ސްރީލަންކާގެ ބައެއް ސަރަހައްދުތަކަށް މާދަމާ ހޫނު ގަދަވާތީ ސަމާލުވުމަށް އިލްތިމާސްކޮށްފި
ސްރީލަންކާގެ ބައެއް ސަރަހައްދުތަކަށް އާދީއްތަ ދުވަހު ހޫނުގަދަވާނެތީ އެކަމަށް ރައްޔިތުން ސަމާލުވުމަށް މޫސުމާބެހޭ އިދާރާއިން އިލްތިމާސްކޮށްފިއެވެ.
އެ ގައުމުގެ މޫސުމާ ބެހޭ ގައުމީ އިދާރާއިން ނެރުނު ރީނދޫ ސަމާލުގައި ބުނެފައިވަނީ، ނޮވެމްބަރު މަހުގެ ފުރަތަމަ ދުވަހު އުތުރު-މެދުތެރެ، އިރުމަތި އަދި އުތުރު-ހުޅަނގު ޕްރޮވިންސްތަކުގެ އިތުރުން މަންނާރާއި ވަވުނިޔާ ސަރަހައްދުގައި ހޫނުމިން އިތުރުވާނެ ކަމަށެވެ. މި ސަރަހައްދުތަކުގައި އިންސާނާގެ ހަށިގަނޑަށް އިހުސާސްކުރެވޭ ހޫނުމިން ހުންނާނީ ރައްކާތެރިކަމުގެ ފިޔަވަޅު އަޅަންޖެހޭ މިންވަރެއްގައި ކަމަށެވެ.
މިކަމާ ގުޅިގެން ކަމާބެހޭ އިދާރާތަކުން ވަނީ ދުވާލުގެ ހޫނުގަދަ ވަގުތުތަކުގައި ބޭރުގައި އުޅުމާއި ބުރަ މަސައްކަތް ކުރުން މަދުކުރުމަށާއި، ގިނައިން ފެން ބުއިމަށް އިރުޝާދު ދީފައެވެ. އަދި އަވިން ސަލާމަތްވުމަށް ހިޔާލިބޭ ތަންތަން އިހުތިޔާރު ކުރުމަށް ވެސް އާންމުންނަށް ވަނީ ލަފާދީފައެވެ.
ރާއްޖޭގެ މޫސުމާ ބެހޭ އިދާރާއިން ބުނީ، މިދުވަސްވަރަކީ ހޫނުގަދަ ދުވަސްވަރެއްކަމުން މާދަމާވެސް މެދުރާއްޖެ ތެރެއާއި އުތުރުގެ ބައެއް ހިސާބުތަކަށް ހޫނުމިން ގަދަވާނޭކަމަށް ލަފާކުރެވޭކަމަށެވެ. ނަމަވެސް އިންޒާރެއް ނެރޭވަރަށް ހޫނުމަތިން މަތިވާނޭކަމަށް ނުބެލެވޭކަމަށްވެސް މެޓް އޮފީހުން ވަނީ ފާހަގަކޮސްފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
