ޒަކާތާއި ވަގުފް އިންވެސްޓްމަންޓްތަކުން އަހަރަކު 250 މިލިއަން ރުފިޔާ ހޯދުމަށް އަމާޒުހިފައިފި
ދައުލަތުގެ ބަޖެޓަށް ބަރޯސާވުން ކުޑަކޮށް، ޒަކާތުގެ ފަންޑުތަކާއި ވަގުފް އިންވެސްޓްމަންޓްތަކުން އަހަރަކު ގާތްގަނޑަކަށް 250 މިލިއަން ރުފިޔާގެ އާމްދަނީއެއް ހޯދުމަށް އިސްލާމިކް މިނިސްޓްރީން އަމާޒު ހިފައިފިއެވެ.
އިސްލާމިކް މިނިސްޓްރީން ބުނީ އެ އެ އިންވެސްޓްމަންޓްތަކުން ލިބޭ އާމްދަނީ ބޭނުންކުރާނީ މުވައްޒަފުންގެ މުސާރަ ނުހިމަނައި، މިނިސްޓްރީގެ އިދާރީ ހިންގުމާއި އިސްލާމީ ތަރައްގީގެ މަޝްރޫއުތަކަށް ބޭނުންވާ ފައިސާ ހަމަޖެއްސުމަށެވެ. މި ތަސައްވުރުގެ ދަށުން 2028 ވަނަ އަހަރުގެ ނިޔަލަށް ވަގުފްގެ 8 މަޝްރޫއެއް ނިންމުމަށް ރާވާފައިވާ ކަމަށް މިނިސްޓްރީން ބުނެއެވެ.
ޒަކާތުގެ ފައިސާ ހަރަދުކުރާނީ ޝަރުއީ ހަމަތަކާ އެއްގޮތަށް ކަމަށާއި، ވަގުފް އިންވެސްޓްމަންޓްތަކުން ލިބޭ ފައިދާ ބޭނުންކުރާނީ އެ މަޝްރޫއުތައް ހާއްސަކޮށްފައިވާ މަގްސަދުތަކަށް އެކަނި ކަމަށް އެ މިނިސްޓްރީން ފާހަގަކޮށްފައިވެއެވެ.
މި އިސްނެގުމުން ފައިދާކުރާނެ ދާއިރާތަކުގެ ތެރޭގައި މިސްކިތްތައް ބިނާކޮށް މަރާމާތުކުރުމާއި، އިސްލާމީ ތައުލީމު ފުޅާކުރުމާއި، އިމާމުންނާއި ދީނީ އިލްމުވެރިންނަށް އެހީތެރިވުން ހިމެނެއެވެ. އަދި ކީރިތި ގުރުއާން އުނގަންނައިދިނުމުގެ ފުރުސަތުތައް ފަހިކުރުމާއި މުޖުތަމައުގެ ދީނީ ހޭލުންތެރިކަން އިތުރުކުރުމުގެ މަޝްރޫއުތަކަށް ވެސް މި އާމްދަނީ ބޭނުންކުރާނެ ކަމަށް މިނިސްޓްރީން ބުނެއެވެ.
މި ފިޔަވަޅުގެ ސަބަބުން ދީނީ ކަންކަން ކުރިއެރުވުމުގައި މިނިސްޓްރީގެ މުއައްސަސާތީ ގާބިލުކަން ދިގު މުއްދަތަކަށް އިތުރުވާނެ ކަމަށާއި، މިއީ އަންނަން އޮތް ޖީލުތަކަށް ދާއިމީ ތަރިކައެއް ކަމުގައި އެ މިނިސްޓްރީންވަނީ ފާހަގަކޮށްފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
