ދޮޅު އަހަރަށްފަހު ދަގަނޑޭ ގައުމީ ޓީމަށް ނަގައިފި
ދޮޅު އަހަރުގެ މެދުކެނޑުމަކަށްފަހު ގައުމީ ޓީމްގެ އެއް ނަންބަރު ފޯވާޑް އަލީ އަޝްފާގު (ދަގަނޑޭ)، ސްކޮޑްގައި ހިމަނައިފިއެވެ.
ދަގަނޑޭ ގައުމީ ފުޓްބޯޅަ ޓީމްގެ ސްކޮޑްގައި ހިމެނުމަށް ނިންމާފައިވަނީ އަންގާރަ ދުވަހު މާލޭގައި ވޯލްޑް ކަޕް ކޮލިފައިންގގައި ޗައިނާއާއި ދެކޮޅަށް ކުޅޭ މެޗްގައެވެ.
މިހާރު ދަގަނޑޭ ދަނީ ގައުމީ ޓީމާއި އެކު ހޮޓެލް ޖެންގައި ކޭމްޕްކުރަމުންނެވެ. މާދަމާ އޮންނަ ގައުމީ ޓީމުގެ ޕްެރެކްޓިސްއިންވެސް ދަގަނޑޭ ފެންނާނެކަމަށް މައުލޫމާތު ލިބެއެވެ.
މިދިޔަ އަހަރު ބޫޓާނާ ދެކޮޅަށް ކުޅުނު މެޗުގެ ކުރިން ބޭއްވި ޕްރެސް ކޮންފަރެންސަށް ހާޒިރުނުވުމުން އަދަބެއްގެ ގޮތުން ދަގަނޑޭ ވަނީ ގައުމީ ޓީމަށް ނެގުން ހުއްޓާލާފައެވެ. އޭގެ ފަހުން ކޯޗް ޕީޓަރ ސެގާޓް ބުނީ ދަަގަނޑޭ އަދި ބަކާ ފަދަ ކުޅުންތެރިން ގައުމީ ޓީމަށް ނެގެންނެތީ އުމުރުން ދުވަސްވުމުގެ ސަބަބުން ކަމަށެވެ.
ދަގަނޑޭ ގައުމީ ޓީމަށް ނުނަގާ މައްސަލައިގައި ގިނަ ބަޔެއްގެ ފާޑުކިޔުން އަމާޒުވެފައިވަނިކޮށް ދާދި ފަހުން އެފްއޭއެމްގެ ރައީސް ބައްސާމް އަދީލް ޖަލީލް ވަނީ ދަގަނޑޭއާ އެކު ބައްދަލުވުމެއް ބާއްވާފައެވެ.
ފާހަގަކޮށްލެވޭ ގޮތުގައި މީގެ ކުރިން ރާއްޖެއަށް ޗައިނާގެ އަތުން މޮޅެއް ލިިބިފައެއް ނުވެއެވެ.
Advertisement
This content is created and paid for by advertisers and does not involve Voice Journalists