މިއަހަރުގެ މިހާތަނަށް 2،000 އަށްވުރެ ގިނަ އެކްސިޑެންޓް

މިއަހަރުގެ މިހާތަނަށް ރިޕޯޓުކުރި އެކްސިޑެންޓުތަކުގެ އަދަދު 2,000 އިން މައްޗަށް އަރާފައިވާ ކަމަށާއި، އޭގެ ތެރެއިން 96 ހާދިސާ ހިނގީ މި މަހު ކަމަށް ފުލުހުންގެ ތަފާސް ހިސާބުން ހާމަކޮށްފިއެވެ.

ފުލުހުންގެ ވެބްސައިޓުގައި އާންމުކުރި ތަފާސްހިސާބުތަކަށް ބަލާއިރު، މިއަހަރުގެ މިހާތަނަށް 2,379 އެކްސިޑެންޓް ރިޕޯޓުކޮށްފައިވެއެވެ. މި އަހަރު ފުލުހުންނަށް ރިޕޯޓުކުރި ޖުމްލަ 9,912 މައްސަލައިގެ ތެރޭގައި ދެވަނައަށް އެންމެ ގިނައީ އެކްސިޑެންޓުތަކެވެ. އެންމެ ގިނަ މައްސަލަތަކަކީ ވައްކަމުގެ ކުށުގެ މައްސަލަތަކެވެ. އެގޮތުން، ވައްކަމުގެ 2,753 މައްސަލަ ރިޕޯޓުކޮށްފައިވެއެވެ.

މާލެ ސަރަހައްދުގައި އެކްސިޑެންޓުތައް އިތުރުވެފައިވާއިރު، ނުރައްކާތެރި ގޮތުގައި އުޅަނދު ދުއްވުން ހުއްޓުވުމަށް ފުލުހުން ދަނީ ހާއްސަ ފިޔަވަޅުތަކެއް އަޅަމުންނެވެ. މި މަހުގެ ފުރަތަމަ ދުވަހު ތަންފީޒުކުރަން ފެށި އެއްގަމު ދަތުރުފަތުރުގެ ގާނޫނުގެ ދަށުން، މަގުމަތީގެ ގަވާއިދާ ހިލާފުވާ ފަރާތްތަކަށް ބޮޑެތި ޖޫރިމަނާތައް ކުރުމުގެ ބާރު ފުލުހުންނަށް ދީފައެވެ.

ރަޖިސްޓަރީ ނުކޮށް ނުވަތަ ގަވާއިދާ ހިލާފަށް އުޅަނދު ދުއްވާ މީހަކަށް ފުރަތަމަ ފަހަރު 500 ރުފިޔާގެ ޖޫރިމަނާއެއް ކުރާނެ ކަމަށް އެ ގާނޫނުގައި ބަޔާންކޮށްފައިވެއެވެ. ދެވަނަ ފަހަރަށް ޖޫރިމަނާކުރާނީ 750 ރުފިޔާއިންނެވެ. ތިންވަނަ ފަހަރުން ފެށިގެން ކޮންމެ ފަހަރަކަށް 1,000 ރުފިޔާގެ ޖޫރިމަނާއެއް ކުރެވޭނެއެވެ.

އެކްސިޑެންޓްތައް އިތުރުވުމާއި ގުޅިގެން ދާދިފަހުން ރައްޔިތުންގެ މަޖިލީހުން ވެސް ވަނީ ފުލުހުން އެ އިދާރާއަށް ހާޒިރުކުރޮށް ސުވާލުކުރުމަށް ނިންމާފައެވެ.