އިސްރާއީލްގެ ޕާސްޕޯޓަށް ވީތީ މަނާކުރާކަށް ނުފެނޭ؛ އެ ޕާސްޕޯޓްގައި އަރަބިންނާ މުސްލިމުން އުޅޭ: ނާޒިމް

އިޒްރޭލް ޕާސްޕޯޓް އޮންނަ އެންމެން ރާއްޖެ އައުން މަނާކުރަން ނުފެންނަ ކަމަށާ، އެ ޕާސްޕޯޓް އޮންނަ އަރަބިންނާއި މުސްލިމުން އުޅޭ ކަމަށް، މަޖިލީހުގެ ނާއިބު ރައީސް އަދި ދިއްގަރު ދާއިރާގެ މެންބަރު އަހްމަދު ނާޒިމް ވިދާޅުވެއްޖެއެވެ.

އިޒްރޭލްގެ ޕާސްޕޯޓު މަނާކުރުމަށް އިމިގްރޭޝަން ގާނޫނަށް ހުށަހެޅި އިސްލާހާ ގުޅޭ ގޮތުން މިއަދު ބޭއްވި 241 ކޮމިޓީގެ ބައްދަލުވުމުގައި ވާހަކަ ދައްކަވަމުން ނާޒިމް ވިދާޅުވީ، އިޒްރޭލްގެ ޕާސްޕޯޓު މަނާކުރުމުގެ ވާހަކަ ދެކެވޭއިރު، ތަފާސް ހިސާބުތަކަށް ރިޢާޔަތްކޮށް ކަންކަން ބަލަންޖެހޭ ކަމަށެވެ.

އެގޮތުން ރާއްޖެ އެތެރެވީ މީހުންގެ ތެރެއިން އިސްރާއީލް ޕާސްޕޯޓް އޮތް މީހުންގެ އަދަދަށް ބަލަންޖެހޭ ކަމަށާ، އަދި އިސްރާއީލްގެ ޕާސްޕޯޓް އޮންނަ އެހެން ގައުމުތަކުގެ މީހުން އުޅޭއިރު އެކަންކަމަށްވެސް ބަލަންޖެހޭ ކަމަށް ވިދާޅުވިއެވެ.

”އިސްރާއީލްގެ ޕާސްޕޯޓް އޮންނަ މީހުން އުޅޭ އެހެން ގައުމުތަކުގައިވެސް.  ސައުތު އެމެރިކާ އާއި އެމެރިކާގެ ގައުމު ތަކުގައިވެސް. އެހެންވީމާ، އިސްރާއީލް ޕާސްޕޯޓް އޮންނަ އެހެން ގައުމެއްގެ މީހަކަށްވެސް އެމީހާ ވެދާނެ. އެހެންވީމާ މިހުރިހާ ތަފްސީލެއް އެނގޭގޮތަށް ބަލަން ފެނޭ“

"މިސާލަކަށް ދަންނަވާ ކަމަށް ވަންޏާ އާޖެންޓީނާ އަކީ ވަރަށް ގިނަ އިޒްރޭލް މީހުން ތިބޭ ގައުމެއް، ވަރަށް ގިނަ ޔަހޫދީން ހިޖުރަ ކުރި ގައުމެއް. ދެވަނަ ބޮޑު ހަނގުރާމައަށްފަހު. އެ މީހުން އާޖެންޓީނާ ޕާސްޕޯޓަށް ވުރެ ގިނައިން އިޒްރޭލް ޕާސްޕޯޓު ބޭނުން ކުރަނީ. އެއީ އެމެރިކާ އަށް ވެސް ފަސޭހައިން ދެވޭތީ. އެގޮތަށް އިސްރާއީލް ޕާސްޕޯޓް އޮތް މީހުން އުޅޭނެ. ޖޯޑަން ގަވެސް. އަރަބިންގެ ތެރޭގައިވެސް. ފަލަސްތީނު މީހުންގެ ތެރޭގައިވެސް އުޅޭނެ،"

އަޙުމަދު ނާޒިމް

އެހެންކަމުން، އިޒްރޭލް ޕާސްޕޯޓު މަނާ ކުރުމުގެ ކުރިން އެފަދަ ތަފާސްހިސާބު ހޯދުމަށް ފަހު، އެއީ ކިހާ އަދަދެއްގެ މީހުންތޯ ބަލަން ޖެހޭ ކަމަށް ނާޒިމް ވިދާޅުވި އެވެ. އަދި އިސްރާއީލް ޕާސްޕޯޓްގައި އަންނަ މީހުން ރާއްޖެ އަންނަ ބޭނުންވެސް ބަލަންޖެހޭ ކަމަށާ، އެއީ، ވިޔަފާރި ބޭނުމަށްތޯ، ޓޫރިޒަމްގެ ބޭނުމަށް އަންނަ ބައެއްތޯ ބަލައި އެފަދަ މައުލޫމާތުވެސް ހޯދަންޖެހޭ ކަމަށް ނާޒިމް ވިދާޅުވި އެވެ.

"ކޮމިޓީގައި ބައެއް ބޭފުޅުން ދައްކާފައިވާ ވާހަކައަށް ބަލާއިރު، އަޅުގަނޑުމެންނަށް ބުރައެއް ނުވެވޭ، ބްލޭންކެޓް ބޭން އެއް، އިޒްރޭލްގެ ޕާސްޕޯޓަކަށް ވީތީ ބޭން ކުރާކަށް. އެއީ އިސްރާއީލް ޕާސްޕޯޓް އޮންނަ އަރަބިންވެސް މުސްލިމުންވެސް އެބައުޅޭ“

އަޙުމަދު ނާޒިމް

މިއާއެކު ނާޒިމް ވިދާޅުވީ އދ. އިން ވެސް އެފަދަ މައްސަލަތަކުގައި ފިޔަވަޅު އަޅައި މަނާކުރަނީ، އަސްކަރީ ހަރަކާތްތަކުގައި ބައިވެރިވާ ފަރާތްތަކާއި އިންސާނީ ހައްގުތައް ހިފެހެއްޓުމުގައި އުޅޭ މީހުންނަށް ކަމަށެވެ.

”އެހެންވީމާ، އިސްރާއީލް ޕާސްޕޯޓް އޮންނަ، އިސްރާއީލް މިލިޓަރޫއަށް ނިސްބަތްވާ ނޫނީ، މިލިޓަރީ އެސްޓަބްލިޝްމެންޓަށް ނިސްބަތްވާ މީހުންގެ ޕާސްޕޯޓް، ވާހަކައަކީ އެތެރެ ނުވެވޭ ގޮތް ހެދުންވެސް.“ ނާޒިމް ވިދާޅުވިއެވެ.

އަދި އެކަން ކުރުމަށްޓަކައި އެ މައުލޫމާތުތައް ވެސް ހޯދަން ޖެހޭ ކަމަށް ނާޒިމް ވިދާޅުވި އެވެ.

މީގެ އިތުރުން، އިޒްރޭލް ޕާސްޕޯޓު މަނާ ކުރަން ސަރުކާރުން ނިންމާފައިވިޔަސް، މަޖިލީހުން ދިރާސާ ކުރުމަށް ފަހު އެހެން ގޮތަކަށް ލަފާ ދޭން ބޭނުން ނަމަ އެކަން ވެސް ކުރެވިދާނެ ކަމަށް ނާޒިމް ވިދާޅުވި އެވެ.