ސްރީލަންކާ އާއި އަޒަރުބައިޖާނުން ތެލާއި ގޭހުގެ ދާއިރާއިން ގުޅިގެން މަސައްކަތްކުރުމާ މެދު މަޝްވަރާކޮށްފި

ސްރީލަންކާގެ ހާރިޖީ ވަޒީރު ވިޖިތާ ހެރަތު، އަޒަރުބައިޖާނުގެ ރައީސް އިލްހާމް އަލީޔޭވް އާ ބައްކޫގައި ބައްދަލުކުރައްވައި، ހަކަތައިގެ ދާއިރާއިން ހާއްސަކޮށް ތެލާއި ގޭހުގެ ސަޕްލައިގެ ރޮނގުން ދެ ގައުމުގެ ދެމެދުގައި އެއްބާރުލުން ވަރުގަދަކުރެވިދާނެ ގޮތްތަކާ ގުޅޭ ގޮތުން މަޝްވަރާކުރައްވައިފިއެވެ.

މި ބައްދަލުކުރެއްވުމުގައި ހަކަތައިގެ ދާއިރާގެ އިތުރުން ވިޔަފާރިއާއި، އިންވެސްޓްމެންޓާއި، ފަތުރުވެރިކަމުގެ ރޮނގުން ސްރީލަންކާ އާއި އަޒަރުބައިޖާނާ ދެމެދު އޮތް ގުޅުން ބަދަހިކުރުމާ ބެހޭ ގޮތުންވެސް ވާހަކަ ދެކެވުނެވެ.

މިނިސްޓަރު ހެރަތު ބައްކޫއަށް ވަޑައިގެންނެވީ، 2026 ވަނަ އަހަރުގެ އޮކްޓޫބަރު 14 އިން 15 އަށް އެ ސިޓީގައި ބާއްވާ ކޮންފެރެންސް އޮން އިންޓެރެކްޝަން އެންޑް ކޮންފިޑެންސް ބިލްޑިން މެޝާޒް އިން އެއިޝިއާ (ސީކާ)ގެ ހަތް ވަނަ ސަމިޓުގައި ސްރީލަންކާގެ ވަފުދުގެ އިސްވެރިޔާގެ ހައިސިއްޔަތުންނެވެ.

އެ ސަމިޓުގައި "ސްޓްރޯންގާ ސީކާ: ކަނެކްޓިވިޓީ، ޑިޖިޓަލައިޒޭޝަން އެންޑް ސަސްޓެއިނަބަލް ގްރޯތް އިން އެއިޝިއާ" މި ޝިއާރުގެ ދަށުން ސްރީލަންކާގެ ގައުމީ ބަޔާން ހުށަހެޅުއްވުމަށް މިނިސްޓަރު ހެރަތު ވަނީ ތާވަލުކުރައްވައިފައެވެ. މީގެ އިތުރުން، ކަޒަކިސްތާނާއި އުޒްބެކިސްތާނާއި ތަޖިކިސްތާނުގެ މަންދޫބުންނާއި، އަޒަރުބައިޖާނުގެ ބޭފުޅުންނާއި، ސީކާގެ ސެކްރެޓަރީ ޖެނެރަލް އާ ވެސް ވަކިވަކީން ބައްދަލުކުރެއްވުމަށް ހަމަޖެހިފައިވެއެވެ.

މި ދަތުރުގެ ބޭނުމަކީ އެއިޝިއާގެ ގައުމުތަކާ ސްރީލަންކާގެ ޑިޕްލޮމެޓިކް ގުޅުން ބަދަހިކުރުމާ އެކު، ހާއްސަކޮށް މެދު ތެރޭ އެއިޝިއާގެ ކުރިއަރަމުން އަންނަ އިގުތިސާދުތަކާ ގުޅިގެން އާ އިގުތިސާދީ ޕާޓްނާޝިޕްތައް ހޯދުމެވެ. ސީކާ އަކީ އެއިޝިއާ ބައްރުގައި އެއްބާރުލުމާއި ސުލްހައާއި ސަލާމަތާއި ހަމަޖެހުން ކުރިއެރުވުމަށް މަސައްކަތްކުރާ ސަރަހައްދީ ބައިނަލްސަރުކާރީ ފޯރަމެކެވެ.