އިމްތިހާނަށް ވިސްނައިގެން ކިޔަވައިދެމުން އައިގޮތް ސްރީލަންކާއިން ބަދަލުކޮށްލަނީ

ހަމައެކަނި އިމްތިހާނުތަކަށް އަމާޒުކޮށް ކިޔަވައިދިނުމުގައި ގެންގުޅެމުން އައި ވައްޓަފާޅި ބަދަލުކޮށް، ޒަމާނާ އެއްގޮތަށް ތަޢުލީމީ މަންހަޖު އިސްލާޙުކުރުމުގެ ބޮޑު މަސައްކަތެއް އަވައްޓެރި ސްރީލަންކާއިން ފަށައިފިއެވެ.

މިކަމާ ގުޅޭގޮތުން ވާހަކަފުޅު ދައްކަވަމުން ސްރީލަންކާގެ ބޮޑުވަޒީރު އަދި ތަޢުލީމާ ބެހޭ ވަޒީރު ޑރ. ހަރިނީ އަމަރަސޫރިޔާ ވިދާޅުވީ، އަލަށް ގެންނަ އިޞްލާޙުތަކުގެ މައިގަނޑު މަޤްޞަދަކީ ދަރިވަރުންގެ އަމަލީ ހުނަރާއި، މަޢުލޫމާތާއި އަދި އަޚްލާޤީ ރިވެތި ސިފަތަކުން ފުރިގެންވާ ހަރުދަނާ ޖީލެއް ބިނާކުރުން ކަމަށެވެ. އެތުމަލަޕިޓިޔާ ޕްރައިމަރީ ސްކޫލްގެ އައު ޢިމާރާތް ހުޅުއްވައިދެއްވުމަށްފަހު ދެއްކެވި ވާހަކަފުޅުގައި އެކަމަނާ ވަނީ، މި ބަދަލަކީ މިހާރު އޮތް މުދައްރިސަށް މުޅިން ބިނާވެފައިވާ ނިޒާމުގެ ބަދަލުގައި، ދަރިވަރުންނަށް އިސްކަންދޭ (ސްޓޫޑަންޓް-ސެންޓަރޑް) މޮޑެލްއަކަށް މުޅި ނިޒާމު ފުރޮޅާލުމަށް އެޅިގެންދާނޭ ވަރަށް މުހިންމު ބަދަލެއްކަމަށް ވިދާޅުވެފައެވެ.

ޕްރައިމަރީ ގްރޭޑްތަކުގެ މަންހަޖު އަލުން މުރާޖަޢާކޮށް ބަދަލުކުރުމުގެ މަސައްކަތް ކުރިއަށް ގެންދިއުމަށް ހަމަޖެހިފައިވަނީ ފިޔަވަހިތަކަކަށް ބަހާލައިގެންނެވެ. އެގޮތުން މި އަހަރު އެންމެ ފުރަތަމަ ފިޔަވަހީގެ ދަށުން ގްރޭޑް 1 ގެ ދަރިވަރުންނަށް އަމާޒުކޮށް މި މަސައްކަތް ފަށާފައިވާއިރު، އަންނަ އަހަރު ގްރޭޑް 2 ކުން ފެށިގެން 6 ގެ ދަރިވަރުންނަށް މި އައު މަންހަޖު ތަޢާރަފްކުރެވިގެންދާނެ ކަމަށް ވަޒީރު ހާމަކުރެއްވިއެވެ.

