ދަނޑުވެރިކަން ދެމެހެއްޓެނިވި ގޮތެއްގައި ކުރިއަށް ގެންދަން ޖެހޭ: ޝިޔާމް

ރާއްޖޭގެ ދަނޑުވެރިކަން މުސްތަޤުބަލުގައި ދެމެހެއްޓެނިވި ގޮތެއްގައި ކުރިއަށް ގެންދަން ޖެހޭ ކަމަށް ދަނޑުވެރިކަމާއި ދިރޭތަކެއްޗާ ބެހޭ މިނިސްޓަރު ވިދާޅުވެއްޖެއެވެ.

ދުނިޔޭގެ ކާބޯތަކެތީގެ ދުވަހާއި ޤައުމީ ދަނޑުވެރިންގެ ދުވަސް ފާހަގަކުރުމުގެ ގޮތުން، އައްޑޫސިޓީ މީދޫގައި ބޭއްވި ޚާއްޞަ ފޯރަމް ޝަރަފުވެރިކޮށްދެއްވައި ވާހަކަފުޅު ދައްކަވަމުން ވަޒީރު ވިދާޅުވީ، ދަނޑުވެރިކަމުގެ ދާއިރާގައި މީދޫއަކީ ފާހަގަކޮށްލެވޭ ފަދަ ދިގު މާޒީއެއް އޮތް ރަށެއް ކަމަށެވެ.

އެގޮތުން މިއަދު ފެންނަމުންދާ ޒަމާނީ ދަނޑުވެރިކަމުގެ ހަރުފަތަށް ވާޞިލުވުމުގައި އެ ރަށުގެ ދަނޑުވެރިން އަގުހުރި، ބުރަ މަސައްކަތްތަކެއް ކޮށްފައިވާ ކަމަށް ވަޒީރު ވިދާޅުވިއެވެ. މީގެއިތުރުން، މި ޞިނާޢަތުގެ މުސްތަޤުބަލު އުޖާލާކުރުމަށްޓަކައި ޒުވާނުންގެ ޙިއްޞާއާއި ޒިންމާދާރުކަން ނުހަނު މުހިންމުކަން ފާހަގަކުރައްވައި، ފޮތްތަކުން ލިބޭ ޢިލްމުގެ އިތުރުން ޢަމަލީ ތަޖުރިބާ ހޯދުމަށް އިސްކަންދިނުމަށް ދަރިވަރުންނަށް ވަޒީރު އިލްތިމާސްކުރެއްވިއެވެ.

މުސްތަޤުބަލުގައި ދަނޑުވެރިކަން ދެމެހެއްޓެނިވި ގޮތެއްގައި ކުރިއަށްގެންދަން އެބަޖެހޭ. އެކަން ޙާޞިލުކުރުމުގެ މައިގަނޑު ބަޔަކީ ތިޔަ ލޮބުވެތި ދަރިވަރުން. އެހެން ޤައުމުތަކާ އަޅާބަލާއިރު ރާއްޖޭގެ ދަނޑުވެރިކަމުގެ ވެށި ވަރަށް ތަފާތު. ހަމައެއާއެކު، މޫސުމީ ބަދަލުތަކުގެ ނޭދެވޭ އަސަރު އެންމެ ބޮޑަށް ފޯރާނެ ނާޒުކު ޤައުމުތަކުގެ ތެރޭގައި ރާއްޖެ ހިމެނޭކަން އަބަދުވެސް ހަނދާންކުރަންޖެހޭ،

މި ފޯރަމުގައި، ދަނޑުވެރިކަމުގެ ދާއިރާއަށް ބޭނުންވާ ޒަމާނީ އީޖާދުތަކާއި އެ ދާއިރާގެ ކުރިމަގާ މެދު ދެކޭގޮތުގެ މައްޗަށް އެކުލެވޭ ޚާއްޞަ ޕްރެޒެންޓޭޝަނެއް ސ. އަތޮޅު މަދަރުސާގެ ދަރިވަރުން ވަނީ ހުށަހަޅައިދީފައެވެ. މީގެއިތުރުން، ދަނޑުވެރިކަމުގެ ޞިނާޢަތަށް ކުރިމަތިވަމުންދާ ގޮންޖެހުންތައް ދެނެގަނެ، އެކަންކަން ޙައްލުކުރުމަށް އެޅިދާނެ ހަރުދަނާ ފިޔަވަޅުތަކާ ގުޅޭގޮތުން ފުޅާ ދާއިރާއެއްގައި މަޝްވަރާކުރުމަށް ޚާއްޞަ ޕެނަލް ޑިސްކަޝަނެއްވެސް ވަނީ ކުރިއަށް ގެންގޮސްފައެވެ.

ދަނޑުވެރިކަމުގެ ދުވަހުގެ ޕްރޮގްރާމްތަކުގެ ތެރެއިން ވަޒީރު ވަނީ، ކެނަރީފް ރިސޯޓް މޯލްޑިވްސްގައި ބޭއްވުނު "ވިލުންވެށި ސްކޫލް ގާރޑަން ޕްރޮގްރާމް"ގައިވެސް ބައިވެރިވެވަޑައިގެންފައެވެ.

"އެންހޭންސިންގ ކްލައިމެޓް ރެސިލިއަންސް އެންޑް ފުޑް ސެކިއުރިޓީ" މަޝްރޫޢުގެ ދަށުން ކުރިއަށްގެންދާ މި ޕްރޮގްރާމުގެ މައިގަނޑު މަޤްޞަދަކީ، ސްކޫލު މާޙައުލުގައި ދަނޑުވެރިކަން ފުޅާކުރުމާއެކު، މޫސުމީ ބަދަލުތަކަށް ވިލުންވެރިވުމާ ގުޅޭގޮތުން ދަރިވަރުން އަހުލުވެރިކުރުވުމެވެ. މީގެއިތުރުން، ކާނާގެ ރައްކާތެރިކަން ކަށަވަރުކޮށް، ދެމެހެއްޓެނިވި ގޮތެއްގައި ކާބޯތަކެތި އުފެއްދުމުގެ ރަނގަޅު އާދަ ދަރިވަރުންގެ ކިބައިގައި އަށަގެންނެވުމަކީވެސް މި ޕްރޮގްރާމުގެ މުހިންމު ލަނޑުދަނޑިއެކެވެ.