ފީފާއިން ރާއްޖެ ހިމެނޭހެން މެންބަރު ކޮންމެ ގައުމަކަށް 25 މިލިއަން ޑޮލަރު ދޭނެ: ރިޕޯޓް

ދުނިޔޭގެ ފުޓްބޯޅައިގެ މައި އިދާރާ (ފީފާ) ގެ މެންބަރު ކޮންމެ ގައުމަކަށް، ފުޓްބޯޅަ ތަރައްޤީކުރުމަށްޓަކައި 25 މިލިއަން އެމެރިކާ ޑޮލަރު ދިނުމަށް އެ އިދާރާއިން ހުށަހަޅާފައިވާ ހުށަހެޅުން ފާސް ކުރުމަށް މިއަދު ވޯޓުލާން ނިންމައިފިއެވެ.

ޒިއުރިކްގައި މިއަދު އޮންނަ ފީފާ ކައުންސިލް ބައްދަލުވުމުގައި މި ހުށަހެޅުން ފާސްވެއްޖެނަމަ މި އެހީގެ ދަށުން ރާއްޖޭގެ ފުޓްބޯޅަ އެސޯސިއޭޝަން (އެފްއޭއެމް) އަށް ވެސް މި ފައިސާ ލިބިގެންދާނެއެވެ.

އެސޯސިއޭޓެޑް ޕްރެސް (އޭޕީ) އިން ބަލާފައިވާ ފީފާގެ ލިޔުމެއްގައިވާ ގޮތުން، 2027 އިން 2030 އަށް ހިނގާ ހަތަރު އަހަރުގެ ދައުރުގެ ތެރޭގައި ފުޓްބޯޅަ ކުރިއެރުވުމަށްޓަކައި ޖުމްލަ 6.35 ބިލިއަން ޑޮލަރުގެ ފަންޑެއް މެންބަރު ގައުމުތަކަށް ދިނުމަށް ފީފާއިން ވަނީ ހުށަހަޅާފައެވެ. ކުރިން ނިންމާފައި އޮތީ މި މުއްދަތުގައި ކޮންމެ ގައުމަކަށް 10 މިލިއަން ޑޮލަރު ދިނުމަށެވެ. ނަމަވެސް، މި ހުށަހެޅުމާއެކު އެ އަދަދު ވަނީ 25 މިލިއަން ޑޮލަރަށް ބޮޑުކުރަން ނިންމާފައެވެ.

މިދިޔަ އޮކްޓޯބަރު މަހުގެ 14 ވަނަ ދުވަހުގެ ތާރީޚު ޖަހާފައިވާ މި ލިޔުމުގައި ފީފާއިން ބަޔާންކޮށްފައިވާ ގޮތުގައި، 48 ޓީމު ވާދަކުރާ ގޮތަށް ބަދަލުކުރެވުނު ވޯލްޑް ކަޕުން ލިބުނު ބޮޑު ވިޔަފާރީގެ ކާމިޔާބީގެ ސަބަބުން، އެ އިދާރާގެ ރިޒާވުން 3.5 ބިލިއަނަށް ވުރެ ގިނަ ޑޮލަރު މެންބަރު 211 އެސޯސިއޭޝަނަށާއި، ކޮންފެޑެރޭޝަންތަކަށް ބެހުމަށް ވަނީ ކަނޑައަޅާފައެވެ. މީގެއިތުރުން ދުނިޔޭގެ ހަ ބައްރުގެ ކޮންފެޑެރޭޝަންތަކުގެ ތެރެއިން ކޮންމެ ކޮންފެޑެރޭޝަނަކަށް 99 މިލިއަން ޑޮލަރު ދިނުމަށް ވެސް މި ޕްލޭނުގައި ހިމަނާފައިވެއެވެ.

ފީފާއިން ބުނެފައިވަނީ، މި ހުށަހެޅުން ފާސްވެއްޖެނަމަ، މިއީ ކުރިން ކަނޑައަޅާފައިވާ ބަޖެޓަށް ވުރެ ދެގުނަ ބޮޑު އަދަދަކަށް ވާނެ ކަމަށާއި، މީގެ މައިގަނޑު ބޭނުމަކީ އަންހެނުންގެ ފުޓްބޯޅައާއި ޒުވާނުންގެ ފުޓްބޯޅަ ތަރައްޤީކުރުމަށް އިންވެސްޓްކުރުން ކަމަށެވެ.

2027 އިން 2030 އަށް ފުޓްބޯޅަ ތަރައްޤީކުރުމަށް ދޭ ފަންޑު އިތުރުކުރުމަށް ފީފާއިން އެކުލަވާލާފައިވާ މަޝްރޫޢާ ބެހޭގޮތުން، އެ އިދާރާގެ އެންމެ މަތީ ނިންމުންތައް ނިންމާ މަޖިލިސް ކަމަށްވާ ފީފާ ކައުންސިލުން މިއަދު މަޝްވަރާކުރާނެއެވެ. މި ހުށަހެޅުން ފާސްވެއްޖެނަމަ، ކަމާބެހޭ ފަރާތްތަކާއެކު ބާއްވާ މަޝްވަރާތަކަށްފަހު، އަންނަ ޑިސެމްބަރު މަހު ފީފާ ކައުންސިލުން މި ފައިނަލައިޒް ކުރާނެއެވެ. އަދި މި ނިންމުން އެންމެ ފަހުން ތަޞްދީޤުކުރާނީ އަންނަ މާރިޗު މަހު ބާއްވާ ފީފާ ކޮންގްރެސްގައެވެ.

ފީފާއިން މިފަދަ ބޮޑު މާލީ އިނާޔަތެއް ހުށަހަޅާފައި މިވަނީ، އެ އިދާރާގެ ރައީސް ޖިއާނީ އިންފަންޓީނޯ މަގާމުން ދުރުކުރުމަށް ޔޫރަޕްގެ ފުޓްބޯޅަ އިސްވެރިން މަސައްކަތް ކުރަމުންދާ ދަނޑިވަޅެއްގައެވެ. 2016 ވަނަ އަހަރުން ފެށިގެން ފީފާގެ ރައީސްކަން ކުރައްވަމުން ގެންދަވާ އިންފަންޓީނޯ އަންނަ އަހަރު އޮންނަ އިންތިޚާބުގައި ވާދަކުރައްވަން ނިންމަވާފައިވާއިރު، 2026 ގެ ވޯލްޑް ކަޕް އިންތިޒާމުކުރާ ކުންފުނީގެ އަތުން އޭނާ 1.7 މިލިއަން ޑޮލަރުގެ ފައިސާ ނަންގަވާފައިވާ ކަމުގެ އަޑުތަކެއް ވެސް ދާދިފަހުން ވަނީ ފެންމަތިވެފައެވެ.