ތަޢުލީމީ ދާއިރާއަށް ދިމާވެފައިވާ އިންސާނީ ވަސީލަތްތަކުގެ ދަތިކަން ޙައްލުކުރުމަށް ކުރެވޭ މަސައްކަތްތަކަށް އަލިއަޅުއްވާލައްވަމުން ޑރ. ހަރިނީ ވިދާޅުވީ، 23,006 މުދައްރިސުން ހޯދުމަށް ބޭއްވި ވާދަވެރި އިމްތިޙާނުތައް މިހާރު ނިމިފައިވާ ކަމަށެވެ. އަދި އޭގެ އިންޓަވިއުތަކާއި ޢަމަލީ އިމްތިޙާނުތައް ކުރިއަށް އޮތް ނޮވެމްބަރު މަހު ފެށޭނެ ކަމަށްވެސް އެކަމަނާ ވިދާޅުވިއެވެ. މީގެއިތުރުން ފާއިތުވި އަހަރުތަކުގައި ހަމަޖެހޭ އުޞޫލެއް ނެތި މުދައްރިސުންނާއި ޕްރިންސިޕަލުން އައްޔަނުކުރުމުގެ ސަބަބުން ތަޢުލީމީ ނިޒާމަށް ބޮޑެތި ގޮންޖެހުންތަކެއް ކުރިމަތިވެފައިވާކަން އެކަމަނާ ފާހަގަކުރެއްވިއެވެ.

މަންހަޖަށް ގެނެވޭ ބަދަލުތަކާ އެކުއެކީގައި، ސްކޫލްތަކުގެ ޢުމްރާނީ ވަސީލަތްތަކާއި، އިންސާނީ ވަސީލަތްތަކުގެ އިތުރުން އިދާރީ ނިޒާމަށްވެސް ކުރިއެރުންތައް ގެންނަންޖެހޭ ކަމަށް ވިދާޅުވަމުން، މި ދާއިރާގެ ފަންނީ ފެންވަރު އެންމެ މަތީ ދަރަޖައިގައި ހިފެހެއްޓުމަށްޓަކައި "އެޑިއުކޭޝަން ކައުންސިލް" އެއް އުފެއްދުމަށް ބޭނުންވާ ޤާނޫނީ މަސައްކަތްތައް ވެސް މިހާރު ފަށްޓަވާފައިވާ ކަމަށް ބޮޑުވަޒީރު ވަނީ އިޢުލާނު ކުރައްވާފައެވެ.

ސްރީލަންކާގެ ތަޢުލީމީ ނިޒާމަށް ގެންނަ މި އިންގިލާބީ ބަދަލުތަކުގެ ސަބަބުން، ހަމައެކަނި ފޮތްތަކާއި އިމްތިޙާނުތަކަށް ބަރޯސާވެފައި އޮތް އޮތުން ނިމުމަކަށް އައިސް، ކުދިންގެ ވިސްނުމާއި ހުނަރުތައް ތަރައްޤީވެ، އަޚްލާޤީ ގޮތުން ފުރިހަމަ މުސްތަޤުބަލެއް ބިނާކުރުމަށް މަގުފަހިވެގެންދާނެ ކަމަށް ދާއިރާގެ ފަރާތްތަކުން ވަނީ ފާހަގަކޮށްފައެވެ.

ސްރީލަންކާގެ ޕްރައިމަރީ ތައުލީމަކީ ތާރީޚީގޮތުންނާއި ތަފާސްހިސާބުތަކަށް ބެލިނަމަވެސް ދުނިޔޭގެ ފެންވަރުގައާއި، ޚާއްސަކޮށް ދެކުނު އޭޝިއާ ސަރަހައްދުގައި ފާހަގަކޮށްލެވޭ ފަދަ ކާމިޔާބު ނިޒާމެއްކަމަށް މީގެ ކުރިން ޔުނިސެފުންވެސް ވަނީ ފާހަގަކޮށްފައެވެ. އެގޮތުން ދެކުނު އޭޝިއާއަށް ނިސްބަތްވާ އިންޑިއާ އަދި ޕާކިސްތާނަށް ބެލިނަމަވެސް ސްރީލަންކާގެ ޕްރައިމަރީ ތައުލީމީ މަންހަޖު ކާމިޔާބުކަމަށް ޔުނިސެފުން ފާހަގަކުރެއެވެ.