15 އަހަރުގެ ކޮލެޖުތައް ޔުނިވާސިޓީތަކައް ބަދަލުކުރެވޭ ގޮތް ހަދައިފި

ރާއްޖޭގައި މެދުކެނޑުމެއް ނެތި 15 އަހަރު ވަންދެން ހިންގަމުން އަންނަ ކޮލެޖުތައް ޔުނިވާސިޓީތަކަށް ބަދަލުކުރެވޭ ގޮތް ހަމަޖައްސައި، އެކަމާ ގުޅޭ އައު ގަވައިދު ސަރުކާރުގެ ގެޒެޓުގައި ޝާއިޢުކޮށްފިއެވެ.

ޔުނިވާސިޓީތައް ރާއްޖޭގައި ރަޖިސްޓްރީކޮށް ހިންގުމާ ބެހޭ މި ގަވައިދުގެ ދަށުން، ރާއްޖޭގެ ކޮލެޖުތަކުގެ އިތުރުން، ބޭރު ޤައުމުތަކުގައި މަދުވެގެން 10 އަހަރު ދުވަހު ހިންގާފައިވާ، އަދި އެ ޤައުމުތަކުގެ ސަރުކާރުން ބަލައިގަންނަ ޔުނިވާސިޓީތައް ވެސް ރާއްޖޭގައި ރަޖިސްޓްރީ ކުރުމުގެ ފުރުޞަތު ވަނީ ހުޅުވާލާފައެވެ.

އަލަށް އެކުލަވާލި ގަވައިދުގައި ބަޔާންކޮށްފައިވާ ގޮތުގައި، ދިވެހި ކޮލެޖެއް ޔުނިވާސިޓީއަކަށް ބަދަލުކުރުމަށްޓަކައި ހަރުދަނާ ޝަރުތުތަކެއް ފުރިހަމަވާން ޖެހެއެވެ. އެގޮތުން، ޤައުމީ ސަނަދުތަކުގެ އޮނިގަނޑުގެ ލެވެލް ހަތެއް އަދި ނުވައެއްގެ ކޯސްތައް މަދުވެގެން ތިން ދާއިރާއަކުން ވޭތުވެދިޔަ ފަސް އަހަރު ވަންދެން މެދުނުކެނޑި ހިންގާފައި ވާންޖެހެއެވެ. އަދި މޯލްޑިވްސް ކޮލިފިކޭޝަންސް އޮތޯރިޓީ (އެމްކިއުއޭ) އިން އެކްރެޑިޓު ކޮށްފައިވާ ކޯސްތަކުގައި މަދުވެގެން 1000 ދަރިވަރުން ކިޔަވަމުން ގެންދަން ޖެހޭއިރު، ފާއިތުވި ތިން އަހަރު ވެސް ދަރިވަރުންގެ ޢަދަދު މި މިންވަރަށް ވުރެ ދަށަށް ނުގޮސް ހިފެހެއްޓިފައި ހުންނަން ޖެހޭނެއެވެ.

މީގެއިތުރުން، ބައިނަލްއަޤުވާމީ ޔުނިވާސިޓީ ރޭންކިންގައި ބައިވެރިވެ ރޭންކު ކުރެވިފައި ވުމާއި، ބައިނަލްއަޤުވާމީ ކޮލިޓީ އެޝުއަރެންސް ޖަމާޢަތެއްގެ މެންބަރެއްގެ ގޮތުގައި ފަސް އަހަރު ހޭދަކޮށްފައި ވުން އަދި ބޭރުގެ ޔުނިވާސިޓީތަކާ ގުޅިގެން ރިސާޗު ހިންގި ކަމުގެ ތަޖުރިބާ ލިބިފައިވުން ވެސް ޝަރުތުތަކުގެ ތެރޭގައި ހިމެނެއެވެ. ހަމައެއާއެކު، ޔުނިވާސިޓީއަކަށް ބަދަލުވާން ހުށަހަޅާ ކޮލެޖުގެ މުވައްޒަފުންގެ 10 އިންސައްތައަކީ ޕީއެޗްޑީ ޙާޞިލުކޮށްފައިވާ ފުލްޓައިމް މުވައްޒަފުންނަށް ވާންޖެހޭނެ ކަމަށާއި، ޔުނިވާސިޓީއެއް ހިންގުމަށް ބޭނުންވާ ވަސީލަތްތައް ވުޒާރާއިން ކަނޑައަޅާ މިންގަނޑަށް ޤާއިމުކޮށްފައި ހުންނަން ޖެހޭނެ ކަމަށް ވެސް ގަވައިދުގައިވެއެވެ.

ޔުނިވާސިޓީ ރަޖިސްޓްރީ ކުރުމުގެ މަރުޙަލާތައް ކުރިއަށް ގެންދާނީ ހަޔާ އެޑިއުކޭޝަން ވުޒާރާއިން ޚާއްޞަކުރާ ޕޯޓަލެއް މެދުވެރިކޮށެވެ. ހުށަހެޅޭ ޕްރޮޕޯސަލްތަކާއި ލިޔެކިޔުންތައް ދިރާސާކޮށް އެސެސްމަންޓު ރިޕޯޓު ތައްޔާރުކުރާނީ ފަސް މެންބަރުންގެ މައްޗަށް އެކުލެވޭ ފަންނީ ކޮމިޓީއަކުންނެވެ. މި ކޮމިޓީގައި ހިމެނެނީ މަތީ ތަޢުލީމުގެ ދެ ތަޖުރިބާކާރަކާއި، ހަޔާ އެޑިއުކޭޝަން ވުޒާރާގެ އިސް މުވައްޒަފަކާއި، އެމްކިއުއޭގެ އިސް މުވައްޒަފެއްގެ އިތުރުން މާލީ ދާއިރާގެ މެންބަރެކެވެ.

މި ގަވައިދުގެ ދަށުން ކޮންމެ ތިން އަހަރަކުން އެއްފަހަރު ޔުނިވާސިޓީގެ އޮޑިޓެއް އެމްކިއުއޭ އިން ކުރިއަށް ގެންދަން ޖެހޭނެއެވެ. އަދި އެއްވެސް މައްސަލައެއް ކުރިމަތިވެއްޖެ ޙާލަތެއްގައި ކުރިން އެންގުމަކާ ނުލައި މައްސަލަ ބަލައި ފިޔަވަޅު އެޅުމުގެ ބާރު ވެސް ވުޒާރާ އަށާއި އެމްކިއުއޭ އަށް ގަވައިދުން ވަނީ ދީފައެވެ.

ރާއްޖޭގައި މިވަގުތު ހިންގަމުން އަންނަނީ ދައުލަތުގެ ދެ ޔުނިވާސިޓީ ކަމަށްވާ މޯލްޑިވްސް ނޭޝަނަލް ޔުނިވާސިޓީ (އެމްއެންޔޫ) އާއި އިސްލާމިކް ޔުނިވާސިޓީ އޮފް މޯލްޑިވްސް (އައިޔޫއެމް) އެވެ. މީގެ އިތުރުން ފުޅާ ދާއިރާއެއްގައި މަތީ ތަޢުލީމު ފޯރުކޮށްދޭ ގިނަ އަދަދެއްގެ އަމިއްލަ ކޮލެޖުތައް ވެސް ރާއްޖޭގައި މެދުނުކެނޑި ދަނީ ހިންގަމުންނެވެ.