ހައިވޭ އެކްސިޑެންޓް؛ އެއީ ފުލުހުންގެ ވާޖިބަށް ހުރަސްއެޅުމަށް ގަސްދުގައި ހިންގި އަމަލެއް

ސިނަމާލެ ބްރިޖް ހައިވޭގައި ރޭ ފަތިހު ހިނގި ނުރައްކާތެރި އެކްސިޑެންޓަކީ ފުލުހުންގެ ގާނޫނީ ވާޖިބަށް ހުރަސްއަޅައި، ފުލުހުން ފަހަތަށް ޖެއްސުމަށްޓަކައި ބަޔަކު ގަސްދުގައި ހިންގި އަމަލެއް ކަމަށް ބެލެވޭ ކަމަށް ކޮމިޝަނަރ އޮފް ޕޮލިސް އަޙްމަދު މުޙައްމަދު ވިދާޅުވެއްޖެއެވެ.

މި ހާދިސާ ހިނގާފައިވަނީ މިއަދު ފަތިހު 04:29 އެހައިކަންހާއިރު، ހައިވޭއިން މާލެއިން ހުޅުމާލެއަށް ދަތުރުކުރާ ފަޅީގައި ގާއިމުކޮށްފައިވާ ވެހިކަލް ޗެކްޕޮއިންޓް ކައިރީގައެވެ. އެގޮތުން، ގަޑިއަކު 100 ކިލޯމީޓަރަށްވުރެ ބާރު ސްޕީޑުގައި ދުއްވާފައިދިޔަ އެ ސައިކަލް ހައިވޭގައި ތިބި ފުލުހުންނާ ދިމާއަށް ގޮސް ފުލުހުން ޖަހާފައިވާ ބެރިކޭޑުގައި ޖެހުމަށްފަހު، އެވަގުތު ޑިއުޓީގައި ހުރި ފުލުސް އޮފިސަރުގެ ގައިގައި ވަނީ ބާރަށް ޖެހިފައެވެ. މި އެކްސިޑެންޓްގައި އެވަގުތު ހައިވޭ ޕެޓްރޯލްކުރަމުންދިޔަ ފުލުހަށް ވަނީ ސީރިއަސް އަނިޔާތަކެއް ލިބިފައެވެ. ފުލުހުންގެ އޮފިސަރަށް ލިބުނު އަނިޔާތަކަށް އޭޑީކޭގައި މިހާރު ދަނީ ފަރުވާދެމުންނެވެ.

މިކަމާ ގުޅޭގޮތުން ޕޮލިސް ކިމިޝަނަރު ނެރުއްވު ބަޔާނުގައި ވިދާޅުވީ، މި ނުރައްކާތެރި ހާދިސާގައި ވާޖިބު އަދާކުރަން ހުރި ފުލުސް އޮފިސަރަށް ވަނީ ސީރިއަސް ބޮޑެތި އަނިޔާތަކެއް ލިބިފައިވާކަމަށެވެ. އެގޮތުން އޮފިސަރުގެ އަނގަމަތި ފަޅައިގެންގޮސް ދަތްތައް ބިނދިފައިވާކަމަށް ވިދާޅުވިއެވެ. މި އަމަލު ހަރުކަށި އިބާރާތުން ކުށްވެރިކުރައްވައި ސީޕީ ވިދާޅުވީ، މިއީ މަގުމަތީގައި ނުރައްކާތެރިކޮށް އުޅަނދު ދުއްވާ ފަރާތްތަކާ ދެކޮޅަށް ފުލުހުން ފަށާފައިވާ ހާއްސަ އޮޕަރޭޝަން ހުއްޓުވައި، ފުލުހުން ނަފްސާނީ ގޮތުން ބަލިކަށިކޮށްލުމަށް ބަޔަކު ރާވައިގެން ހިންގި އަމަލެއް ކަމަށް ބެލެވޭ ކަމަށެވެ.

މި ހާދިސާ ހިނގި ވަގުތު އެ ސަރަހައްދުގައި އިތުރު ތިން ސައިކަލެއް ހަރަކާތްތެރިވިކަން ފާހަގަކުރެވިފައިވާ ކަމަށް ފުލުހުން ބުނެއެވެ. އަދި ފުލުސް މީހާގެ ގައިގައި ޖެއްސި ސައިކަލު ޓޯކޮށް، އޭގައި ތިބި ދެ މީހުންނާއި، މިކަމުގައި ޝާމިލުވާ އިތުރު ދެ މީހަކު ސައިކަލަކާއެކު ހޯދައި މިހާރު ވަނީ ފުލުހުންގެ ބެލުމުގެ ދަށަށް ގެނެސްފައެވެ.

ކޮމިޝަނަރ އޮފް ޕޮލިސްގެ ބަޔާނުގައި ވިދާޅުވީ، ފުލުހުންނަށް އަމާޒުކޮށް ކުރިމަތިކުރާ މިފަދަ ޖިސްމާނީ އަދި ނަފްސާނީ އެއްވެސް ބިރުދެއްކުމަކަށް ފަސްނުޖެހި، ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމުގައި ފުލުހުން ސާބިތުކަމާއެކު ދެމިތިބޭނެ ކަމަށެވެ. އަދި މަގުމަތީގެ އަމަންއަމާންކަން ނަގާލާ ފަރާތްތަކާ ދެކޮޅަށް ކުރިއަށްގެންދާ ހާއްސަ އޮޕަރޭޝަން މެދުކެނޑުމެއްނެތި ކުރިއަށް ގެންދާނެ ކަމަށާއި، މިފަދަ ނުރައްކާތެރި އަމަލުތައް ހިންގާ ފަރާތްތަކާމެދު ގާނޫނީ ހަމަތަކުގެ މަތިން އެޅެންހުރި އެންމެ ހަރުކަށި ފިޔަވަޅު އަޅާނެ ކަމުގެ ޔަގީންކަން ވެސް ސީޕީ ވަނީ ދެއްވާފައެވެ.