މާލޭ އުތުރުފަރާތުގައި ހަދާ ފިންގަރ ޖެޓީގެ ކޮންކްރީޓުގެ މަސައްކަތް ފަށަނީ

މާލޭ އުތުރު ފަރާތު ބަނދަރުގައި ތަރައްގީކުރާ ފިންގަރ ޖެޓީގެ 15 މީޓަރުގެ ޖެޓީތަކުގެ ކޮންކްރީޓް އެޅުމުގެ މަރުހަލާ ފެށުމަށް ތައްޔާރުވަމުންދާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ބުނެފިއެވެ.

އެމްޓީސީސީން އެކްސްގައި ކުރި ޕޯސްޓެއްގައި ބުނީ، މި ވަގުތު ކުރިއަށް ދަނީ ޖެޓީގެ ތަނބުތައް ބެހެއްޓުމާއި ދަގަނޑު އެޅުމުގެ މަސައްކަތްތައް ކަމަށެވެ. މި ދެ މަރުހަލާ ނިމުމާ އެކު، އަންނަ ހަފުތާ ތެރޭގައި ޖެޓީގެ ކޮންކްރީޓް މަސައްކަތް ފެށޭނެ ކަމަށް އެމްޓީސީސީން ލަފާކުރެއެވެ.

ޖުމްލަ 18.98 މިލިޔަން ރުފިޔާ ހޭދަވާ މި މަޝްރޫއުގައި ހެދުމަށް ރާވައިފައި ވަނީ 25 މީޓަރު ދިގު، ހަ މީޓަރު ފުޅާ ތިން ޖެޓީއާއި 15 މީޓަރު ދިގު، ހަ މީޓަރު ފުޅާ ތިން ޖެޓީއެވެ.

އެމްޓީސީސީން ފާހަގަކުރި ގޮތުގައި، މި ޖެޓީތައް ނިމުމުން ބަނދަރުގައި ތޮއްޖެހުން ކުޑަވެ، ގިނަ އުޅަނދުތަކަކަށް އެއް ފަހަރާ ޖެޓީ ބޭނުންކުރެވޭނެއެވެ. އެ ކުންފުނިން ބުނީ، މިހާރު ބޭރުގައި އޮންނަ ލޯންޗަކަށް އެރުމަށް މަގަތުގައި ހުންނަ ލޯންޗުން އެއް ލޯންޗުން އަނެއް ލޯންޗަށް އަރައިގެން އުފުލަން ޖެހޭ ތަކުލީފު މި މަޝްރޫއާ އެކު ނިމުމަކަށް އަންނާނެ ކަމަށެވެ.

މީގެ އިތުރުން، ކުޑަކުދިންނާއި އިސް ރައްވެހިން އަދި ލަގެޖު ހިފައިގެން ދަތުރުކުރާ ފަރާތްތަކަށް ވެސް ބޮޑެތި ލުއިތަކެއް ލިބޭނެއެވެ. ޖެޓީތައް ބޭނުންކުރެވެން ފެށުމުން ދަތުރުތައް އަވަސްވެ، އުޅަނދުފަހަރަށް އެރުމާއި ފައިބާ ދަތުރުވެރިންނަށް އިތުރު ރައްކާތެރިކަން ކަށަވަރުވެގެންދާނެ ކަމަށް ވެސް އެ ކުންފުނިން ބުނެފައިވެއެވެ.

މި މަޝްރޫއަކީ އާންމު ރައްޔިތުންނާއި ދަތުރުވެރިންނަށް ފަސޭހަ ހިދުމަތެއް ފޯރުކޮށްދިނުމަށް ހިންގާ މަޝްރޫއެކެވެ.