަމަށްވެސް ގިނަ މީހުން ފާހަގަކުރެއެވެ.